ព័ត៌មានជាតិ

ពលករជិត ៥០០ នាក់ បានត្រឡប់ទៅធ្វើការនៅថៃតាមច្រកទ្វារព្រំដែនចាំយាម

បានផុស

២ years មុន

នៅ

ថ្ងៃអាទិត្យ ២១ មេសា ២០២៤

ដោយ

ប្រជាពលរដ្ឋខ្មែរជាពលករជិត ៥០០ នាក់ បានចាកចេញពីស្រុកកំណើតទៅធ្វើការនៅប្រទេសថៃវិញហើយ តាមច្រកទ្វារព្រំដែនអន្តរជាតិចាំយាម ស្រុកមណ្ឌលសីមា ក្រោយការជួបជុំសាច់ញាតិក្រុមគ្រួសារថ្ងៃពិធីបុណ្យចូលឆ្នាំថ្មីកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតចាប់ពីថ្ងៃទី ១៧ ដល់ថ្ងៃទី ២០ ខែមេសា ឆ្នាំ ២០២៤ មានពលករខ្មែរសរុបប្រមាណ ៤៨៨ នាក់ (ស្រី ២០៤ នាក់) ហើយ បានត្រឡប់ទៅបម្រើការងារនៅប្រទេសថៃ ដោយធ្វើដំណើរឆ្លងកាត់ច្រកទ្វារព្រំដែនអន្តរជាតិចាំយាម ខេត្តកោះកុង។

មន្ត្រីប្រចាំការទីស្នាក់ការត្រួតពិនិត្យច្រកទ្វារព្រំដែនអន្តរជាតិចាំយាម បានឱ្យកម្ពុជាថ្មីដឹងនៅរសៀលថ្ងៃទី ២១ ខែមេសា នេះថា ពលករខ្មែរដែលចេញទៅធ្វើការនៅថៃ ភាគច្រើនទៅត្រឹមខេត្តត្រាត និងខេត្តច័ន្ទបូរី ប្រទេសថៃ ដោយពួកគាត់បម្រើការងារទៅជំនាញរួមមាន ៖ ផ្នែកនេសាទ កសិកម្ម និងបម្រើការងារទេសចរណ៍នានា។

ក្រុមមន្ត្រីជំនាញនៅតំបន់ព្រំដែនចាំយាមដដែលអះអាងថា ក្រៅពីមានពលករខ្មែរចេញទៅថៃ ក៏មានពលករធ្វើដំណើរឆ្លងកាត់ព្រំដែនចាំយាមចូលមកកម្ពុជាផងដែរ គឺមានចំនួន ១១០ នាក់ និងស្ត្រី ៤៧ នាក់។ គ្រប់ពលករដែលចេញទៅធ្វើការងារនៅថៃ សុទ្ធតែត្រូវបានផ្តោតការយកចិត្តទុកដាក់ផ្តល់សេវាបំពេញបែបបទរដ្ឋបាលពីសំណាក់មន្ត្រីជំនាញពាក់ព័ន្ធឥតគិតថ្លៃអ្វីទាំងអស់ ជាពិសេសអប់រំណែនាំបន្ថែមពីការទៅធ្វើការនៅក្រៅប្រទេស ចាំបាច់ទៅដោយស្របច្បាប់ ជៀសវាងឆ្លងដែនខុសច្បាប់តាមមេខ្យល់ ឬក្រុមហ៊ុនគ្មានប្រភពច្បាស់លាស់។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា កាលពីថ្ងៃទី ៨ ខែកុម្ភៈ ឆ្នាំ ២០២៤ បានលើកឡើងថា រាជរដ្ឋាភិបាលកម្ពុជា និងថៃ បានសម្រេចមិនយកថ្លៃទិដ្ឋាការចេញ-ចូលប្រទេសថៃ (Re-Entry) ដើម្បីកាត់បន្ថយការចំណាយពលករខ្មែរ ដែលនឹងធ្វើដំណើរត្រលប់មកកម្ពុជា ក្នុងឱកាសពិធីបុណ្យចូលឆ្នាំខ្មែរប្រពៃណីជាតិ៕

អត្ថបទ ៖ សិរីវឌ្ឍនៈ