ឆ្លើយតបបញ្ហាកុមារឆ្លងទឹកស្ទឹងកំពុងហូរ ដើម្បីទៅរៀន ខេត្តកំពង់ចាម ស្នើក្រសួងជួយសង់ស្ពានឆ្លងស្ទឹងឆ្វេង ស្រុកបាធាយ

បន្ទាប់ពីគណនីហ្វេសប៊ុកឈ្មោះ​ Chhoeun Chheak បង្ហោះសារត្អូញត្អែពីផលលំបាករបស់កុមារ ក្នុងការឆ្លងស្ទឹងដែលទឹកកំពុងឡើង និងសុំឱ្យសប្បុរសជនជួយសាងសង់ស្ពានឆ្លងស្ទឹងឆ្វេង ដែលស្ថិតនៅ ភូមិស្ទឹងឆ្វេង ឃុំច្បារអំពៅ ស្រុកបាធាយ ខេត្តកំពង់ចាម ភ្លាមៗលោក ស្រី សុភ័ក្រ្ត អ្នកនាំពាក្យរដ្ឋបាលខេត្តកំពង់ចាម ក៏បានចូលទៅបញ្ចេញមតិក្នុងការបង្ហោះនោះភ្ជាប់ជាមួយដំណោះស្រាយចំនួន៣ បន្ទាន់។​ ក្នុងនោះលោក ស្រី សុភ័ក្រ្ត ក៏បានឱ្យដឹងថា រដ្ឋបាលខេត្តកំពង់ចាម បានស្នើក្រសួងសាធារណការ និងដឹកជញ្ជូន ឱ្យជួយសង់ស្ពានឆ្លងស្ទឹងឆ្វេង នាថ្ងៃអនាគត។

ម្ចាស់គណនីហ្វេសប៊ុកឈ្មោះ​ Chhoeun Chheak បង្ហោះនូវខ្លឹមសារត្អូញត្អែថា៖​ «បញ្ហាដល់រដូវទឹកឡើង ទៀតហើយ សិស្សមានភាពពិបាកក្នុងការមកសាលារៀន ដូចច្នេះហើយខ្ញុំសូមអំពាវនា(អំពាវនាវ) ដល់ ថ្នាក់ដឹកនាំ ឬ សប្បុរសជន មេត្ដាជួយធ្វើស្ពានឲ្យផង »។

ក្រោយពីទទួលបានព័ត៌មានភ្លាម​ លោក​ ស្រី​ សុភ័ក្រ្ត​ អ្នកនាំពាក្យ​សាលាខេត្ត​កំពង់ចាម​ បានឆ្លើយតបភ្លាមៗដែរ​ ដោយបានលើងឡើងពីវិធានការចំនួន៣ ដែលរដ្ឋបាលខេត្តបានដាក់ចេញ ដូចជា ទី១) រដ្ឋបាលខេត្តកំពង់ចាមផ្អាកការធ្វើដំណើរថ្មើរជើងឆ្លងកាត់ទំនប់បង្ហៀរនៅចំណុចស្ទឹងឆ្វេងនេះសិន ព្រោះទឹកហូរខ្លាំង។ ទី២)ជាដំណោះស្រាយចំពោះមុខ រដ្ឋបាលស្រុកកងមាស និងស្រុកបាធាយ នឹងរៀបចំទូកដរចម្លងសម្រាប់សិស្សសាលា ដោយការចម្លងនេះ មិនយកថវិកាឡើយ និងទី៣)រដ្ឋបាលខេត្តកំពង់ចាម បានរៀបចំសំណើរជូនក្រសួងសាធារណការនិងដឹកជញ្ជូន ដើម្បីសាងសង់ស្ពាននៅចំណុចស្ទឹងឆ្វេងនេះ​នាថ្ងៃអនាគត។

គួរឱ្យដឹងថាទំបន់អាងស្តុកទឹកនេះ​ មានឈ្មោះថាទំបន់ស្ទឹងឆ្វេង បង្កឡេីងដោយសារជំនន់ទឹកភ្លៀងធ្លាក់រហូតទេីបមានទឹកហូរកាត់នៅតំបន់នេះ​ ដែលធ្វេីការឲ្យធ្វេីដំណេីររបស់ប្រជាពលរដ្ឋ​ រួមនឹងសិស្សានុសិស្សពិបាកធ្វេីដំណេីរឆ្លងកាត់​។ គូសបញ្ជាក់ផងដែរថា​ ទំបន់ស្ទឹងឆ្វេង ស្ថិតក្នុងជាប់ស្រុកចំនួនបីរួមមាន៖​ ស្រុកបាធាយ​ ស្រុកជេីងព្រៃ​ និងស្រុកកងមាស​ ខេត្តកំពង់ចាម​៕

​អត្ថបទ​៖ ឡេក​ ចាន់ពេជ្រ​