ព័ត៌មានជាតិ

អភិបាលខេត្តពីរសម្របសម្រួលគ្នាបញ្ជូនទឹក សង្គ្រោះស្រូវប្រាំងកសិករកុំឲ្យខូចខាត

បានផុស

២ years មុន

នៅ

ថ្ងៃពុធ ១៧ មករា ២០២៤

ដោយ

ការបង្កបង្កើនផលស្រូវប្រាំងរបស់ប្រជាកសិករទាំងក្នុងផែនការទាំងលើសផែនការរាប់មុឺនហិកតាក្នុងខេត្តបាត់ដំបង ប្រឈមផលប៉ះពាល់ដោយសារខ្វះទឹកស្រោចស្រព។

យ៉ាងណាមិញ មន្ត្រីនៃមន្ទីរកសិកម្មខេត្តបាត់ដំបងបានបញ្ជាក់ថា មកដល់ពេលនេះសង្គ្រោះបានជាបន្តបន្ទាប់ដែលក្នុងនោះមានស្រុកបាណន់ ២៨០ ហិកតា ស្រុកសង្កែ ៣៩៥ ហិកតា និង ស្រុក មោងឫស្សី ៤០០ ហិកតា ខណះដែលស្រុកមោងឫស្សី មានឃុំចំនួន ០៣ នៅផ្នែកខាងលើមិនអាចបញ្ជូនទឹកបានដល់ ក្នុងនោះមានឃុំគា ឃុំឫស្សីក្រាំង និងឃុំព្រៃស្វាយ រួមស្រុករុក្ខគីរីចំនួន ១៨៣ ហិកតា ដែលកំពុងធ្វើការសម្របសម្រួលជាមួយលោកអភិបាលខេត្តពោធិ៍សាត់ ដើម្បីជួយទម្លាក់ទឹកជួយសង្គ្រោះតាមលទ្ធភាព។

ការសម្របសម្រួលជាមួយអភិបាលខេត្តពោធិ៍សាត់ ដើម្បីជួយបញ្ជូនទឹកសង្គ្រោះស្រូវប្រាំងប្រជាកសិករស្រុកមោងឫស្សីនិងស្រុករុក្ខគីរីនេះ ធ្វើឡើងបន្ទាប់ពីលោក សុខ លូ អភិបាលអភិបាលខេត្តបាត់ដំបងបានដឹកនាំមន្ត្រីពាក់ព័ន្ធចុះពិនិត្យស្ថានភាពជាក់ស្តែង ទាំងលើផលដំណាំស្រូវ ទាំងប្រភពទឹកនៅក្នុងស្រុកទាំង ២ កាលពីថ្ងៃទី១៦ ខែមករា។

ក្នុងនោះសំណង់ រាមគុណក្នុងស្រុកមោងឬស្សី និងសំណង់ព្រែកជីកនៅស្រុករុក្ខគីរី ដែលនៅសល់ទឹកតិចតួចមិនអាចទ្រទ្រង់បាន។

មន្ត្រីកសិកម្មខេត្តបាត់ដំបងបានប្រាប់ថា ក្រោយលោក សុខ លូ អភិបាលខេត្តបានសម្របសម្រួល ខាងអាជ្ញាធរខេត្តពោធិ៍សាត់យល់ព្រមបញ្ជូនទឹកជួយទៅតាមលទ្ធភាព ដោយបញ្ជូនទឹកតាមដងស្ទឹងដូនកែវនៃខេត្តពោធិ៍សាត់ ហើយទម្លាក់ទៅឃុំនៅផ្នែកខាងលើទាំង ៣ នៃស្រុកមោងឫស្សីដើម្បីសង្គោះ។

រដ្ឋបាលខេត្តពោធិ៍សាត់ក៏បានបញ្ជាក់ដែរថា បើសិនជាសល់ទឹកច្រើន នឹងបន្តបញ្ជូនទៅសង្គ្រោះស្រូវប្រាំងចំនួន ១៨៥ ហិកតាទៀតនៅក្នុងស្រុករុក្ខគីរី ដែលកំពុងប្រឈមផងដែរ។

ប្រជាកសិករនៅក្នុងឃុំចំនួន ៣ នៃស្រុកមោងឫស្សី ដែលប្រឈមការខូចខាតស្រូវជាច្រើនហិកតាបានថ្លែងអំណរគុណដល់ជាជ្ញាធរខេត្តពោធិ៍សាត់ ដែលបានយល់ព្រមតាមសំណើររបស់អាជ្ញាធរខេត្តបាត់ដំបង ក្នុងការសម្របសម្រួលជួយសង្គ្រោះស្រូវរបស់ពួកគាត់នាពេលនេះ ជាពិសេសលោកអភិបាលខេត្តបាត់ដំបងដែលខិតខំស្វែងរកគ្រប់មធ្យោបាយ ដើម្បីជួយដល់ប្រជាកសិករ។

ការជួយសង្គ្រោះទាន់ពេលនេះ នឹងអាចជួយសម្រួលទ្រង់ទ្រង់ដល់ជីវភាពក្រោយពេលប្រមូលផល។

មន្ត្រីកសិកម្មខេត្តមបាត់ដំបងលោក ហេង សិទ្ធ បានបញ្ជាក់ថា ខេត្តបាត់ដំបងមានផលប៉ះពាល់ស្រូវសរុប ៨៨៥០ ហិកតា តែមិនបណ្តាលឲ្យខូចខាតធំនោះទេ ខណះការជួយជំហានដំបូងកាលពីថ្ងៃទី ១៤ -១៥ ខែមករា លើភូមិសាស្ត្រគោលដៅមានស្រុកបាណន់ជួយបាន ២៨០ ហិកតា ស្រុកសង្កែ ៣៩៥ ហិកតា និង ស្រុកមោងឫស្សីបាន ៤០០ ហិកតា ហើយបច្ចុប្បន្នកំពុងបន្តជួយនៅតាមបណ្តាតំបន់គោលដៅផ្សេងៗទៀតផងដែរ៕

អត្ថបទ៖ សៅ សារិទ្ធ