មន្ត្រីជាន់ខ្ពស់ ប.ស.ស. ដាក់បទបញ្ជា​ឱ្យស្រាវជ្រាវបន្ទាន់​រកសហគ្រាសប្រើកម្មករ​និយោជិតមិនចុះបញ្ជី

មន្ត្រីជាន់ខ្ពស់បេឡាជាតិសន្តិសុខសង្គម (ប.ស.ស.) បានដាក់បទបញ្ជាឱ្យមន្ត្រីអង្គភាពជួរមុខ ត្រូវសហការគ្នា​ចុះស្រាវជ្រាវជាបន្ទាន់ ចំពោះសហគ្រាស ដែលមានប្រើកម្មករនិយោជិតហើយមិនចុះបញ្ជីជាមួយ ប.ស.ស. ដើម្បីឱ្យបុគ្គលិក ឬកម្មករនិយោជិតកំពុងបំពេញការងារក្នុងក្រុមហ៊ុន សហគ្រាសគ្រឹះស្ថានទាំងអស់នោះ ទទួលបានការគាំពារពេញលេញ។

ថ្លែងក្នុងឱកាសដឹកនាំកិច្ចប្រជុំផ្ទៃក្នុង ប.ស.ស. កាលពីថ្ងៃទី១៨ធ្នូ នៅសាលប្រជុំសន្ដិភាព ស្នាក់ការកណ្ដាល លោក  ម៉េង ហុង អគ្គនាយក ប.ស.ស. ស្ដីទី នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា សម្រាប់​ឆ្នាំ២០២៤ ខាងមុខនេះ អង្គភាពជួរមុខនៃ ប.ស.ស. ត្រូវសហការគ្នាស្រាវជ្រាវជាបន្ទាន់ចំពោះសហគ្រាស ដែលមាន​ប្រើកម្មករនិយោជិតហើយមិនចុះបញ្ជីជាមួយ ប.ស.ស. ពិសេសសហគ្រាស គ្រឹះស្ថានដែលមិនអនុវត្តកាតព្វកិច្ចរបស់ខ្លួន ត្រូវចុះអង្កេត ពិនិត្យព័ត៌មានឱ្យបានគ្រប់ជ្រុងជ្រោយ ច្បាស់លាស់ ដើម្បីរៀបចំនីតិវិធីអនុវត្តទៅតាមច្បាប់ ដែលបាន​កំណត់ ដើម្បីរក្សានូវអត្ថប្រយោជន៍របស់បងប្អូនកម្មករនិយោជិត។

លោកបានបន្តថា «ការរក្សាឱ្យបាននូវជំហរការពារផលប្រយោជន៍បងប្អូនកម្មករនិយោជិត តម្រូវឱ្យគ្រប់អង្គភាព​ពាក់ព័ន្ធនៃ ប.ស.ស. ជាពិសេសអង្គភាពជួរមុខទាំងអស់ ត្រូវបន្ដតាមដានឱ្យបានច្បាស់លាស់ នូវរាល់បញ្ហាមិន​ប្រក្រតីដែលកើតមានឡើងនៅតាមសហគ្រាស គ្រឹះស្ថាន មន្ទីរពេទ្យដែលជាដៃគូ ប.ស.ស. និងត្រូវរកដំណោះ​ស្រាយឱ្យបានទាន់ពេលវេលា សមស្របទៅតាមវិជ្ជាជីវៈរៀងៗខ្លួន ប្រកបដោយភាពទន់ភ្លន់ម៉ឺងម៉ាត់ និងមានទំនួល​ខុសត្រូវខ្ពស់»។

បើតាមអគ្គនាយកស្តីទី ថ្នាក់ដឹកនាំបុគ្គលិកប.ស.ស. ទាំងអស់ ត្រូវរួមដៃគ្នាបន្ដខិតខំប្រឹងប្រែង​អនុវត្តគោលនយោ​បាយអាទិភាពចម្បងរបស់រាជរដ្ឋាភិបាល ឱ្យបានកាន់តែល្អប្រសើរបន្ថែម ដើម្បីរក្សាការគាំពារសុខភាព និងអត្ថ​ប្រយោជន៍​ដល់ប្រជាពលរដ្ឋគ្រប់ៗគ្នា។

គួរបញ្ជាក់ថា ក្នុងឆ្នាំ២០២៣នេះ ប.ស.ស. មានសមិទ្ធផល ២ធំៗ រួមមាន កម្មវិធីផ្ដល់ប្រាក់ឧបត្ថម្ភរបស់​រាជរដ្ឋាភិបាល​សម្រាប់​សមាជិក ប.ស.ស. ជាស្រ្ដីមានផ្ទៃពោះ និងកុមារអាយុក្រោម ២ឆ្នាំ និងការដាក់ឱ្យអនុវត្តជាផ្លូវការនូវរបប​សន្ដិសុខ​សង្គមផ្នែកថែទាំសុខភាពតាមរបបភាគទានដោយស័្មគ្រចិត្តជាអត្ថប្រយោជន៍​ដ៏ល្អវិសេសវិសាលផ្ដល់ជូន​បងប្អូនប្រជាពលរដ្ឋ ជាគោលនយោបាយអាទិភាពរបស់រាជរដ្ឋាភិបាល នីតិកាលទី៧ បង្ហាញពីការគិតគូរ​យ៉ាងច្បាស់​អំពីសុខុមាលភាព និងជីវភាពរស់នៅរបស់បងប្អូនប្រជាពលរដ្ឋ៕

អត្ថបទ ៖ សំអឿន