អភិបាលខេត្តរតនគិរី៖ ដើមឈើពិតជាមានសារៈសំខាន់ណាស់ចំពោះមនុស្ស និងសត្វ

លោក ញ៉ែម សំអឿន អភិបាលខេត្ត និងជាប្រធានសហភាពសហព័ន្ធយុវជនកម្ពុជា ខេត្តរតនគិរី បានថ្លែងថា ដើមឈើពិតជាមានសារៈសំខាន់ណាស់ចំពោះមនុស្ស និងសត្វ ពីព្រោះថា នៅក្នុងបរិស្ថាន ដើមឈើជួយឲ្យមានដំណើរការប្រព័ន្ធអេកូឡូស៊ី កាត់បន្ថយឥទ្ធិពលអវិជ្ជមាន នៃការប្រែប្រួលអាកាសធាតុ គ្រោះធម្មជាតិនានា ផ្តល់ជាម្លប់ និងស្រូបយកឧស្ម័នកាបូនិចពីបរិយាកាស និងផ្តល់ត្រឡប់មកវិញនូវអុកស៊ីសែនសម្រាប់មនុស្ស និងសត្វដកដង្ហើមជាដើម។

ការថ្លែងរបស់អភិបាលខេត្តរតនគិរីរូបនេះធ្វើឡើងនៅរសៀលថ្ងៃទី២ ខែមិថុនា ឆ្នាំ២០២៤ ក្នុងឱកាសលោកដឹកនាំកម្លាំងយុវជនសហភាពសហព័ន្ធយុវជនកម្ពុជាខេត្ត ប្រមាណ៨០នាក់ ដាំដើមដូង និងដើមក្ងោកជុំវិញរមណីយដ្ឋានមាត់បឹងកន្សែង។

ជាមួយគ្នានេះដែរ លោកអភិបាលខេត្ត មានសង្ឃឹមយ៉ាងមុតមាំថា ក្នុងថ្ងៃអនាគតដ៏ខ្លីខាងមុខនៅជុំវិញរមណីយដ្ឋាន បឹងកន្សែង ប្រែក្លាយជាកន្លែងមានពណ៌បៃតងស្រស់បំព្រង គួរជាទីទាក់ទាញ និងអាចក្លាយជាកន្លែងមួយល្អសម្រាប់ សម្រាកលំហែកាយ ស្រូបយកខ្យល់អាកាស បរិសុទ្ធបំបាត់អស់ភាព នឿយណាយ អារម្មណ៍តានតឹង និងជាកន្លែងសម្រាប់ធ្វើលំហាត់ប្រាណ របស់បងប្អូនប្រជាពលរដ្ឋ ក្នុងក្រុងបានលុងទាំងមូល។

លោកបានថ្លែងនូវការកោតសសើរ និងវាយតម្លៃ ខ្ពស់ ចំពោះអាជ្ញាធរក្រុង-សង្កាត់ និងកម្លាំង(ស.ស.យ.ក)ដែលបានចូលរួមព្រឹត្តិការណ៍ដាំកូនដូង និងកូនក្ងោកនាពេលនេះ និងត្រូវបន្តធ្វើកិច្ចការនេះតទៅទៀត ដើម្បីឲ្យរមណីដ្ឋានមូយនេះ ក៏ដូចជាក្រុងបានលុងមានពណ៌បៃតងស្រស់បំព្រង៕

អត្ថបទ៖ វុទ្ធឦសាន