២ឆ្នាំ មន្ត្រីបានផ្តល់សៀវភៅស្នាក់នៅថ្មីដល់ពលរដ្ឋជាង១០ម៉ឺនក្បាល និងបំបែកសៀវភៅគ្រួសារជាង៤ម៉ឺនក្បាល

ក្នុងរយៈពេល២ឆ្នាំ ដោយគិតចាប់ពីឆ្នាំ២០២២ ដល់ឆ្នាំ២០២៤ មន្រ្តីអគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ បានផ្ដល់សៀវភៅស្នាក់នៅជូនប្រជាពលរដ្ឋនៅទូទាំងប្រទេសបានចំនួនជាង ១០ម៉ឺនក្បាល និងបំបែកសៀវភៅគ្រួសារថ្មីចំនួនជាង ៤ម៉ឺនក្បាល។ នេះបើតាមលោក ទូច សុខៈ អ្នកនាំពាក្យរងក្រសួងមហាផ្ទៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្ដល់ជូនសៀវភៅស្នាក់នៅ និងសៀវភៅគ្រួសារដល់ប្រជាពលរដ្ឋនេះ លោក ទូច សុខៈ បានឱ្យដឹងថា បើយោងតាមរបាយការណ៏របស់នាយកដ្ឋានអត្តសញ្ញាណ បានផ្តល់សៀវភៅស្នាក់នៅថ្មីចំនួន១៣២ ៥១២ក្បាល បានបំបែកសៀវភៅគ្រួសារថ្មីចំនួន៤៣ ៧៤៤ក្បាល និងទុតិយតា១១៦ ៦៩៩ក្បាល ផ្តល់សៀវភៅគ្រួសារថ្មីចំនួន១០០ ០៤៩ក្បាល បំបែកសៀវភៅគ្រួសារថ្មីចំនួន ៣៣ ៧៨៦ក្បាល ធ្វើទុតិយតាចំនួន៨៧ ៧៨៥ក្បាល ។ បើគិតមកដល់ពេលបច្ចុប្បន្ននេះ ការផ្តល់សៀវភៅស្នាក់នៅបានចំនួន ៣ ៣៩៨ ៨៥៧ក្បាល ធ្វើទុតិយតាចំនួន ៧០៩ ៦៣៧ក្បាល និងផ្តល់សៀវភៅគ្រួសារសរុប ៣ ៣៩៨,៨៥៧ក្បាល ទុតិយតាចំនួន ៤៤២,០០៨ក្បាល។

លោក ទូច សុខៈ បានបញ្ជាក់ទៀតថា ចំពោះការបញ្ចូលទិន្ន័យចុះបញ្ជីទៅក្នុងប្រព័ន្ធកុំព្យូទ័រ ក្នុងនោះរួមមាន ខេត្តកែប កំពត និង១៤សង្កាត់នៃរាជធានីភ្នំពេញ រួមមាន សៀវភៅស្នាក់នៅចំនួន ៣,៧៦៧គ្រួសារ មានមនុស្ស ១៥,៧៩៦នាក់ ស្រី៨,០៣០នាក់។ សៀវភៅគ្រួសារចំនួន ១,១១៥គ្រួសារ មានមនុស្ស ៤,៤៧០នាក់ ស្រី២,៣០២នាក់។ បើបូកយោង គិតត្រឹមថ្ងៃទី១៨ ខែសីហា ឆ្នាំ២០២៤ ការបញ្ចូលសៀវភៅស្នាក់នៅក្នុងប្រព័ន្ធបានចំនួន១៦,៧៦៣គ្រួសារ និងសៀវភៅគ្រួសារបានចំនួន ៦,៧៧០គ្រួសារ។

លោក ថា ដោយអនុវត្តតាមយុទ្ធសាស្រ្តបញ្ចកោណរបស់រាជរដ្ឋាភិបាល គឺលោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមមហាផ្ទៃ បានលើកកម្ពស់គុណភាពសេវាសាធារណៈ គឺជាអាទិភាពមួយក្នុងចំណោមទិសដៅអាទិភាពទាំង៦ ដែលត្រូវអនុវត្តពីដើមនីតិកាលទី៧ ស្របតាមទស្សនៈ អ្វីៗធ្វើដើម្បីផ្ដល់ភាពកក់ក្ដៅជូនប្រជាពលរដ្ឋ៕