អ្នកជំនាញ ជំរុញថ្នាក់ដឹកនាំខេត្តទេសចរណ៍ ដោះស្រាយបញ្ហាតម្លៃម្ហូបអាហារឡើងថ្លៃ

អ្នកជំនាញផ្នែកសេដ្ឋកិច្ច និងវិស័យទេសចរណ៍ ជំរុញឱ្យអាជ្ញាធរខេត្តនៅតំបន់ទេសចរណ៍ចាត់វិធានការជាបន្ទាន់ ដើម្បីដោះស្រាយបញ្ហាតម្លៃអាហារថ្លៃហួសហេតុនៅតាមកន្លែងកម្សាន្ត ជាពិសេសតំបន់ឆ្នេរ ដែលជាបញ្ហាបន្តកើតមានក្នុងប្រទេសកម្ពុជា អស់រយៈពេលជាច្រើនឆ្នាំមកហើយ។

ការស្នើនេះ ខណៈក្នុងរដូវបុណ្យភ្ជុំបិណ្ឌ មានពលរដ្ឋខ្មែរបានធ្វើដំណើរនៅលេងកម្សាន្តខេត្តកែប និងបានបង្ហោះសារលើបណ្តាញសង្គមហ្វេសប៊ុក ដោយរិះគន់ទៅលើម្ហូបអាហារថ្លៃហួសហេតុ មិនសមជាមួយបរិមាណ។ ករណីនេះមិនមែនជារឿងថ្មីនោះទេ គឺតែងតែកើតឡើងជាងរឿយៗរៀងរាល់រដូវបុណ្យទានម្តងៗនៅតំបន់ទេសចរណ៍មួយចំនួន។​

ជុំវិញបញ្ហាចាក់ស្រេះនេះ បើតាមលោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បញ្ហាតម្លៃម្ហូបអាហារថ្លៃហួសហេតុនៅតំបន់មាត់សមុទ្រខេត្តកែប គឺជា “ជម្ងឺមហារីក” ដែលត្រូវការដោះស្រាយជាបន្ទាន់ ដើម្បីស្តារមុខមាត់ខេត្ត និងឧស្សាហកម្មទេសចរណ៍ឡើងវិញ។ លោក​ក៏​កត់​សម្គាល់​ដែរ​ថា បញ្ហា​នេះ​មិនកើតឡើងតែ​ចំពោះ​ខេត្ត​កែប​មួយទេ ប៉ុន្តែ​អាច​រក​ឃើញ​នៅ​តាម​តំបន់​ទេសចរណ៍ និង​រមណីយដ្ឋាន​ផ្សេង​ទៀត​នៅ​ស្ទើរទូទាំង​ប្រទេស។ លោកថ្លែងថា៖«ខេត្តជាអត្តសញ្ញាណធំរបស់ខេត្តកែបគឺផ្សារក្តាម ដែលទាញឱ្យមនុស្សទៅលេង អ៊ីចឹង! កន្លែងដែលមានបញ្ហា ជាកន្លែងជម្ងឺមហារីក នៅបន្តបែបនេះ ហើយនៅតែជជែកគ្នា​អត់ព្រមទៅអនុវត្តវិធានការរដ្ឋបាល ខ្ញុំគិតថារឿងនេះនៅបន្តមួយឆ្នាំហើយមួយឆ្នាំទៀត»។

បើតាមលោក ធួន ស៊ីណាន បញ្ហាទំនិញឡើងថ្លៃនេះមិនក្រោម ១៧ ឆ្នាំដែលមិនទាន់បានដោះស្រាយ ហើយសម្បីតែលោកផ្ទាល់ក៏ជួបបញ្ហានេះមិនក្រោម ៥ ដងនោះទេ។

ជាមួយគ្នានេះ លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា យល់ស្របថា ការឡើងថ្លៃទំនិញគឺជាបញ្ហាកើតឡើងដដែលៗនៅក្នុងតំបន់ទេសចរណ៍ ទោះបីជាមានការអំពាវនាវរបស់រដ្ឋាភិបាលឱ្យបញ្ឈប់ការដំឡើងថ្លៃក៏ដោយ។ លោកបានថ្លែងថា៖«ចំពោះបញ្ហាថ្លៃទំនិញនៅតំបន់ទេសចរណ៍នានា យើងឃើញថា ដោយសារជាទូទៅតំបន់ទេសចរណ៍នោះ ជាតំបន់ផ្តាច់មុខ​ អ៊ីចឹង!កាលណាមានលក់ផ្តាច់មុខ ហើយត្រូវបង់សេវាជូនរដ្ឋបាលនោះ ការលក់ត្រូវបានកំណត់ក្នុងថ្លៃមួយដែលគ្មានការប្រកួតប្រជែងខ»។

លោកបន្តថា៖«ក្រៅពីខេត្តកែបក៏កើតមានដែរធ្លាប់ល្បីល្បាញជាងគេនៅរមណីយដ្ឋានកៀនស្វាយ ហើយខេត្តព្រះសីហនុក៏ដូចគ្នា ទាំងថ្លៃថ្នាក់នៅ កន្លែងអង្គុយមាត់សមុទ្រ ខ្ចុះជាដើមសុទ្ធតែត្រូវបានឡើងថ្លៃទាំងអស់ ដូច្នេះរឿងនេះកើតឡើងដដែលៗធ្វើឱ្យប្រជាពលរដ្ឋរុញទ្រាន់ ចុងក្រោយម្នាក់ៗរារែកក្នុងទៅលេងកម្សាន្តនៅតំបន់ទាំងនោះ»។

ដើម្បីដោះស្រាយបញ្ហានេះ អ្នកជំនាញទាំងពីរ ស្នើថ្នាក់ដឹកនាំខេត្តចាត់វិធានការរដ្ឋបាលឱ្យបានម៉ឺងម៉ាត់ ដើម្បីធានាសណ្តាប់ធ្នាប់ និងទប់ស្កាត់ការឡើងថ្លៃ ដែលអាចជះឥទ្ធិពលអវិជ្ជមានដល់ភ្ញៀវទេសចរជាតិ និងអន្តរជាតិ៕