ជាឃោសនិកមួយរូបត្រូវស្វែងយល់ និងឆ្លើយតបឲ្យទាន់ពេលវេលាចំពោះពត៌មានក្លែងក្លាយ

លោក ឃួង ស្រេង សមាជិកគណៈកម្មាធិការកណ្តាល និងជាប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញបានលើកឡើង​ថា ក្នុងនាមជាឃោសនិកមួយរូបអស់លោក លោកស្រីត្រូវស្វែងយល់ និងឆ្លើយតបឲ្យបានទាន់ពេលវេលា​ចំពោះពត៌មានក្លែងក្លាយ,ញ៉ុះញ៉ុង វាយប្រហាររាជរដ្ឋាភិបាលស្របច្បាប់ និងវាយបក​ឲ្យ​ទាន់ពេលវេលាចំពោះក្រុមជនអគតិ ដែលតែងតែចិញ្ចឹមចិត្តបំផ្លាញសេចក្តីសុខសាន្តរបស់ប្រជាជន និងដំណើរការអភិវឌ្ឍន៏របស់ប្រទេសជាតិពិសេសក្នុងបរិបទ Digital នេះ។

ប្រធានគណបក្សរាជធានីភ្នំពេញមានប្រសាសន៏ក្នុងពិធីបិទវគ្គអប់រំនយោបាយ នៅមន្ទីរបក្សរាជធានីភ្នំពេញជំនាន់ទី​៥៤ នាព្រឹកថ្ងៃទី២០ កក្កដា ឆ្នាំ២០២៤ ដែលមានសមាជិក សមាជិកាចូលរួមចំនួន ១៣៣ នាក់ដោយគូសបញ្ជាក់ថាអស់​លោក លោកស្រី សុទ្ធតែជាឃោសនិករបស់គណបក្សប្រជាជនកម្ពុជា ដូច្នេះត្រូវស្វែងយល់​ឲ្យ​បានស៊ីជម្រៅពីគោលនយោបាយរបស់គណបក្ស ដែលជាកំលាំងនយោបាយតែមួយគត់ ដែលតែងតែរួមសុខរួមទុក្ខជាមួយប្រជាជនគ្រប់កាលៈទេសៈ​។

លោកឃួង ស្រេង បានក្រើនរំលឹកដល់សមាជិក សមាជិកាទាំងអស់ពីវីរៈភាពដ៏មានតំលៃគ្មាន​ពីរ​របស់សម្តេចអគ្គមហាសេនាបតីតេជោហ៊ុន សែន អតីតនាយករដ្ឋមន្ត្រីអាណត្តិទី៦ បច្ចុប្បន្នជាប្រធានព្រឹទ្ធសភា និងជាប្រធានគណបក្សប្រជាជនកម្ពុជា ដែលបានយកជីវិតធ្វើ​ដើមទុនប្តូរយកសុខសន្តិភាព និងការអភិវឌ្ឍន៏ជូនជាតិនិងប្រជាជនគ្រប់ដំណាក់កាល​នៃដំណើរការវិវឌ្ឍន៏រីកចម្រើន​របស់ប្រទេសជាតិ។

ពេលនេះរាជរដ្ឋាភិបាលដែលដឹកនាំ ដោយសម្តេចមហាវរធិបតី ហ៊ុន ម៉ាណែត ជានាយករដ្ឋមន្ត្រីកំពុងបន្តតាមលំអាននៃការរក្សាសុខសន្តិភាព និងការអភិវឌ្ឍន៏ក្នុងនាមជាយុវជនជំនាន់ក្រោយ ដែលពោរពេញដោយភាពស្វាហាប់,មានចំណេះដឹង និងមានការប្តេជ្ញាចិត្តខ្ពស់​តាមរយះការដាក់ចេញនូវកម្មវិធីនយោបាយបញ្ចកោណ ដែលជាត្រីវិស័យក្នុងការដឹកនាំអភិវឌ្ឍន៏។

លោក ឃួង ស្រេង មានប្រសាសន៏ទៀតថា ជាទូទៅបណ្តាប្រទេសលើលោក គោលនយោបាយផ្តើមចេញ​ពី​គោលនយោបាយរបស់គណបក្សដែលឈ្នះឆ្នោត ហើយនយោបាយរបស់ប្រទេសមួយមិនអាចយកនយោបាយរបស់ប្រទេសមួយផ្សេងទៀត​មកធ្វើតាមដូចចាក់ពុម្ពនោះបានដែរ។ បងប្អូនអាចមើលឃើញហើយ ពីមហិច្ឆតាចង់បានអំណាចពួកអមិត្រ ឬក្រុមប្រឆាំងគេហ៊ានធ្វើអ្វីៗគ្រប់ទម្រង់។ យ៉ាងណាមិញដូចក្នុងដំណាក់កាលការរីករាលដាលជំងឺកូវីដ.១៩ គេអំពាវនាវកុំ​ឲ្យ​ប្រជាជនទៅចាក់វ៉ាក់សាំងចិន ព្រោះជាវ៉ាក់សាំងគេយកមកពិសោធន៏ យកមកសម្លាប់ប្រជាជនជាដើម។មានន័យថា គេយកជីវិតប្រជាពលរដ្ឋមកលេងសើចមកធ្វើជំនួញនយោបាយដោយអគតិបំផុត។

លោក ឃួង ស្រេង បានរំលេចឲ្យឃើញពីការរីកចម្រើន​ក្រោមការដឹកនាំរបស់សម្តេចមហាវរធិបតី ហ៊ុន ម៉ាណែត ជានាយករដ្ឋមន្ត្រីក្នុងរយះពេល ៩ ខែដើមអាណត្តិទី៧កន្លងមកនេះ គឺទទួលបានការវិវឌ្ឍន៏រីកចម្រើន​លើគ្រប់វិស័យនិងមានការសារទរជាអន្តរជាតិក៏ដូចក្នុងមជ្ឈដ្ឋានជាតិទាំងមូល៕

អត្ថបទ៖ ស្រីរ័ត្ន