ចូលកាន់តំណែងភ្លាម អភិបាលខេត្តព្រះសីហនុចុះពិនិត្យរោងចក្រគ្រឿងបង្គំសូឡា​តម្លៃ ២០០ លាន​ដុល្លារ ជំរុញ​ការងារ​​សាងសង់​ឲ្យបានឆាប់

បន្ទាប់ពីប្រកាសចូលកាន់តំណែងជាអភិបាលខេត្តព្រះសីហនុកាលពីរសៀលម្សិលមិញភ្លាម នៅព្រឹកថ្ងៃទី ៤ ខែកក្កដា ឆ្នាំ២០២៤ លោក ម៉ាង ស៊ីណេត អភិបាលខេត្តព្រះសីហនុ បានដឹកនាំមន្ត្រីជំនាញបច្ចេកទេស មន្ទីរ អង្គភាពពាក់ព័ន្ធ និងអាជ្ញាធរស្រុកស្ទឹងហាវ ចុះពិនិត្យវឌ្ឍនភាពនៃការសាងសង់រោងចក្រផលិតគ្រឿងបង្គំសូឡា នៅភូមិ៤ សង្កាត់អូរត្រេះ ស្រុកស្ទឹងហាវ ខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសចុះពិនិត្យមើលការដ្ឋានសំណងនេះដែរ លោក Li Xiao Bo តំណាងក្រុមហ៊ុន Jingying PV-Tech (Cambodia) បាន​ឲ្យ​ដឹងថា ក្រុមហ៊ុនចាប់ផ្តើមសាងសង់រោងចក្រ​លើផ្ទៃដីទំហំ ៧៥ ០០០ ម៉ែត្រការ៉ ក្នុងនោះផ្ទៃអគារមានទំហំ ៦០ ០០០ ម៉ែត្រការ៉េ។

ការសាងសង់ បែងចែកជាពីរដំណាក់កាល។ ដំណាក់កាលទី១ ការសាងសង់អគារដែលនឹង​ត្រូវបញ្ចប់នៅក្នុងខែកក្កដា ដំណាក់កាលទីពីរ ក្រុមហ៊ុននឹង​ចាប់ផ្តើមតំឡើងគ្រឿងម៉ាស៊ីនឲ្យ​បានរួចរាល់នៅខែធ្នូ និងចាប់ផ្តើមដំណើរការផលិតកម្ម។

សម្រាប់ដំណើរការខ្សែ​សង្វាក់​ផលិតកម្ម ក្រុមហ៊ុនត្រូវការកម្លាំងពលកម្មប្រមាណជាង ៥០០ នាក់ ហើយការផលិតគ្រឿងបង្គំផ្ទាំងសូឡាសម្រាប់​នាំទៅកាន់បរទេស មានដូចជាប្រទេសអាមេរិក ជាមួយ​ទឹកប្រាក់សរុបនៃការវិនិយោគប្រហែល ២០០ លានដុល្លារអាមេរិក។

នៅក្នុងឱកាស​ចុះ​ទស្សនកិច្ច​ពិនិត្យ​រោងចក្រ​ក្រុមហ៊ុន Jingying PV-Tech (Cambodia) លោក ម៉ាង ស៊ីណេត អភិបាលខេត្តព្រះសីហនុបានធ្វើការណែនាំដល់ក្រុមហ៊ុន ឱ្យធ្វើការសាងសង់ឱ្យបានលឿនឆាប់ ហើយអាជ្ញាធរខេត្តនឹង​ជួយសម្របសម្រួលដើម្បីឱ្យដំណើការសាងសង់ប្រព្រឹត្តទៅដោយរលូន។

លោកអភិបាលខេត្តក៏បានធ្វើការណែនាំដល់មន្ត្រីគយ និងរដ្ឋាករជួយពន្លឿនក្នុងការសម្របសម្រួលឯកសារ ដើម្បីដឹកជញ្ជូនសម្ភារគ្រឿងបង្គំ​ឲ្យ​បានលឿន ព្រោះគ្រឿងបង្គំដំឡើងរោងចក្រផលិតគ្រឿងបង្គំសូឡា នឹង​មកដល់កំពង់ផែស្វយ័តក្រុងព្រះសីហនុបនៅថ្ងៃទី៧ ខែកក្កដា ខាងមុខនេះ ហើយនឹង​មកដល់ជាបន្តបន្ទាប់បន្ថែមទៀតនៅសប្តាហ៍ក្រោយ ដើម្បីការរៀបចំតំឡើងចង្វាក់ផលិតកម្មបានសំរេចតាមការគ្រោងទុក៕

អត្ថបទ៖ ស៊ុយ ចាន់ធា