មន្ទីរពេទ្យតេជោសែន កោះធំ ត្រៀមសម្ពោធ ក្រោមអធិបតី សម្តេចធិបតី ក្នុងខែមីនា

លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការ ក្រសួងសុខាភិបាល បានដឹកនាំប្រតិភូសុខាភិបាល ចុះពិនិត្យវឌ្ឍនភាពការងារ និងការរៀបចំហេដ្ឋារចនាសម្ព័ន្ធ ព្រមទាំងដឹកនាំកិច្ចប្រជុំ ដើម្បីត្រៀមសម្រាប់ដំណើរការពិធីសម្ពោធដាក់ឱ្យប្រើប្រាស់ជាផ្លូវការ នៃមន្ទីរពេទ្យតេជោសែន កោះធំ ក្នុងអំឡុងខែមីនា ឆ្នាំ២០២៤ ខាងមុខនេះ ក្រោមអធិបតី សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវបណ្ឌិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលបំណងនៃកិច្ចប្រជុំ ដើម្បីពិនិត្យ និងពិភាក្សាទៅលើការងារត្រៀមរៀបចំដំណើរការសម្ភោធដាក់ឱ្យប្រើប្រាស់ជាផ្លូវការមន្ទីពេទ្យតេជោសែន កោះធំ ដែលរួមមាន៖ ការងារបរិស្ថាន និងអនាម័យ ការងារសន្តិសុខ ការងារដំណើរការកម្មវិធី ការងារពិធីការ ការងារឯកសារ និងការងារថវិកា។ បន្ទាប់ពីអង្គប្រជុំ បានពិភាក្សាអំពីការងារដែលត្រូវអនុវត្តតាមភារកិច្ចទទួលខុសត្រូវរបស់ខ្លួន គណៈកម្មការ អនុគណៈកម្មការ តំណាងរដ្ឋបាលខេត្តកណ្តាល ស្ថាប័ន និងអង្គភាពពាក់ព័ន្ធ បានចុះពិនិត្យមើលស្ថានភាពជាក់ស្តែង នៃបរិវេណមន្ទីរពេទ្យ ដែលជាកន្លែងប្រារព្ធកម្មវិធី។

ក្នុងកិច្ចប្រជុំនេះ មានការអញ្ជើញចូលរួមពី សមាជិក គណៈកម្មការកណ្តាល អនុគណៈកម្មការ តំណាងក្រសួងសាធារណៈការ និងដឹកជញ្ជូន តំណាងក្រុមប្រឹក្សា អភិវឌ្ឍន៍កម្ពុជា តំណាងរដ្ឋបាលស្រុកកោះធំ ប្រធានមន្ទីរសុខាភិបាល នៃរដ្ឋបាលខេត្តកណ្តាល និងថ្នាក់ ដឹកនាំមន្ទីរពេទ្យតេជោសែន កោះធំ សរុបចំនួន ៣៦រូប។

គួរបញ្ជាក់ថា មន្ទីរពេទ្យតេជោសែន កោះធំ ស្ថិតនៅក្នុងស្រុកកោះធំ ខេត្តកណ្តាល បានចាប់ផ្តើមសាងសង់នៅថ្ងៃទី៧ ខែមករា ឆ្នាំ២០២២ និងបញ្ចប់នៅថ្ងៃទី២០ ខែមិថុនា ឆ្នាំ២០២៣ មានចំនួន ៣ អាគារ និងមានបុគ្គលិក មន្រ្តីរាជការ បម្រើការងារសរុបចំនួន ៩៥នាក់៕