សម្តេចធិបតី ហ៊ុន ម៉ាណែត គាំទ្រ ការកសាងមូលធនមនុស្សក្នុងវិស័យអធិការកិច្ច

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា គាំទ្រ ការកសាងមូលធនមនុស្សក្នុងវិស័យអធិការកិច្ច។ ការថ្លែងនេះ ធ្វើឡើងក្នុងឱកាស សម្ដេចធិបតី អញ្ជើញជាអធិបតី​ក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់​ក្រសួង​អធិការ​កិច្ច នៅថ្ងៃទី១៣ ខែកុម្ភៈ ឆ្នាំ២០២៤ នេះ។

សម្ដេចធិបតី ហ៊ុន ម៉ាណែត គាំទ្រការកសាងមូលធនមនុស្សក្នុងវិស័យអធិការកិច្ច ដោយសម្ដេចបញ្ជាក់ថា ត្រូវធ្វើឱ្យបាន ធ្វើឱ្យខ្លាំង ព្រោះបើអ្នកទៅត្រួតពិនិត្យគេអសមត្ថភាព នោះក៏មិនអាចវាយតម្លៃត្រឹមត្រូវ នាំឱ្យខូចការ។

សម្ដេចធិបតី ហ៊ុន ម៉ាណែត បញ្ជាក់ថា៖ “ខ្លាចបំផុតយកឯកសារដែលត្រឹមត្រូវយកឱ្យអ្នកមិនច្បាស់កែ អ្នកមិនច្បាស់ខ្លះអត់ហ៊ាន តែអ្នកមិនច្បាស់ខ្លះហ៊ាន ហើយហ៊ានហ្នឹង គឺរឹងណាស់។ អ៊ីចឹងធ្វើឱ្យខូចការទាំងអស់ ទីបំផុតជំនាញលែងច្បាស់លាស់ គេធ្វើពីក្រោមច្បាស់លាស់ ឡើងទៅលើវាយតម្លៃខុស ផ្អែកទៅលើការងារមិនច្បាស់លាស់ ធ្វើឱ្យថ្នាក់ក្រោមក៏បាក់ទឹកចិត្ត ឬមួយកែប្រព័ន្ធការងារពីច្បាស់លាស់ទៅមិនច្បាស់លាស់”។

សម្ដេចធិបតី ហ៊ុន ម៉ាណែត មានប្រសាសន៍បន្តថា៖ “អង្គភាពអធិការកិច្ច ទី១ ត្រូវមានធនធានមនុស្សច្បាស់លាស់ដើម្បីធ្វើការងារនេះ ហើយត្រូវយកចិត្តទុកដាក់ឱ្យមែនទែន ព្រោះបើយើងមិនច្បាស់ ទៅចាប់ ទៅឱ្យយោបល់អ្នកណា អត់ច្បាស់ ទាំងអស់តែម្ដង។ កិច្ចការងារនេះ ត្រូវពង្រឹងដែលមានវិទ្យាស្ថានអធិការកិច្ច ក៏ដូចជាតាមមន្ទីរស្ថាប័នដើរតួ ហើយក្រសួងស្ថាប័ននីមួយៗត្រូវមានវិធានការ”។

គួរបញ្ជាក់ថា យុទ្ធសាស្ត្របញ្ចកោណ ដំណាក់កាលទី១ បានកំណត់យកអាទិភាពគន្លឹះ ចំនួន៥ គឺ៖ “មនុស្ស ផ្លូវ ទឹក ភ្លើង និង បច្ចេកវិទ្យា” ក្នុងនោះបានកំណត់យកធនធានមនុស្សជាគ្រឹះ និងមធ្យោបាយ សំខាន់ទី១ ក្នុងការសម្រេចឱ្យបាននូវចក្ខុវិស័យកម្ពុជាឆ្នាំ២០៥០ ជាប្រទេសមានចំណូលខ្ពស់។ មន្ត្រីគ្រប់រូបត្រូវមាន ចំណេះដឹង សមត្ថភាពគ្រប់គ្រាន់ទាំងផ្នែកជំនាញអធិការកិច្ច និងជំនាញបច្ចេកវិទ្យា អត្តាភិវឌ្ឍ ព្រមទាំងមានលក្ខណៈសម្បត្តិ សីលធម៌ និងគុណធម៌ ទើបជាមូលដ្ឋានគ្រឹះ នៃការពង្រឹង និង លើកកម្ពស់សមត្ថភាពស្ថាប័ន ប្រកបដោយចីរភាព និងភាពធន់ ដើម្បីឆ្លើយតបទៅនឹងបរិបទនៃការវិវឌ្ឍ របស់សង្គមជាតិនៅក្នុងយុគសម័យបដិវត្តឧស្សាហកម្ម៤.០ និងឌីជីថលូបនីយកម្មស្ថាប័នសាធារណៈ។ មន្ត្រីអធិការកិច្ច ត្រូវគោរពក្រមសីលធម៌វិជ្ជាជីវៈ វិន័យការងារ មានមនសិការការងារ ឆន្ទៈម្ចាស់ការ សុចរិតភាព និងភាពស្អាតស្អំ ដើម្បីអនុវត្តឱ្យបានខ្ជាប់ខ្ជួនតាម អភិក្រមទាំង៥ របស់ សម្តេចតេជោ គឺ “ឆ្លុះ កញ្ចក់ ងូតទឹក ដុសក្អែល ព្យាបាល និងវះកាត់”៕