ក្រសួងអប់រំ បញ្ចប់បណ្ដុះបណ្ដាល អក្ខរកម្មឌីជីថល ដល់ ១០ វិទ្យាល័យ នៅសៀមរាប

លោក វង ភិរុណ អនុរដ្ឋលេខាធិការ ក្រសួងអប់រំ យុវជន និងកីឡា បានអញ្ជើញជាអធិបតីភាព កម្មវិធីបិទសិក្ខាសាលា ស្តីពី អក្ខរកម្មឌីជីថល នៅវិទ្យាល័យអង្គរ ខេត្តសៀមរាប ដោយមានការចូលរួមពីសិស្សានុសិស្ស ទាំងចូលរួមផ្ទាល់ និងតាមប្រព័ន្ធអនឡាញ ចំនួន ៣២៩ នាក់ ស្រី ២០៤ នាក់ មកពីវិទ្យាល័យចំនួន ១០ ក្នុងខេត្តសៀមរាប។

សិក្ខាសាលានេះ ត្រូវបានរៀបចំឡើងដោយ នាយកដ្ឋានអភិវឌ្ឍកម្មវិធីយុវជន នៃអគ្គនាយកដ្ឋានយុវជន ក្រសួងអប់រំ យុវជន និងកីឡា ចាប់ពីថ្ងៃទី២ ដល់ថ្ងៃទី៤ ខែសីហា ឆ្នាំ២០២៤ ក្នុងគោលបំណងជួយយុវជនឱ្យយល់ដឹងពីរបៀបប្រើប្រាស់ឧបករណ៍ឌីជីថលមាឱ្យមានប្រសិទ្ធិភាព វិធីសាស្ត្រការពារហានិភ័យលើប្រព័ន្ធអនឡាញ ឈ្វេងយល់ពីអ្វីដែលជាពលរដ្ឋឌីជីថលប្រកបដោយការទទួលខុសត្រូវ បច្ចេកទេសថតរូប សរសេរសាច់រឿង និងចេះបង្កើតវីដេអូរអប់រំខ្លី សម្រាប់ចែករំលែកតាមប្រព័ន្ធអនឡាញ។

ដោយមានការសហការរៀបចំ ពីក្រុមហ៊ុន SmartAxiata ព្រមទាំងឧបត្ថម្ភគាំទ្រដោយ មូលនិធិ ស.អ. របស់ក្រសួងប្រៃសនីយ៍ និងទូរគមនាគមន៍ និងគាំទ្របច្ចេកទេសពី ក្រុមហ៊ុន TikTok និងនិស្សិតស្ម័គ្រចិត្ត កម្មវិធីនេះត្រូវបានពង្រឹងគុណភាពជារៀងរាល់ឆ្នាំ និងផ្តល់ឱកាសឱ្យសិស្សនៅសាលាឆ្ងាយៗបានចូលរួមសិក្ខាសាលាតាមប្រព័ន្ធ Zoom ព្រមទាំងផ្តល់ឱកាសឱ្យសិស្សទាំងអស់ធ្វើការជាក្រុម ក្នុងការផលិតវីដេអូអប់រំខ្លី ស្តីពី អក្ខរកម្មឌីជីថល ដើម្បីផ្សព្វផ្សាយ និងចូលរួមប្រកួតយកជ័យលាភីពីក្រុមហ៊ុនស្មាត៕