ដើម្បី​ចុះបញ្ជី​អាជីវកម្ម​តាមថ្នាល​បច្ចេកវិទ្យា តម្រូវការ​ឯកសារអ្វីខ្លះ?

កម្ពុជា​បានដាក់​ឲ្យ​អនុវត្ត​ការ​ចុះ​បញ្ជី​អាជីវកម្ម​តាម​ថ្នាល​បច្ចេកវិទ្យា ដើម្បី​សម្រួល​ឲ្យ​​មាន​ភាព​រលូន​ កាត់​បន្ថយ​នីតិវិធី​ស្មុគស្មាញ​។

ការ​ចុះ​បញ្ជី​អាជីវកម្ម​តាម​ប្រព័ន្ធ​បច្ចេកវិទ្យា ជួយ​​ដល់​ម្ចាស់​អាជីវកម្ម​អាច​ចុះ​បញ្ជី​អាជីវកម្ម​ក្នុង​ពេល​តែ​មួយ​នៅ​លើ​ប្រព័ន្ធ​បច្ចេកវិទ្យា​ព័ត៌មាន​តែ​មួយ​ ដែល​ចំណេញពេល​វេលា​និងប្រកប​​ដោយ​ប្រសិទ្ធភាពខ្ពស់​​។

សៀវភៅ​មគ្គុទ្ទេសក៍​ដំណើរការ​ចុះ​បញ្ជី​អាជីវកម្ម​តាម​ប្រព័ន្ធ​បច្ចេកវិទ្យា​ព័ត៌មាន ដែល​ចេញផ្សាយ​ដោយ​ក្រសួង​សេដ្ឋកិច្ច​និង​ហិរញ្ញវត្ថុ​នៅ​ឆ្នាំ ២០២៣ បាន​បង្ហាញ​ពី​នីតិវិធី​នៃ​ដំណើរការ​ចុះ​បញ្ជី​អាជីវកម្ម​តាម​ប្រព័ន្ធ​បច្ចេកវិទ្យា តាំង​ពី​ដំណាក់​កាល​ដំបូង​រហូត​ដល់​ដំណាក់​កាល​ចុងក្រោយ​។

ពាក់ព័ន្ធ​ដំណើរការ​ចុះ​អាជីវកម្ម​តាម​ថ្នាល​បច្ចេកវិទ្យា តម្រូវ​ឲ្យ​ម្ចាស់​អាជីវកម្ម​ភ្ជាប់​ឯកសារ​ចាំបាច់​មួយ​ចំនួន​អាស្រ័យ​តាម​ប្រភេទ​អាជីវកម្ម ដូចជា​ប្រភេទ​ក្រុមហ៊ុន​មូល​ធន ក្រុមហ៊ុន​បរទេស​ សហគ្រាស​ឯក​បុគ្គល និង​ក្រុមហ៊ុន​សហកម្មសិទ្ធិ​ជាដើម។

ខាងក្រោម​ជា​ឯកសារ​ចាំបាច់​សម្រាប់​ការ​ចុះ​បញ្ជី​តាម​ថ្នាល​បច្ចេកវិទ្យា ដែល​បែងចែក​តាម​ប្រភេទ​ក្រុមហ៊ុន​អាជីវកម្ម។

១/ សម្រាប់ក្រុមហ៊ុនមូលធន

ក. ការចុះបញ្ជី​ពាណិជ្ជកម្ម​ត្រូវការ​ឯកសារ​ដូច​ខាង​ក្រោម៖

-ប័ណ្ណ​កម្មសិទ្ធិ​កាន់កាប់​ទីតាំង ឬ​កិច្ចសន្យា​ជួល​ទីតាំង​ប្រកបអាជីវកម្ម
-រូបថត​បច្ចុប្បន្ន​មិន​លើស​ពី​រយៈពេល ០៣ ខែ និង​មាន​ផ្ទៃ​ខាងក្រោយ​ពណ៌ស​របស់​អភិបាល, ម្ចាស់​ហ៊ុន (ករណី​ម្ចាស់​ហ៊ុនជា​រូបវន្តបុគ្គល) និង/ឬ អ្នកតំណាង (ករណី​ម្ចាស់​ហ៊ុន​ជា​នីតិ​បុគ្គល)
-ឯកសារ​អត្តសញ្ញាណប័ណ្ណ​របស់​អភិបាល, ម្ចាស់​ហ៊ុន (ករណី​ម្ចាស់ហ៊ុន​ជារូបវន្តបុគ្គល) និង/ឬ អ្នក​តំណាង (ករណី​ម្ចាស់ហ៊ុនជានីតិបុគ្គល)
-លក្ខន្តិកៈ​ក្រុមហ៊ុន
-ឯកសារយោង (អាច​ជា​លិខិត​អនុញ្ញាត​ប្រើប្រាស់​នាម​ករណ៍​របស់​ក្រុមហ៊ុន​ចាស់ អាជ្ញា​បណ្ណ និង​ឯកសារ​ពាក់ព័ន្ធ​ផ្សេងៗ​ទៀត)
-ករណី​ម្ចាស់ហ៊ុន​ជានីតិបុគ្គល (លិខិត​ប្រគល់​សិទ្ធិពីក្រុមហ៊ុនមេ, វិញ្ញាបនបត្រ​ក្រុមហ៊ុនមេ, លក្ខន្តិកៈ​ក្រុមហ៊ុនមេ)
-លិខិត​ប្រគល់សិទ្ធិ ករណី​អ្នកតំណាង​ជាអ្នកបំពេញ​ពាក្យស្នើសុំ

