ព័ត៌មានជាតិ

ក្រសួងមុខងារសាធារណៈ ប្រជុំពិនិត្យការថែទាំ និងធ្វើវឌ្ឍនភាពការងារបណ្ណសារដ្ឋានមន្ត្រីរាជការស៊ីវិល

បានផុស

២ years មុន

នៅ

ថ្ងៃអង្គារ ៤ មិថុនា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ បានដឹកនាំកិច្ចប្រជុំដើម្បីពិនិត្យលើវឌ្ឍនភាពការងារបណ្ណសារដ្ឋានមន្ត្រីរាជការស៊ីវិល នៅក្រសួងមុខងារសាធារណៈ កាលពីរសៀលថ្ងៃទី ០៣ ខែមិថុនា ឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំនេះ ធ្វើឡើងក្រោយការតាមដាន និងវាយតម្លៃលើបញ្ហាប្រឈមនានា ដែលក្រសួងមុខងារសាធារណៈបាន និងកំពុងជួបប្រទះ លើការរៀបចំ និងរក្សាទុកឯកសារនានា ជាពិសេសឯកសារសលាកបត្រផ្ទុកព័ត៌មានមន្ត្រីរាជការស៊ីវិលប្រមាណជិត ៣០០,០០០ ច្បាប់។

អង្គប្រជុំកាលពីម្សិលមិញនេះ សុទ្ធតែបានចូលរួមជាមតិយោបល់យ៉ាងផុលផុស ជាពិសេសការលើកឡើងជាដំណោះស្រាយចាំបាច់នានា ស្របតាមការវិវត្តន៍ នៃស្ថានភាពជាក់ស្ដែង ទាំងកត្តាសុវត្ថិភាព ការរក្សាទុក ការថែទាំ ការធ្វើបច្ចុប្បន្នភាព និងវឌ្ឍនភាពបណ្ណសារក្នុងបរិបទឌីជីថល។

ក្រោយស្តាប់ និងក្រោយបានអនុញ្ញាតឲ្យអង្គប្រជុំបានចូលរួមមតិយោបល់រួចមក ឯកឧត្ដមឧបនាយករដ្ឋមន្ត្រី បានផ្តល់ជាអនុសាសន៍ជាច្រើន ជាពិសេសធ្វើយ៉ាងណាបន្តការថែទាំឲ្យបានគត់មត់ តាមរយៈការយកចិត្តទុកដាក់លើកត្តាសុវត្ថិភាព និងតាមដានជួសជុល កែលម្អឧបករណ៍បច្ចេកទេស ជៀសវាងហានិភ័យនានាដែលអាចនឹងកើតមានឡើងជាយថាហេតុ។

ស្របពេលជាមួយគ្នានេះ ឯកឧត្ដមឧបនាយករដ្ឋមន្ត្រី ក៏បានអនុញ្ញាតឲ្យក្រុមការងារ បន្តការសិក្សា និងបន្តអភិវឌ្ឍន៍ប្រព័ន្ធបច្ចេកវិទ្យាទិន្នន័យមានស្រាប់ និងពិនិត្យលទ្ធភាពក្នុងការប្រើប្រាស់ឧបករណ៍បញ្ចូលទិន្នន័យនានាបន្ថែមទៀតដែលចាំបាច់ ហើយធានាដល់ប្រសិទ្ធភាព នៃការធ្វើបច្ចុប្បន្នភាព និងវឌ្ឍនភាពទិន្នន័យស្របតាមការវិវត្តន៍ នៃបរិបទឌីជីថល ក៏ដូចជាដើម្បីធានាដល់ភាពងាយស្រួលក្នុងការចូលពិនិត្យ និងស្វែងរកទិន្នន័យមន្ត្រីរាជការស៊ីវិល។

ក្រោយកិច្ចប្រជុំបានបញ្ចប់ ឯកឧត្ដមឧបនាយករដ្ឋមន្ត្រី បានអញ្ជើញពិនិត្យទីតាំងជាក់ស្ដែង នៃបណ្ណសារដ្ឋានរបស់ក្រសួងមុខងារសាធារណៈដោយផ្ទាល់ ដើម្បីឈ្វេងយល់នូវស្ថានភាព និងបញ្ហាប្រឈមជាក់ស្ដែង៕