នាយករដ្ឋមន្ត្រី៖ ខ្ញុំសូមស្នើសុំក្មួយៗប្អូនៗនិស្សិតពេទ្យ កុំសុំជាប់ដោយមិនប្រឡងអី!

សម្ដេចធិបតី ហ៊ុន ម៉ាណែត​ នាយករដ្ឋមន្ត្រីនៃកម្ពុជា បានស្នើដល់និស្សិតពេទ្យទាំងអស់ កុំសុំជាប់ដោយមិនប្រឡងទៀតអី ព្រោះការប្រឡងគឺជារឿងដ៏សំខាន់មួយ។ ការស្នើនេះ ធ្វើឡើងធ្វើឡើងនៅក្នុងពិធីបិទសន្និបាតបូកសរុបការងារឆ្នាំ ២០២៣ និងលើកទិសដៅការងារឆ្នាំ ២០២៤ របស់ក្រសួងសុខាភិបាល នៅរសៀលថ្ងៃទី ១៩ ខែមីនានេះ។

សម្ដេចធិបតី ហ៊ុន ម៉ាណែត បានណែនាំដល់ក្រសួង-ស្ថាប័នទាំងអស់ ត្រូវយកចិត្តទុកដាក់ទៅលើការបណ្ដុះបណ្ដាលធនធានមនុស្ស និងគុណភាពរបស់សិស្ស-និស្សិត ហើយការរៀនពេទ្យត្រូវមានការរឹតបន្តឹងឲ្យខ្លាំង។

ក្នុងឱកាសនេះដែរ សម្ដេចធិបតី ហ៊ុន ម៉ាណែត បានស្នើដល់និស្សិតពេទ្យទាំងអស់ សូមកុំស្នើសុំជាប់ដោយមិនប្រឡងអី។ សម្ដេចនាយករដ្ឋមន្ត្រី​ បានថ្លែងថា «ហើយខ្ញុំសូមស្នើសុំក្មួយៗប្អូនៗនិស្សិតពេទ្យ កុំសុំជាប់ដោយមិនប្រឡងអី ព្រោះប្រឡងនេះជួយយើង ពេលដែលយើងទៅធ្វើការ ដូចខ្ញុំថា ពេទ្យគឺសេនាឲ្យទេវតា យើងត្រូវទៅព្យាបាលមនុស្សឲ្យចំ កុំឲ្យធ្វើអីខុសពីបំណងរបស់យើង ទាំងសមត្ថភាពយើងមាន»។

ប្រមុខរាជរដ្ឋាភិបាល បានលើកឡើងដែរថា ការរៀនពេទ្យត្រូវរៀនឲ្យបានច្បាស់លាស់ ហើយត្រូវប្រឡងទាំងអស់គ្នា។ ក្នុងនោះដែរ សម្ដេច ក៏បានសង្កេតឃើញថា សមត្ថភាពនិស្សិតពេទ្យរបស់កម្ពុជា កាន់តែមានការរីកចម្រើនជាបន្តបន្ទាប់ផងដែរ៕