បញ្ជានាយករដ្ឋមន្ត្រី៖ ក្មេងទំនើងបង្ហោះម៉ូតូ ត្រូវឃាត់ទុកម៉ូតូ ៣ខែ បើមិនរាង ឃាត់ទុក ៦ខែ

ជាវិធានការចំពោះក្រុមក្មេងទំនើងបង្ហោះម៉ូតូតាមដងផ្លូវសាធារណៈ សម្ដេច ហ៊ុន ម៉ាណែត បានបញ្ជាឱ្យសមត្ថកិច្ចចាប់ឃាត់ទុកម៉ូតូ៣ខែ តែបើមិនរាងចាល ត្រូវឃាត់ទុកម៉ូតូ៦ខែ។ បទបញ្ជារបស់នាយករដ្ឋមន្ត្រីពេលនេះ គឺបន្ទាប់ពីសង្កេតឃើញថា ក្រុមក្មេងទំនើងកាប់ចាក់ ក្រុមដាវសាំម៉ូរៃ ពិសេសថ្មីៗនេះ ក្មេងទំនើងបង្ហោះម៉ូតូតាមទីសាធារណៈ នៅតែបន្តមាន បើទោះបីជាមានការបង្ក្រាបច្រើនក៏ដោយ។

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាទៅកាន់អាជ្ញាធរគ្រប់ជាន់ថា្នក់ ក៏ដូចជាកម្លាំងសមត្ថកិច្ចទាំងអស់ឱ្យបន្តអនុវត្តការបង្ក្រាបក្រុមក្មេងទំនើងកាប់ចាក់ ក្រុមដាវសាំម៉ូរៃ និងសង្កត់ឱ្យធ្ងន់លើក្មេងទំនើងបង្ហោះម៉ូតូតាម ដងផ្លូវឱ្យបានជាប់ជាប្រចាំដូចភ្លៀងរលឹម ដោយមិនត្រូវដកដៃជាដាច់ខាត ដើម្បីចូលរួមធានាបាននូវការថែរក្សាសន្តិសុខ សណ្ដាប់ធ្នាប់សាធារណៈនៅក្នុងសង្គម។

តាមរយៈសារសំឡេងពិសេសទៅកាន់គណៈអភិបាលរាជធានី-ខេត្ត ពិសេសកងកម្លាំងសមត្ថកិច្ច សម្ដេចធិបតី បានថ្លែងឱ្យដឹងថា កន្លងមក អាជ្ញាធររាជធានី-ខេត្ត រួមទាំងកងកម្លាំងសមត្ថកិច្ច បានចេញអនុវត្តវិធានការរដ្ឋបាលជាច្រើន ក៏ប៉ុន្តែប្រសិទ្ធភាពនៅមានកម្រិត។ ដូច្នេះ ដើម្បីបង្កើនប្រសិទ្ធភាពក្នុងការអនុវត្តការបង្ក្រាបក្រុមក្មេងទំនើងបង្ហោះម៉ូតូ សម្ដេចធិបតី នាយករដ្ឋមន្ត្រី បានបញ្ជាឱ្យអាជ្ញាធររាជធានី-ខេត្ត ពិសេសកងកម្លាំងមានសមត្ថកិច្ចត្រូវបង្កើនការចាត់វិធានការក្ដៅបន្ថែមទៀត តាមរយៈវិធានការរដ្ឋបាល​ក្នុងការឃាត់ម៉ូតូក្នុងរយៈពេល ៣ខែ សម្រាប់ការប្រព្រឹត្តបទល្មើសលើកទី១ និង៦ ខែ ប្រសិនមិនរាងចាល នៅតែបន្តប្រព្រឹត្តបទល្មើសនេះ។

ជាមួយនឹងបទបញ្ជានេះ សម្ដេចនាយករដ្ឋមន្ត្រី ក៏ណែនាំអាជ្ញាធរមានសមត្ថកិច្ចត្រូវមានការរក្សាទុកម៉ូតូដែលដកហូតឱ្យល្អ ហើយធ្វើលិខិតក្នុងការធានាប្រគល់-ទទួលម៉ូតូឱ្យបានត្រឹមត្រូវនៅពេលវិធានការរដ្ឋបាលនេះ ត្រូវបានបញ្ចប់។ សម្ដេចនាយករដ្ឋមន្ត្រី សង្ឃឹមថា វិធានការថ្មីនេះ នឹងចូលរួមការបង្ក្រាបក្មេងទំនើងបង្ហោះម៉ូតូកាន់តែមានប្រសិទ្ធភាព និងកាត់បន្ថយសកម្មភាពបង្ហោះម៉ូតូ ក៏ដូចជាចូលរួមការរក្សាបានសណ្ដាប់ធ្នាប់សាធារណៈ ពិសេសការធានាបានហានិភ័យនៃគ្រោះថ្នាក់ចរចរណ៍ ដែលបង្កឡើងដោយការបង្ហោះម៉ូតូនេះ។

សម្ដេចធិបតី ក៏សុំការយោគយល់ពីឪពុកម្ដាយ និងអាណាព្យាបាលផងដែរ នៅពេលសមត្ថកិច្ចអនុវត្តវិធានការនេះ ហើយត្រូវចូលរួមអប់រំទូន្មានកូនចៅកុំឱ្យប្រព្រឹត្តទង្វើដែលប៉ះពាល់ដល់សណ្ដាប់ធ្នាប់ឱ្យសោះ៕