ឆ្នាំ ២០២៥ ប្រកាសយុទ្ធនការ កម្ពុជាស្អាត គ្មានសំរាមប្លាស្ទិកតាមដងផ្លូវ

រដ្ឋមន្ត្រី​ អ៊ាង សុផល្លែត បាន​ប្រកាស​ដាក់​ចេញ​យុទ្ធនាការ​ ​កម្ពុជាស្អាត គ្មាន​សំរាមប្លាស្ទិក​នៅតាមផ្លូវក្នុងឆ្នាំ២០២៥។ ការ​ឱ្យ​ដឹង​បែប​នេះ ក្នុង​ឱកាសលោក​រដ្មមន្រ្តី​ចុះ​​ជួប​សំណេះសំណាល និងសួរសុខទុក្ខមន្រ្តីរាជការនៅ​មន្ទីរបរិស្ថានខេត្តរតនគិរី នៅថ្ងៃទី ៣១ ខែកក្កដា ឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈគម្រោងនេះ ក្រសួងជំរុញឱ្យមានការប្រឡងប្រណាំងរបស់អាជ្ញាធររាជធានី និងខេត្តនានា ដើម្បីចូលរួមបំផុសគំនិតស្អាត គ្មានសំរាមប្លាស្ទិកនៅតាមផ្លូវក្នុងឆ្នាំ២០២៥។

«ខេត្តណាដែល​មិនមានសំរាមប្លាស្ទិកនៅតាមផ្លូវ នឹង​ទទួលបានរង្វាន់លើកទឹកចិត្ត​ពីក្រសួងបរិស្ថាន​»។ លោក អ៊ាង សុផល្លែត​ បាន​បញ្ជាក់យ៉ាង​ដូច្នេះ។

លោក​រដ្ឋមន្រ្តី បានសម្តែងនូវការសាទរចំពោះកិច្ចខិតខំប្រឹងប្រែង របស់ថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ សំណាក់សិស្សានុសិស្ស ប្រជាពលរដ្ឋ ព្រះសង្ឃ និងអាជ្ញាធរមូលដ្ឋានគ្រប់លំដាប់ថ្នាក់ ចូលរួមយុទ្ធនាការការកាត់បន្ថយការប្រើប្រាស់ប្លាស្ទិកនៅក្នុងរាជធានី ខេត្តទូទាំងប្រទេស គឺផ្តើមចេញពីការចូលរួមប្តេជ្ញាចិត្ត និងការចូលរួមធ្វើសកម្មភាពសម្អាតអនាម័យបរិស្ថាន និងចូលរួមប្លាស្ទិកយ៉ាងផុសផុល។

តាមរយៈយុទ្ធនាការ “ថ្ងៃនេះ ខ្ញុំមិនប្រើថង់ប្លាស្ទិក” របស់ក្រសួងបរិស្ថានក្រោមការ​ដឹកនាំ​ដោយ​លោក អ៊ាង សុផល្លែត មានប្រជាពលរដ្ឋជាង ៨,៧ លាននាក់ហើយបានចូលរួមនៅក្នុងយុទ្ធនាការ និងបានធ្វើឱ្យកម្ពុជាស្អាតមិនមានសំរាមប្លាស្ទិក។ ទន្ទឹមនឹងនេះក៏បានកាត់បន្ថយការនាំចូលថង់ប្លាស្ទិកប្រមាណជាង ៧០% នៅដើមឆ្នាំ២០២៤៕