ខេត្តព្រះសីហនុ បាត់ដំបង សៀមរាប ជាប់ចំណាត់ថ្នាក់ជាក្រុងដែលមានពិធីឆ្លងឆ្នាំសកលល្អជាងគេប្រចាំឆ្នាំ

ខេត្តព្រះសីហនុជាប់ចំណាត់ថ្នាក់លេខ១ ខេត្តបាត់ដំបងជាប់លេខ២ ខេត្តសៀមរាបជាប់លេខ៣ ជាទីក្រុងដែលមានពិធីបុណ្យឆ្លងឆ្នាំសកលល្អជាងគេប្រចាំឆ្នាំ។ នេះបើតាមសេចក្ដីប្រកាសជូនដំណឹងស្ដីពីលទ្ធផលនៃការប្រកួតប្រជែងទីក្រុងដែលមានពិធីបុណ្យឆ្លងឆ្នាំសកលល្អជាងគេប្រចាំឆ្នាំ ដែលចេញដោយគណៈកម្មាធិការជាតិវាយតម្លៃទីក្រុងស្អាត នៅថ្ងៃសុក្រទី០៥ ខែមករា ឆ្នាំ២០២៤នេះ។

ចំពោះលទ្ធផលនៃចំណាត់ថ្នាក់ទីក្រុងដែលមានពិធីបុណ្យឆ្លងឆ្នាំសកលល្អជាងគេប្រចាំឆ្នាំនេះ គឺភ្ញៀវទេសចរជាអ្នកបោះឆ្នោតលើទីក្រុងដែលភ្ញៀវពេញចិត្តដោយផ្ទាល់ តាមរយៈតំណលីងបោះឆ្នោតនៅលើទំព័រហ្វេសប៊ុកគណៈកម្មាធិការជាតិវាយតម្លៃទីក្រុងស្អាត។ ខណៈការបោះឆ្នោតនេះ គឺចាប់ផ្ដើមពីថ្ងៃទី៣១ ខែធ្នូ ឆ្នាំ២០២៣ រហូតដល់ថ្ងៃទី២​ ខែមករា ឆ្នាំ២០២៤។

ចំពោះពិធីប្រគល់ពានរង្វាន់ទៅកាន់ខេត្តទាំង៣ គណៈកម្មាធិការជាតិវាយតម្លៃទីក្រុងស្អាត នឹងប្រគល់ជូននៅក្នុងពិធីអបអរសាទរទិវាជាតិអបអរទីក្រុងស្អាតនាពេលខាងមុខ។

គួរជម្រាបជូនបន្តិចថា ក្នុងឱកាសថ្ងៃឆ្លងឆ្នាំសកល ខេត្តព្រះសីហនុទទួលបានភ្ញៀវទេសចរជាង៤៧ម៉ឺននាក់ ខេត្តបាត់ដំបងទទួលបានភ្ញៀវទេសចរចំនួនជាង៣៥ម៉ឺននាក់ និងខេត្តសៀមរាបទទួលបានភ្ញៀវទេសចរចំនួនជាង៣០ម៉ឺននាក់៕​

ដោយ៖ ង៉ិល ណារ៉ាត់