កសិករដាំសណ្តែកដីក្នុងឃុំអង្គរបាន សប្បាយចិត្ត ខណៈតម្លៃខ្ពស់ជាងឆ្នាំមុន

ប្រជាកសិករជាច្រើនគ្រួសាររស់នៅតាមដងទន្លេមេគង្គ ក្នុងឃុំអង្គរបាន ស្រុកកងមាស ខេត្តកំពង់ចាម បានចាប់ផ្តើមប្រមូលផលសណ្តែកដី ខណៈតម្លៃនាឆ្នាំនេះខ្ពស់ជាងឆ្នាំមុន។

ដំណាំសណ្តែកដីភាគច្រើនប្រជាកសិករដាំនៅរដូវទឹកសម្រក ដោយជ្រើសរើសយកប្រភេទដីល្បាយខ្សាច់ និងត្រូវការទឹកសន្សឹម ឬទឹកភ្លៀង ជាដើម ដើម្បីជួយផ្គត់ផ្គង់ផលដំណាំឱ្យទទួលទិន្នផលខ្ពស់។ កសិករដែលកំពុងដកសណ្តែកដី បានបង្ហាញចំណាប់អារម្មណ៍សប្បាយរីករាយ ខណៈតម្លៃឆ្នាំនេះខ្ពស់ជាងរាល់ឆ្នាំ។ លោកស្រី ធី ធានី រស់នៅក្នុងភូមិអង្គរបានទី១ ឃុំអង្គរបាន នៃស្រុកកងមាស បានប្រាប់ឱ្យដឹងថា សណ្តែកដី ឆ្នាំនេះទទួលបានទិន្នផលមធ្យម ប៉ុន្តែតម្លៃលក់ លើទីផ្សារវិញបានតម្លៃក្នុងមួយគីឡូក្រាម ៣ពាន់រៀល ទៅ ៤ពាន់រៀល ដោយមានឈ្នួញមកទទួលទិញដល់កន្លែងតែម្តង។

កសិកររូបនេះ បានបន្តថា ក្រោយទទួលផលដំណាំសណ្តែកដីរួច កសិករនាំគ្នាបន្តដាំដំណាំល្ង ពោត ជាដើម។ តែយ៉ាង ណា ប្រជាកសិករ ក៏បានស្នើដល់អាជ្ញាធរ និងមន្ទីរពាក់ពន្ធ័ធ្វើយ៉ាងណាជួយសម្រួលនូវចំណេះដឹងក្នុងការដាំដុះ ទាំងការថែទាំ និងជាពិសេសនោះជួយរកទីផ្សារឱ្យកសិករលក់ចេញបានតម្លៃខ្ពស់ ដើម្បីសម្រួលដល់កម្រិតជីវភាពរបស់កសិករបន្ថែមទៀត៕

អត្ថបទ និងរូបភាព ៖ ឡេក ចាន់ពេជ្រ