ខ. ការចុះបញ្ជីពន្ធដារ ត្រូវការឯកសារដូចខាងក្រោម៖

-លិខិត​បញ្ជាក់ការ​បង់ប្រាក់​ពន្ធអចលនទ្រព្យ ឬ​ព័ត៌មាន​អចលនទ្រព្យ​របស់​សហគ្រាស
-ករណី​ក្រុមហ៊ុន​ទទួល​បាន​គម្រោង​វិនិយោគ​មាន​លក្ខណៈសម្បត្តិ​គ្រប់គ្រាន់ (QIP)
-ព័ត៌មាន​អំពី​គណនី​ធនាគារ (ត្រូវ​ផ្ដល់​ក្នុង​រយៈពេល ១៥ ថ្ងៃ​នៃថ្ងៃធ្វើការ បន្ទាប់ពី​ទទួល​បាន​ការ​ចុះបញ្ជី​ពន្ធដារ​តាម​ទម្រង់​ឌីជីថល។ ក្នុង​ករណី​ខកខាន​មិនបាន​ផ្ដល់​ព័ត៌មាន ការផ្ដល់​ការ​ចុះ​បញ្ជី​ពន្ធដារ​ ត្រូវបានដកហូតដោយស្វ័យប្រវត្តិ

២/ សម្រាប់ក្រុមហ៊ុនបរទេស

ក. ការចុះបញ្ជីពាណិជ្ជកម្ម​ត្រូវការឯកសារ​ដូចខាងក្រោម៖

-ប័ណ្ណ​កម្មសិទ្ធិ​កាន់កាប់​ទីតាំង ឬកិច្ចសន្យា​ជួល​ទីតាំង​ប្រកប​អាជីវកម្ម
– រូបថត​បច្ចុប្បន្ន​មិន​លើស​ពី​រយៈពេល ០៣ ខែ និង​មាន​ផ្ទៃ​ខាង​ក្រោយ​ពណ៌​ស​របស់​នាយក -ឯកសារ​អត្តសញ្ញាណប័ណ្ណ​របស់នាយក
-លក្ខន្តិកៈ​ក្រុមហ៊ុន​មេ
-វិញ្ញាបនបត្រ​ក្រុមហ៊ុន​មេ
-លិខិត​ប្រគល់​សិទ្ធិ​តែងតាំង​នាយកការិយាល័យ​តំណាង ឬ​នាយក​សាខា
-ឯកសារយោង (អាច​ជាលិខិតអនុញ្ញាត​ប្រើប្រាស់​នាមករណ៍​របស់​ក្រុមហ៊ុន​ចាស់ អាជ្ញាបណ្ណ​ផ្សេងៗ​ចេញ​ដោយ​ក្រសួង-ស្ថាប័ន​ជំនាញ និង​ឯកសារ​ពាក់ព័ន្ធផ្សេងៗ​ទៀត)
-លិខិត​ប្រគល់សិទ្ធិ ករណីអ្នកតំណាងជាអ្នកបំពេញពាក្យស្នើសុំ

ខ. ការចុះ​បញ្ជីពន្ធដារ ត្រូវការឯកសារដូចខាងក្រោម៖

-លិខិត​បញ្ជាក់ការ​បង់ប្រាក់​ពន្ធ​អចលនទ្រព្យ ឬ​ព័ត៌មាន​អចលនទ្រព្យ​របស់​សហគ្រាស
-ករណី​ក្រុមហ៊ុនទទួល​បានគម្រោង​វិនិយោគ​មាន​លក្ខណៈសម្បត្តិគ្រប់គ្រាន់ (QIP)
-ព័ត៌មាន​អំពីគណនី​ធនាគារ (ត្រូវផ្ដល់ក្នុងរយៈពេល ១៥ ថ្ងៃនៃថ្ងៃធ្វើការ បន្ទាប់ពីបានការ ទទួល​ការ​ចុះ​បញ្ជី​ពន្ធដារតាម​ទម្រង់ឌីជីថល។ ក្នុងករណី​ខកខានមិនបានផ្ដល់ព័ត៌មាននេះ ការផ្ដល់​ការ​ចុះបញ្ជី​ពន្ធដារ​ត្រូវបានដកហូតដោយស្វ័យប្រវត្តិ

