នាយទាហានកម្ពុជា៨រូប បានការពារសារណាបញ្ចប់ការសិក្សាដោយជោគជ័យ នៅប្រទេសចិន

អបអរសាទរចំពោះនិស្សិតនាយទាហានកម្ពុជាចំនួន៨រូប ដែលបានការពារសារណាបញ្ចប់ការសិក្សាប្រកបដោយភាពជោគជ័យ នៅក្នុងទីក្រុងណានជីង ប្រទេសចិន។

កាលពីថ្ងៃទី២៥ ខែមករា ឆ្នាំ២០២៤ និស្សិតនាយទាហានកម្ពុជាចំនួន ៨រូប បានការពារសារណាបញ្ចប់ការសិក្សាដោយជោគជ័យ ទទួលបាននិទ្ទេសល្អគ្រប់ៗគ្នា។ ក្នុងនោះ មាននិស្សិតនាយទាហានថ្នាក់អនុបណ្ឌិតវិទ្យាសាស្រ្តយោធាចំនួន ១ រូប (ស្រី) និងនាយទាហានថ្នាក់បញ្ជាការសេនាធិការកងទ័ពជើងគោកចំនួន ៧រូប ហើយបានចូលរួមពិធីបិទវគ្គទទួលសញ្ញាប័ត្រ និងទទួលប័ណ្ណសសើរចំនួន ២រូបផងដែរ។

សូមបញ្ជាក់ថា វគ្គសិក្សានេះ មានរយៈពេល ១១ខែ ដោយគិតចាប់ពីថ្ងៃទី១៩ ខែកុម្ភៈ ឆ្នាំ២០២៣ រហូតដល់ថ្ងៃទី២៦ ខែមករា ឆ្នាំ២០២៤ មាននិស្សិតនាយទាហានអន្តរជាតិចូលរួមសរុបចំនួន ៤៦រូប មកពី ១៦ប្រទេស ដែលក្នុងនោះ សិក្សានៅក្នុង សាលាមហាវិទ្យាល័យបញ្ជាការសេនាធិការកងទ័ពជើងគោក ទីក្រុងណានជីង ប្រទេសចិន។ នេះ គឺជាធនធានមនុស្សថ្មីមួយទៀតសម្រាប់បម្រើឱ្យវិស័យការពារជាតិនៅក្នុងប្រទេសកម្ពុជាផងដែរ៕