លោក គួច ចំរើន ៖ ខេត្តព្រះសីហនុមានសាលា​ទាំងអស់ ១០៤ និងមានបុគ្គលិកអប់រំជាង ២ពាន់នាក់

លោក គួច ចំរើន អភិបាលខេត្តព្រះសីហនុ បានលើកឡើងថា ខេត្តព្រះសីហនុ មានសាលារៀនសរុបចំនួន១០៤ ក្នុងនោះ មត្តេយ្យដាច់ដោយឡែកចំនួន ០១សាលា បឋមសិក្សាចំនួន ៧២សាលា អនុវិទ្យាល័យ វិទ្យាល័យ ២៨សាលា និងសាលាឧបសម្ព័ន្ធ ០២សាលា សាលាគរុកោសល្យ និងវិក្រឹត្យការ ០១សាលា នៅឆ្នាំសិក្សា ២០២២-២០២៣។

ដោយឡែកសម្រាប់បុគ្គលិកអប់រំ សរុបចំនួន ២.១០៨នាក់ ស្រី១.០០៤នាក់។ បើតាមលោក អភិបាលខេត្ត បេក្ខជនដែល​បានដាក់ពាក្យប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២២-២០២៣មានចំនួន ១.៩១៥នាក់ ស្រី៩៧៣​នាក់ និងបានប្រឡងជាប់ចំនួន ១.៥២៣នាក់ ស្មើនឹង ៨០,៥០% ស្រី ៨២៩នាក់ស្មើនឹង ៨៥,៧៣% ក្នុងនោះ បេក្ខជន​ជាប់​និទ្ទេស A ចំនួន៤០នាក់ ស្រី ២៣នាក់ និទ្ទេសB ១២២នាក់ ស្រី ៧០នាក់ និទ្ទេស C ២៨៧នាក់ ស្រី១៦៧នាក់ និទ្ទេសD ៥៤៨នាក់ ស្រី២៩៧នាក់ និងនិទ្ទេសE ៥២៦នាក់ ស្រី ២៧២នាក់។

នៅក្នុងពិធីជួបណេះសំណាលជាមួយសិស្សនិទ្ទេស A ក្នុងឆ្នាំសិក្សា២០២២-២០២៣ លោក សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារ រាជរដ្ឋាភិបាល​ចុះមូលដ្ឋានខេត្តព្រះសីហនុ កាលពីថ្ងៃទី ២២ ធ្នូ បានលើកឡើងថា បានកោតសរសើរ និងវាយតម្លៃខ្ពស់ ចំពោះសាលា​ទាំងអស់នៅក្នុងខេត្តដែលបានយកចិត្តទុកដាក់ក្នុងការជួយបង្ហាត់បង្រៀនធ្វើឱ្យសិស្សប្រឡងសញ្ញាបត្រមធ្យមសិក្សាទុតិយភូមិទទួលបានលទ្ធផលល្អ។ លោក បានជំរុញដល់សិស្សានុសិស្សបន្តប្រពៃណីសិក្សាបន្ថែមទៀត ពិសេសអ្នក​ដែលទទួលបាននិទ្ទេស A B C ជាជោគជ័យមួយក្នុងខ្សែជីវិត។

ជាមួយគ្នានេះ ដើម្បីប្រែក្លាយខេត្តព្រះសីហនុ ជាខេត្តមួយពោរពេញដោយសិស្សានុសិស្សមានភាពឆ្លាតវៃ ហើយ​កត្តាចម្បង គឺការខិតខំសិក្សា ឧស្សារៀនសូត្រ ដើម្បីរួមគ្នាឱ្យខេត្តមានការសិក្សាចប់ចុងចប់ដើម ព្រោះសា​លាជាថ្នាល់បណ្តុះបណ្តាលនូវចំណេះដឹង ជំនាញវិជ្ជាជីវៈ និងបំណិនជីវិតសម្រាប់សិស្សគ្រប់រូប។ នេះជាការ​បន្ថែមរបស់លោក សាយ សំអាល់។

លោក សាយ សំអាល់ ក៏បានបន្តថា «យើងត្រូវសិក្សាស្វែងយល់អំពីវិទ្យាសាស្ត្រ បច្ចេកវិទ្យា និងការងារសង្គម ព្រោះខេត្តព្រះសីហនុ ជាខេត្តទេសចរណ៍ ឧស្សាហកម្ម ពាណិជ្ជកម្មយើងត្រូវធ្វើការបណ្តុះ​បណ្តាលវិជ្ជាជីវៈ​បន្ថែមទៀត​ទៅតាមតម្រូវការទីផ្សារនាពេលបច្ចុប្បន្ន និងការបណ្តុះបណ្តាលបំណិនជីវិត ក៏ជារឿងមួយ​សំខាន់សម្រាប់​ទីផ្សារការងារនាពេលបច្ចុប្បន្ន»៕