មន្ត្រីជាន់ខ្ពស់ បញ្ជាឱ្យក្រុមហ៊ុនធ្វើផ្លូវជាតិលេខ៧ សម្រួលការធ្វើដំណើររបស់ពលរដ្ឋកុំឱ្យជួបការកកស្ទះ

លោករដ្ឋលេខាធិការក្រសួងសាធារណការ និងដឹកជញ្ជូន  បានស្នេីឲ្យក្រុមការងារសាងសង់ផ្លូវជាតិលេខ៧ស្រុកជេីងព្រៃ  ដល់រង្វង់មូលគល់ស្ពានគីហ្សូណា ក្រុងកំពង់ចាម ត្រូវជួយសម្របសម្រួលចរាចរណ៍ការធ្វេីដំណេីរប្រជាពលរដ្ឋ ទៅមកកុំឲ្យកកស្ទះ  ពោលគឺត្រូវមានអ្នកបញ្ជាចរាចរនៅសងខាងការដ្ឋាននីមួយៗ  ធ្វេីយ៉ាងណាធានាសុវត្ថិភាព និងបញ្ចៀសគ្រោះថ្នាក់ ផងដែរ។

លោករដ្ឋលេខាធិការបានស្នើដូច្នេះ នៅរសៀល  ថ្ងៃទី២៥  ខែមីនា  ឆ្នាំ២០២៤  ក្នុងកិច្ចប្រជុំជាមួយ អភិបាលខេត្តកំពង់ចាម  និងជាមួយតំណាងក្រុមហ៊ុនទទួលម៉ៅការ  មន្ទីរអង្គភាពពាក់ព័ន្ធ  នឹងអាជ្ញាធរមូលដ្ឋាន។

លោក លីម  ស៉ីដេនីន  បានបញ្ជាក់ថា  ចំពោះបញ្ហាមានបណ្តឹងពីប្រជាពលរដ្ឋដែលសេសសល់  គឺក្រុមអនុគណៈកម្មាធិការខេត្តនឹងធ្វេីការងារដោះស្រាយជាមួយក្រសួងសេដ្ឋកិច្ចជាបន្តបន្ទា ប់។ អ្វីដែល ជាការងារចុះវឌ្ឍនភាពនេះ  គឺធ្វេីយ៉ាងណា  ក្រុមការងាររបស់ក្រុមហ៊ុនទទួលម៉ៅការ  ត្រូវពិនិត្យមេីលលេីគុណភាពការកិលបង្ហាប់គ្រឹះក្រោម នៃផ្លូវ  ចំណែកផ្នែកស្ពានវិញក្រុមការងារត្រូវពិនិត្យមេីលពន្លឿនកសាងជាបន្តបន្ទាប់។ លោក  លីម  ស៉ីដេនីន  ក៏បានជំរុញដល់ក្រុមហ៊ុនទទួលម៉ៅការសាងសង់ ផ្លូវជាតិ  រួមនឹងស្ពាន  ធ្វេីយ៉ាងរក្សាបច្ចេកទេសក្នុងគម្រោងឲ្យមានប្រសិទ្ធភាព  និងគុណភាពស្តង់ដាខ្ពស់។

តំណាងក្រុមហ៊ុន CRBC បានឱ្យដឹងថា យោងតាមការណែនាំចាប់ផ្ដើមការដ្ឋានសាងសង់របស់ក្រុមព្រឹក្សាត្រួតពិនិត្យបច្ចេកទេស គម្រោងចាប់គិតថ្ងៃសាងសង់ពីថ្ងៃទី១១ ខែមីនា ឆ្នាំ២០២៤ ដំណើរការសាងសង់ នៅការដ្ឋានរហូតមកដល់ពេលនេះ មានដូចជាការងារឈូសឆាយមួយចំហៀងមានប្រវែង ៣៨គ.ម សម្រេចបាន ៤១,៧៦% និងចាក់បំពេញផ្លូវបាន ២២,៥៩ ម៉ឺនម៉ែត្រកីប សម្រេចបាន១៦,៥៥%។ រីឯការងារសាងសង់ស្ពានសម្រេចគ្រឹះស្ពានចំនួន ៤៤ ដើម សម្រេចបាន ៧៣,៣៣% ក្បាលគ្រឹះស្ពាន ៨ សម្រេចបាន ៥០% និងតួរគ្រឹះស្ពានបានចំនួន ៥ សម្រេចបាន៣១,២៥%។ ការងារសាងសង់លូ គឺលូមូលសម្រេចបានចំនួន ២៨ កន្លែង (មួយចំហៀង) សម្រេចបាន២៦,៩២%។

គូសបញ្ជាក់ថា  គម្រោងពង្រីកលើកកម្ពស់កម្រិតគុណភាព ផ្លូវជាតិលេខ ៧ ជាបួនគន្លង (ស្គន់-កំពង់ចាម) ចំណុចចាប់ផ្ដើម ពីរង្វង់មូលស្គន់ ស្រុកជើងព្រៃ និងចំណុចបញ្ចប់នៅរង្វង់មូលត្រើយខាងលិចស្ពានគីហ្សូណា ក្រុងកំពង់ចាម ដែលមានប្រវែងសរុប ៤៥.៥០៤ គីឡូម៉ែត្រ៕

អត្ថបទ៖ ឡេក  ចាន់ពេជ្រ