រដ្ឋមន្ត្រីមហាផ្ទៃ រម្លឹកកងកម្លាំងកុំមើលស្រាលផែនការទុច្ចរិតរបស់ក្រុមប្រឆាំងក្រៅច្បាប់

ប្រមុខក្រសួងមហាផ្ទៃ លោក ស សុខា បានក្រើនរម្លឹកអាជ្ញាធរ និងកងកម្លាំង កុំមើលស្រាលសភាពការណ៍ក្នុងសង្គម ពិសេសផែនការទុច្ចរិតរបស់ក្រុមប្រឆាំងជ្រុលនិយមក្រៅច្បាប់ ដែលព្យាយាមបង្កាត់ភ្លើង បង្កភាពវឹកវរដល់ជាតិ។

លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានលើកយកករណីប៉ុនប៉ងធ្វើកុបកម្មរបស់ក្រុមប្រឆាំងជ្រុលនិយម កាលពីថ្ងៃទី១៨ ខែសីហា កន្លងមក មកពន្យល់ដោយបដិសេធចំៗចំពោះការលើកឡើងពីបុគ្គលមួយចំនួនដែលទៅដើរនិយាយថា រាជរដ្ឋាភិបាលហាក់ដូចជាត្រៀមលក្ខណៈជ្រុលហួសហេតុពេកចំពោះព្រឹត្តិការណ៍នេះ។ ឆ្លើយតបនឹងការលើកឡើងនេះ លោកឧបនាយករដ្ឋមន្ត្រី ស​ សុខា ថា ការមើលស្រាលសភាពការណ៍ នឹងផ្ដល់លទ្ធផលអាក្រក់ មិនខុសពីអ្វីដែលបាននឹងកំពុងកើតឡើងនៅប្រទេសបង់ក្លាដេសនោះទេ។

លោកឧបនាយករដ្ឋមន្រ្តី បន្ថែមថា ព្រឹត្តិការណ៍ ១៨ សីហា ក្រុមជ្រុលនិយម បានបង្វែពីការធ្វើបាតុកម្មជំទាស់កិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម ទៅជាការបំផុសចលនាផ្ដួលលរំលំរាជរដ្ឋាភិបាលស្របច្បាប់ ដោយផ្សព្វផ្សាយឱ្យយុវជន និងអ្នកមាននិន្នាការមិនពេញរាជរដ្ឋាភិបាល ធ្វើដំណើរមកជួបជុំគ្នានៅរាជធានីភ្នំពេញ រហូតមានមនុស្សមួយចំនួនតូច ត្រូវសមត្ថកិច្ចចាប់ខ្លួន និងរកឃើញភស្តុតាង ដូចជា អាវុធកែច្នៃ ដបសាំង និងបណ្ដាញទំនាក់ទំនងធ្វើសកម្មភាព។

ការលើកឡើងរបស់លោកប្រមុខក្រសួងមហាផ្ទៃខាងលើ ធ្វើឡើងនៅក្នុងពិធីសំណេះសំណាលនិងផ្ដល់អំណោយលើកទឹកចិត្តដល់កម្លាំងនគរបាលជាតិ នៃស្នងការដ្ឋាននគរបាលខេត្តព្រៃវែង កាលពីថ្ងៃទី២៥ ខែសីហា ឆ្នាំ២០២៤។ លោកប្រមុខក្រសួងមហាផ្ទៃ បានថ្លែងអំណរគុណអាជ្ញាធរ និងកងកម្លាំងនៃរដ្ឋបាលខេត្តព្រៃវែង ដែលបានអនុវត្តផែនការការពារសន្តិសុខបានយ៉ាងល្អប្រសើរ រួមចំណែកជាមួយរាជរដ្ឋាភិបាល ទប់ស្កាត់ដោយជោគជ័យ ការប៉ុនប៉ងធ្វើកុបកម្មរបស់ក្រុមជ្រុលនិយម៕