៣/ សម្រាប់សហគ្រាសឯកបុគ្គល

ក. ការចុះបញ្ជីពាណិជ្ជកម្មត្រូវការឯកសារដូចខាងក្រោម៖

-ប័ណ្ណកម្មសិទ្ធិកាន់កាប់​ទីតាំង ឬកិច្ចសន្យាជួលទីតាំងប្រកបអាជីវកម្ម
-រូបថត​បច្ចុប្បន្ន​មិនលើសពីរយៈ​ពេល ០៣ ខែ និង​មាន​ផ្ទៃខាង​ក្រោយ​ពណ៌ស​របស់​ម្ចាស់​សហគ្រាស
-ឯកសារ​អត្តសញ្ញាណប័ណ្ណ​របស់ម្ចាស់សហគ្រាស
-ឯកសារយោង (អាចជា​លិខិតអនុញ្ញាត​ប្រើប្រាស់នាមករណ៍​របស់​ក្រុមហ៊ុន​ចាស់ អាជ្ញាបណ្ណ ផ្សេងៗ​ចេញ​ដោយ​ក្រសួង-ស្ថាប័នជំនាញ និង​ឯកសារពាក់ព័ន្ធផ្សេងៗទៀត)
-លិខិត​ប្រគល់សិទ្ធិករណីអ្នកតំណាង​ជាអ្នកបំពេញពាក្យស្នើសុំ

ខ. ការចុះបញ្ជីពន្ធដារត្រូវការឯកសារដូចខាងក្រោម៖

-លិខិត​បញ្ជាក់ការ​បង់ប្រាក់ពន្ធ​អចលនទ្រព្យ ឬ​ព័ត៌មាន​អចលនទ្រព្យ​របស់​សហគ្រាស
-ករណី​ក្រុមហ៊ុន​ទទួលបានគម្រោងវិនិយោគមានលក្ខណៈសម្បត្តិគ្រប់គ្រាន់ (QIP)
-ព័ត៌មាន​អំពីគណនី​ធនាគារ (ត្រូវផ្ដល់ក្នុងរយៈពេល ១៥ ថ្ងៃនៃថ្ងៃ​ធ្វើការ បន្ទាប់​ពី​ទទួល​បាន​ការ​ចុះបញ្ជី​ពន្ធដារ​តាម​ទម្រង់ឌីជីថល។ ក្នុងករណី​ខកខានមិនបានផ្ដល់ព័ត៌មាន​ ការផ្តល់​ការចុះបញ្ជី​ពន្ធដារ​ត្រូវបាន​ដកហូត​ដោយស្វ័យប្រវត្តិ

៤/ សម្រាប់​ក្រុមហ៊ុន​សហកម្មសិទ្ធិ

ក. ការចុះបញ្ជីពាណិជ្ជកម្ម​ត្រូវការឯកសារដូចខាងក្រោម៖

-ប័ណ្ណកម្មសិទ្ធិកាន់កាប់​ទីតាំង ឬកិច្ចសន្យា​ជួល​ទីតាំង​ប្រកប​អាជីវកម្ម
– រូបថត​បច្ចុប្បន្នមិនលើសពីរយៈពេល ០៣ ខែ និង​មានផ្ទៃខាងក្រោយ​ពណ៌ស​របស់​អ្នកគ្រប់គ្រង, សហកម្មសិទ្ធករ (ករណី​សហកម្មសិទ្ធករ​ជារូបវន្ត​បុគ្គល) និង/ឬ អ្នកតំណាង (ករណី​សហកម្ម​សិទ្ធករ​ជា​នីតិបុគ្គល)
-ឯកសារអត្តសញ្ញាណ​ប័ណ្ណរបស់​អ្នកគ្រប់គ្រង, សហកម្មសិទ្ធករ (ករណី​សហកម្មសិទ្ធករ ជា​រូបវន្ត​បុគ្គល) និង/ឬ អ្នកតំណាង (ករណី​សហកម្មសិទ្ធករជានីតិបុគ្គល)
-កិច្ចសន្យា​នៃក្រុមហ៊ុន​សហកម្មសិទ្ធិ
-ឯកសារយោង (អាចជាលិខិតអនុញ្ញាតប្រើប្រាស់​នាមករណ៍របស់​ក្រុមហ៊ុនចាស់ អាជ្ញាបណ្ណ​ផ្សេងៗ​ចេញ​ដោយក្រសួង-ស្ថាប័ន​ជំនាញ និងឯកសារពាក់ព័ន្ធផ្សេងៗ​ទៀត)
-ករណីសហកម្មសិទ្ធករជានីតិបុគ្គល (លិខិត​ប្រគល់សិទ្ធិ​ពីក្រុមហ៊ុនមេ, វិញ្ញាបនបត្រក្រុមហ៊ុនមេ ​និង​លក្ខន្តិកៈក្រុមហ៊ុនមេ)
-លិខិតប្រគល់សិទ្ធិ ករណីអ្នកតំណាងជាអ្នកបំពេញពាក្យស្នើសុំ

