សមាគមខ្មែរចំនួន៥នៅអូស្រ្តាលី ប្រកាសមិនគាំទ្រការធ្វើបាតុកម្មប្រឆាំងសម្តេចធិបតីចូលរួមប្រជុំអាស៊ាន-អូស្រ្តាលី

សមាគមខ្មែរចំនួន៥ ដែលរស់នៅប្រទេសអូស្ត្រាលី  បានប្រកាសប្រឆាំងដាច់ខាត ចំពោះការប៉ុនប៉ងធ្វើបាតុកម្មណាមួយដែលបង្កឡើងដោយក្រុមជ្រុលនិយម ក្នុងពេលដំណើរទស្សនកិច្ចរបស់ សម្តេចធិបតី ហ៊ុន ម៉ាណែត។ នេះបើតាមសេចក្ដីថ្លែងការណ៍ស្វាគមន៍វត្តមានសម្ដេចធិបតី ហ៊ុន ម៉ាណែត ដែលចេញនៅថ្ងៃទី២៩ ខែកុម្ភៈ ឆ្នាំ២០២៤នេះ។

សមាគមទាំង៥នេះ បានចេញមកបង្ហាញជំហរគាំទ្រសម្ដេចធិបតីបែបនេះ បន្ទាប់ពីក្រុមប្រឆាំងជ្រុលនិយមមួយក្ដាប់តូចបានរៀបចំផែនការប៉ុនប៉ងធ្វើបាតុកម្មប្រឆាំងនឹងវត្តមានរបស់សម្ដេចធិបតី ហ៊ុន ម៉ាណែត ក្នុងពេលចូលរួមកិច្ច​ប្រជុំអាស៊ាន- អូស្រ្តាលី។ សមាគមទាំង៥ បានចាត់ទុកសកម្មភាពរបស់ក្រុមប្រឆាំងជ្រុលនិយម ថាគឺមិនឆ្លុះបញ្ចាំងពីទស្សនៈរួមរបស់ប្រជាជនខ្មែរដែលរស់នៅក្នុង ប្រទេសអូស្ត្រាលី និងណូវ៉ែលហ្សេឡង់ នោះឡើយ។

សមាគមទាំង៥ នៅអូស្ត្រាលី ដែលបង្ហាញជំហរគាំទ្ររាជរដ្ឋាភិបាលគឺមានដូចជា ទី១/សមាគមខ្មែរ-អូស្រ្តាលី នៃរដ្ឋឃ្វីនស្លែនដ៍ ទី២/សមាគមពលរដ្ឋខ្មែរអូស្ត្រាលី រដ្ឋវិចតូរីយ៉ា ទី៣/សមាគមយុវជនខ្មែរ ទីក្រុងស៊ីដនី  ទី៤/សមាគមមិត្តភាពកម្ពុជា និងវប្បធម៌ប្រចាំរដ្ឋអូស្ត្រាលីខាងត្បូង និងទី៥/សមាគមទ្រទ្រង់វប្បធម៌ខ្មែរ រដ្ឋវែល្លីងតុន។

គួរឱ្យដឹងថា កិច្ចប្រជុំកំពូលពិសេសអាស៊ាន-អូស្ត្រាលី នឹងប្រព្រឹត្តទៅនៅថ្ងៃទី៤ដល់ទី៦ ខែមីនា នៅទីក្រុងម៉ែលប៊ន ប្រទេសអូស្ត្រាលី។ កិច្ចប្រជុំកំពូលពិសេសនេះគឺជា កិច្ចប្រជុំផ្លូវការរវាងអាស៊ាននិងអូស្ត្រាលី និងជាព្រឹត្តិការណ៍ប្រវត្តិសាស្ត្រ ក្នុងការពង្រឹងភាពដៃគូជាយុទ្ធសាស្ត្ររបស់អូស្ត្រាលីជាមួយអាស៊ាន។ កិច្ចប្រជុំនេះ នឹងផ្តល់ផលប្រយោជន៍ខាងផ្នែកសេដ្ឋកិច្ចនិងសន្តិសុខជារូបវ័ន្ត ដល់អូស្ត្រាលីក៏ដូចជាអាស៊ានទាំងមូល។

ក្នុងនាមកម្ពុជាជាសមាជិកអាស៊ាន នាយករដ្ឋមន្ត្រីប្រទេសអូស្ត្រាលី  ក៏បានអញ្ជើញសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទៅចូលរួមកិច្ចប្រជុំកំពូលពិសេស អាស៊ាន-អូស្ត្រាលី។

តាមសេចក្ដីជូនដំណឹងដដែល សមាគមខ្មែរទាំង៥ បានចាត់ទុកការដែលនាយករដ្ឋមន្ត្រីអូស្រ្តាលី អញ្ជើញសម្ដេច ហ៊ុន ម៉ាណែត ទៅចូលរួមកិច្ចប្រជុំដ៏ពិសេសនេះ ជាការបង្ហាញពីភាពស្មើមុខស្មើមាត់របស់កម្ពុជា ក្នុងនាមជារដ្ឋអធិបតេយ្យមួយក្នុងតំបន់អាស៊ាន។

សមាគមទាំង៥ ក៏បានប្រកាសស្វាគមន៍យ៉ាងកក់ក្តៅបំផុតចំពោះដំណើរទស្សនកិច្ចរបស់ សម្តេចធិបតី ហ៊ុន ម៉ាណែត និងគណៈប្រតិភូកម្ពុជា ដែលនឹងអញ្ជើញទៅចូលរួមក្នុងកិច្ចប្រជុំកំពូលអាស៊ាន​-អូស្ត្រាលីនេះ៕

ដោយ៖ ង៉ិល ណារ៉ាត់