ព័ត៌មានជាតិ

តំបន់ចាក់អង្រែក្រោមឆ្នាំនេះអាចកាត់បន្ថយការលិចលង់ដោយសារជីកដាក់លូហូទៅអូរស្ទឹងជ្រៅ(ស្ទឹងព្រែកត្នោត)

បានផុស

២ years មុន

នៅ

ថ្ងៃពុធ ២៦ មិថុនា ២០២៤

ដោយ

ភ្នំពេញ ៖ យោងតាមប្រសាសន៍លោក ជា សុខៃ ចៅសង្កាត់ចាក់អង្រែក្រោមបានឱ្យកម្ពុជាថ្មីដឹងនារសៀលថ្ងៃទី២៦ ខែមិថុនានេះថា នៅរដូវវស្សារឆ្នាំ២០២៤នេះ ក្នុងមូលដ្ឋានសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ អាចកាត់បន្ថយលិចលង់ដោយជំនន់ទឹកភ្លៀងបន្ទាប់ពីអាជ្ញាធរបានជីកប្រឡាយលូសម្រាប់បង្ហូរទឹកកាកសំណល់រួចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា សុខៃ បានបញ្ជាក់ប្រាប់កម្ពុជាថ្មី ខណៈដែលលោក ចៅសង្កាត់និងលោក សេង គន្ធ អភិបាលខណ្ឌមានជ័យចុះពិនិត្យមើលគ្រឿងចក្រកំពុងដាក់លូ ថា កាលពីអំឡុងចុងឆ្នាំ២០២៣ដើមឆ្នាំ២០២៤ នៅតំបន់ភូមិសាស្ត្រសង្កាត់ចាក់អង្រែក្រោមបានរងការលិចលង់ដោយជំនន់ទឹកភ្លៀងអស់រយៈពេលជាច្រើនថ្ងៃ បើទោះជាអាជ្ញាធរខិតខំយកគ្រឿងចក្រមកជីកប្រឡាយរំដោះទឹកចេញពីតំបន់លិចលង់ចូលទៅប្រឡាយសណ្តរឆ្ពោះទៅស្ទឹងព្រែកត្នោតក្នុងភូមិសាស្ត្រសង្កាត់ដើមមៀន ក្រុងតាខ្មៅ ខេត្តកណ្តាលយ៉ាងក៏នៅតែរងការលិចលង់ដដែល។

ប៉ុន្តែឆ្នាំនេះ គឺអាជ្ញាធររាជធានីភ្នំពេញបានសម្រេចជីកដាក់លូមុខកាត់២ម៉ែត្រមានប្រវ៉ែង១៦៥០ម៉ែត្រក្នុងទឹកដីសង្កាត់ចាក់អង្រែជាប់ផ្លូវ៦០ម៉ែត្រ ទម្លាក់ទៅអូរស្ទឹងជ្រៅបង្ហួសទៅស្ទឹងព្រែកត្នោតក្នុងភូមិសាស្ត្រ ខេត្តកណ្តាលបានរួចរាល់ គឺតំបន់ចាក់អង្រែក្រោមលែងលិចលង់ហើយ។

លោក ជា ស្ខៃ បានបន្ថែមថា ពីដើមមកភូមិសាស្ត្រសង្កាត់ចាក់អង្រែក្រោម ពុំដែលរងការលិចលង់នោះដោយសារពេលធ្លាក់ភ្លៀងម្តងៗ គឺទឹកបានហូរចូលទៅបឹងអស់។ លុះដល់មានកកើតជាបុរីព្រោងព្រាតមក ស្របពេលប្រព័ន្ធលូបង្ហូរកាកសំណល់ហូរមិនបានលឿន ទើបបង្កឱ្យរងការលិចលង់ទៅ។

ជាក់ស្តែងចុងឆ្នាំ២០២៣ដើមឆ្នាំ២០២៤ គឺក្នុងភូមិសាស្ត្រសង្កាត់ចាក់អង្រែក្រោម បានរងការលិចលង់ជាច្រើនថ្ងៃ ព្រោះទឹកហូរចូលលូមិនទាន់កម្លាំងជំនន់ទឹកភ្លៀង។ ដូច្នេះហើយទើបសាលារាជធានីភ្នំពេញសម្រេចជីកដាក់លូបង្ហូរទឹកខ្នាតធំចេញពីចាក់អង្រែក្រោម ចូលទៅស្ទឹងព្រែកត្នោតតែម្តងទៅ៕

ដោយ ៖ នរា