ខ. ការចុះបញ្ជីពន្ធដារត្រូវការឯកសារដូចខាងក្រោម៖

-លិខិត​បញ្ជាក់ការបង់ប្រាក់ពន្ធ​អចលនទ្រព្យ ឬព័ត៌មាន​អចលនទ្រព្យរបស់សហគ្រាស
-ករណីក្រុមហ៊ុន​ទទួលបានគម្រោងវិនិយោគមានលក្ខណៈសម្បត្តិគ្រប់គ្រាន់ (QIP)
-ព័ត៌មាន​អំពីគណនី​ធនាគារ (ត្រូវផ្ដល់​ក្នុងរយៈពេល ១៥ ថ្ងៃនៃ​ថ្ងៃធ្វើការ បន្ទាប់ពី​ទទួល​បាន​ការ​ចុះ​បញ្ជី​ពន្ធដារ​តាមទម្រង់​ឌីជីថល។ ក្នុងករណីខកខាន​មិនបានផ្ដល់ព័ត៌មាន ការ​ផ្តល់​ការចុះបញ្ជី​ពន្ធដារ​ត្រូវ​បាន​ដកហូត​ដោយស្វ័យប្រវត្តិ។)

រាល់​ឯកសារ​ភ្ជាប់ទាំងអស់នេះ ត្រូវ​ស្ថិត​ក្នុង​ទម្រង់ pdf។ រីឯ​រូបថត​ត្រូវ​ស្ថិត​ក្នុង​ទម្រង់ jpg ឬ jpeg ដែល​ស្កេន​ពី​ច្បាប់​ដើម ហើយ​មាន​គុណភាព​ល្អ។

ការ​ផ្តល់​ឯកសារ​ឬព័ត៌មាន​មិន​​គ្រប់គ្រាន់ ក្នុងពេល​ចុះ​បញ្ជីអាជីវកម្ម​តាម​ប្រព័ន្ធ​បច្ចេកវិទ្យា​ព័ត៌មាន​ អាច​នឹង​ប្រឈមការបដិសេធលើ​សំណើ​ចុះបញ្ជី​។ ក្នុងករណីនេះ រាល់ការ​ចំណាយ​ដែល​បាន​ធ្វើឡើង​លើ​ប្រព័ន្ធ​នឹង​មិនមាន​ការ​ធានាចំពោះ​ការប្រគល់ប្រាក់ជូនវិញ​នោះទេ។

សម្រាប់ការស្នើសុំចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ធុរជនអាចចូលទៅកាន់គេហទំព័រ www.registrationservices.gov.kh ដែលជាគេហទំព័រប្រមូលផ្ដុំសេវាទាំងអស់។ ដោយមានការផ្លាស់ប្ដូរទិន្នន័យតាមរយៈថ្នាល CamDX, ធុរជនដែលបានចុះបញ្ជីអាជីវកម្មក្រោយថ្ងៃទី ១៥ ខែ មិថុនា ឆ្នាំ ២០២០ នៅក្នុងថ្នាលបច្ចេកវិទ្យាព័ត៌មានដំណាក់កាលទី ១ (Single Portal) នឹងមិនចាំបាច់វាយបញ្ចូលព័ត៌មានដែលធ្លាប់បានវាយបញ្ចូលហើយក្នុងប្រព័ន្ធ Single Portal ទៀតទេ នៅពេលស្នើសុំសេវាផ្សេងទៀត ក្នុងថ្នាលបច្ចេកវិទ្យាព័ត៌មាន ក្នុងដំណាក់កាលទី ២, ទី ៣ និងដំណាក់កាលបន្តបន្ទាប់ទៀត។ ធុរជនគ្រាន់តែវាយបញ្ចូលលេខសម្គាល់អត្តសញ្ញាណ​សហគ្រាស (Single ID) នោះព័ត៌មានដែលធ្លាប់ចុះបញ្ជីពីមុននឹងបង្ហាញលើពាក្យស្នើសុំដោយស្វ័យប្រវត្តិ៕