ព័ត៌មានជាតិ

រដ្ឋ ដំឡើងរបបឧបត្ថម្ភប្រចាំខែដល់អ្នកក្នុងបន្ទុកសពអតីត-មន្ត្រីរាជការ និងសពអតីតយុទ្ធជន ចាប់ពីថ្ងៃទី ១ មករា តទៅ

បានផុស

៣ ខែ មុន

នៅ

ថ្ងៃសៅរ៍ ៣០ ធ្នូ ២០២៣

ដោយ

រាជរដ្ឋាភិបាល នឹងដំឡើងរបបឧបត្ថម្ភប្រចាំខែសម្រាប់អ្នកនៅក្នុងបន្ទុកសពមន្ត្រីរាជការស៊ីវិល សពអតីតមន្ត្រីរាជការស៊ីវិល និងសពអតីតយុទ្ធជន ចាប់ពីថ្ងៃទី ០១ ខែមករា ឆ្នាំ ២០២៤ នេះតទៅ ដើម្បីជួយសម្រាលការលំបាកផ្នែកជីវភាពរស់នៅរបស់ជនទាំងនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអនុក្រឹត្យ ស្តីពីការដំឡើងរបបឧបត្ថម្ភប្រចាំខែសម្រាប់អ្នកនៅក្នុងបន្ទុករបស់ សពមន្ត្រីរាជការស៊ីវិល សពអតីតមន្ត្រីរាជការស៊ីវិល និងសពអតីតយុទ្ធជន ចុះថ្ងៃទី ២៩ ធ្នូ បានឲ្យដឹងថា អនុក្រឹត្យនេះ មានគោលបំណងដំឡើងរបបឧបត្ថម្ភប្រចាំខែសម្រាប់អ្នកនៅក្នុងបន្ទុករបស់សព មន្ត្រីរាជការស៊ីវិល សពអតីតមន្ត្រីរាជការស៊ីវិល និងសពអតីតយុទ្ធជន ដើម្បីជួយសម្រាលការលំបាកផ្នែក ជីវភាពរស់នៅរបស់ជនទាំងនេះ ហើយអនុក្រឹត្យនេះមានវិសាលភាពអនុវត្តចំពោះអ្នកនៅក្នុងបន្ទុករបស់សពមន្ត្រីរាជការស៊ីវិល សពអតីតមន្ត្រីរាជការស៊ីវិល និងសពអតីតយុទ្ធជន អនុលោមតាមបទប្បញ្ញត្តិដែលមានជាធរមាន។

តាមរយៈអនុក្រឹត្យនេះ រាជរដ្ឋាភិបាល បានសម្រេចដំឡើងរបបឧបត្ថម្ភប្រចាំខែសម្រាប់កូននៅក្នុងបន្ទុករបស់សពមន្ត្រីរាជការស៊ីវិល សពអតីតមន្ត្រីរាជការស៊ីវិល និងសពអតីតយុទ្ធជន ពី ១០ ០០០ រៀល ទៅ ៣០ ០០០ រៀល ក្នុងកូនម្នាក់ និងប្រពន្ធ ឬ ប្ដី នៅក្នុងបន្ទុករបស់សពអតីតមន្ត្រីរាជការស៊ីវិល និងសពអតីតយុទ្ធជន ពី ១៥ ០០០ រៀល ទៅ ៣០ ០០០ រៀល ឪពុក ម្តាយ ឬ អាណាព្យាបាលនៅក្នុងបន្ទុករបស់សពអតីតយុទ្ធជន ពី ៨ ០០០ រៀល ទៅ ៣០ ០០០ រៀល។

ការដំឡើងរបបឧបត្ថម្ភប្រចាំខែដូចបានកំណត់ក្នុងមាត្រា ៣ នៃអនុក្រឹត្យនេះ ត្រូវអនុវត្តចាប់ពីថ្ងៃទី ១ ខែមករា ឆ្នាំ ២០២៤ តទៅ។ រាជរដ្ឋាភិបាល បានណែនាំដល់រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ប្រធានក្រុមប្រឹក្សាជាតិគាំពារសង្គម រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា រដ្ឋមន្ត្រីគ្រប់ក្រសួង អគ្គនាយកមូលនិធិជាតិជំនួយសង្គម និងប្រធានគ្រប់ស្ថាប័ន ដែលពាក់ព័ន្ធ ត្រូវទទួលបន្ទុកអនុវត្តអនុក្រឹត្យនេះ តាមភារកិច្ចរៀងៗ ខ្លួន ចាប់ពីថ្ងៃចុះហត្ថលេខាតទៅ៕

អត្ថបទ ៖ សំអឿន