កម្ពុជាបានចំណូលជិត ៤ ពាន់លានដុល្លារពីការនាំចេញកសិផលរយៈពេល ១១ ខែ

នៅក្នុងរយៈពេល ១១ ខែឆ្នាំ ២០២៣ កម្ពុជាទទួលបានទឹកប្រាក់ប្រមាណជិត ៤ ពាន់លានដុល្លារ ( ៣ ៩០៩ ៨៦៧ ៤១៩) ក្នុងនោះទឹកប្រាក់នៃការនាំចេញអង្ករមានជាង ៥ រយលានដុល្លារ (៥១៥ ២១៩ ៩៥០) និងស្រូវជាង ៨ រយលានដុល្លារ (៨៤០ ២៨៥ ១២៤) និងកសិផលក្រៅពីស្រូវជាង ២ ពាន់លានដុល្លារ (២ ៥៥៤ ៣៦២ ៣៤៥)។ នេះបើតាមរបាយការណ៍របស់អគ្គនាយកដ្ឋាន កសិកម្ម នៃក្រសួង កសិកម្ម រុក្ខាប្រមាញ់ និងនេសាទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ដដែលបង្ហាញថា ការនាំចេញកសិផលក្នុងរយៈពេល ១១ ខែ​ឆ្នាំ ២០២៣ នៅតែបន្តថយចុះ ៤,៦០% បើប្រៀបធៀបរយៈពេល ដូចគ្នា នៅឆ្នាំ ២០២២។

លោក ងិន ឆាយ អគ្គនាយក នៃអគ្គនាយកកដ្ឋាន កសិកម្មលើកឡើងតារយៈរបាយការណ៍ថា ជម្លោះរវាងអ៊ីស្រាអែល និងក្រុមហាម៉ាស មានឥទ្ធិពលលើលំហូរពាណិជ្ជកម្មសកលដែលបានចុះខ្សោយរួចទៅហើយ រួមទាំងអត្រាការប្រាក់ខ្ពស់ ទីផ្សារអចលទ្រព្យចិនតានតឹង និងសង្គ្រាមរុស្ស៊ីនៅអ៊ុយក្រែន បានជះឥទ្ធិពលយ៉ាងខ្លាំងដល់កំណើនសេដ្ឋកិច្ចពិភពលោក ​ជាពិសេសបណ្ដាប្រទេសដែលពឹងផ្អែកលើការនាំចេញដូចជាកម្ពុជា។

ថ្វីត្បិតការនាំចេញកសិផលរយៈពេល ១១ ខែ នៅមានបរិមាណតិចជាងឆ្នាំមុន ប៉ុន្តែការនាំចេញមាននិន្នាការកើនឡើងគួរឱ្យកត់សម្គាល់។ ជាក់ស្ដែងការនាំចេញក្នុងខែវិច្ឆិកា ឆ្នាំ ២០២៣ មានបរិមាណ ជាង ១ លានតោន (១ ០៣៧ ៥៥២) កើនឡើងចំនួន ៣៤៦ ២៤១ តោន បើប្រៀបខែតុលា ឆ្នាំ ២០២៣ ដែលមានបរិមាណ ៦៩១ ៣១១ តោន។

របាយការណ៍អគ្គនាយកដ្ឋាន កសិកម្ម បង្ហាញថា បរិមាណនាំចេញអង្ករក្នុងរយៈពេល ១១ ខែ ជិត ៦ សែនតោន (៥៩៥ ៦៣០)កើនឡើងជាង ៦,៥៣% , ស្រូវចំនួនជាង ២ លានតោន (២ ៤៩៧ ០៧៥) កើនឡើង ២៨,៧១%, ចំណិតដំឡូងមីក្រៀមជាង ១ លានតោន ធ្លាក់ចុះ ៤១%, ដំឡូងមីស្រស់ជាង ១ លានតោន កើនឡើង ១០%, គ្រាប់ស្វាយចន្ទី ជាង ៤ សែនតោន (៤ ២២ ៤៨២) ធ្លាក់ចុះជាង ១០ ភាគរយ៕

អត្ថបទ៖ ឡេង ដេត