ព័ត៌មានជាតិ
ឃុំ-សង្កាត់ចំនួន៥០០ទៀត ត្រៀមដាក់ឱ្យដំណើរការចុះបញ្ជីអត្រានុកូលដ្ឋានតាមប្រព័ន្ធ
អគ្គនាយកដ្ឋានអត្តសញ្ញាណកម្ម កំពុងសិក្សាលើកសំណើដាក់ឃុំ-សង្កាត់ ដែលមានលក្ខណសម្បត្តិគ្រប់គ្រាន់ចំនួន ៥០០ឃុំ-សង្កាត់ទៀត ដើម្បីដាក់ឱ្យដំណើរការយន្តការច្រកចេញចូលតែមួយសេវាអត្តសញ្ញាណកម្ម និងការចុះបញ្ជីអត្រានុកូលដ្ឋានតាមប្រព័ន្ធនៅថ្នាក់ឃុំ-សង្កាត់។ នេះបើតាមលោកបណ្ឌិត តុប នេត អគ្គនាយកអគ្គនាយកដ្ឋានអត្តសញ្ញាណកម្ម។
ថ្លែងក្នុងកិច្ចប្រជុំសាមញ្ញលើកទី៨ នៃគណៈកម្មការដឹកនាំតម្រង់ទិសការងារអត្រានុកូដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម កាលពីថ្ងៃទី១៨ ខែមីនា ឆ្នាំ២០២៤ លោកបណ្ឌិត តុប នេត បានរម្លឹកថា ក្នុងដំណើការធ្វើទំនើបកម្មប្រព័ន្ធចុះបញ្ជីអត្រានុកូលដ្ឋាន ក្រោមការចង្អុលដឹកនាំ និងជំរុញពីសំណាក់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ គឺអគ្គនាយកដ្ឋានអត្តសញ្ញាណកម្ម បានសហការជាមួយអគ្គនាយកដ្ឋានបច្ចេកទេសសុខាភិបាល នៃក្រសួងសុខាភិបាល និងវិទ្យាស្ថានជាតិស្ថិតិ នៃក្រសួងផែនការ ព្រមទាំងសាលារាជធានីភ្នំពេញ ដាក់ឱ្យអនុវត្តសាកល្បងប្រព័ន្ធចុះបញ្ជីអត្រានុកូលដ្ឋាន តាមរយៈការជូនដំណឹងពីមូលដ្ឋានសុខាភិបាល នៅមូលដ្ឋានសុខាភិបាលចំនួន១៣ ក្នុងសង្កាត់គោលដៅចំនួន៦ នៃខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី១ ខែវិច្ឆិកា ឆ្នាំ២០២៣។
ការសាកល្បងនេះ រួមបញ្ចូលទាំងការចុះបញ្ជីកំណើត បញ្ជីមរណភាព ការចុះបញ្ជីអាពាហ៍ពិពាហ៍ និងការផ្តល់លេខកូដ សម្គាល់អត្តសញ្ញាណបុគ្គល (UIC) ដល់ទារកដែលទើបកើត។ លេខកូដសម្គាល់អត្តសញ្ញាណបុគ្គល (UIC) នឹងត្រូវផ្តល់ដល់បុគ្គលគ្រប់រូប ដើម្បីប្រើប្រាស់ពេញមួយជីវិតពីកើតរហូតដល់ស្លាប់។ យន្តការនេះ គឺមូលដ្ឋានសុខាភិបាលអាច ជូនដំណឹងអំពីព្រឹត្តិការណ៍នៃកំណើតរស់ មរណភាព និងមូលហេតុនៃមរណភាព ទៅកាន់ប្រព័ន្ធចុះបញ្ជីអត្រានុកូលដ្ឋាន របស់អគ្គនាយកដ្ឋានអត្តសញ្ញាណកម្ម ដែលបំពាក់នៅសង្កាត់គោលដៅ។
ដើម្បីលើកកម្ពស់ការផ្ដល់សេវាសាធារណៈជូនប្រជាពលរដ្ឋ លោកបណ្ឌិត តុប នេត បានឱ្យដឹងទៀតថា នៅខែឧសភា ឆ្នាំ២០២១ ក្រសួងមហាផ្ទៃ បានសម្រេចបង្កើតយន្ដការច្រកចេញចូលតែមួយសេវាអត្តសញ្ញាណកម្មនៅ២៤ឃុំ-សង្កាត់ ក្នុងជំហានបឋម រួមមាន ឃុំ-សង្កាត់៥ ក្នុងខេត្តកែប សង្កាត់៥ ក្នុងក្រុងកំពត និងសង្កាត់១៤ ក្នុងខណ្ឌទាំង១៤ នៅរាជធានីភ្នំពេញ ដើម្បីផ្ដល់សេវាចុះបញ្ជីអត្រានុកូលដ្ឋាន សេវាចុះបញ្ជីស្នាក់នៅ និងសេវាការចុះបញ្ជីអត្តសញ្ញាណប័ណ្ណសញ្ជាតិខ្មែរ។
លោក ថា យន្តការនេះបានដំណើរការដោយជោគជ័យ និងទទួលនូវការគាំទ្រយ៉ាងខ្លាំងក្លាពីប្រជាពលរដ្ឋ។ ចំណុចស្នូល ដែលទទួលបានការសាទរពីប្រជាពលរដ្ឋ គឺពួកគាត់ទទួលបានដំណោះស្រាយសេវាទាំងអស់នៅកន្លែងតែមួយ (ច្រកចេញចូលតែមួយ) ងាយស្រួល និងឆាប់រហ័ស ជាពិសេសការបោះពុម្ពផ្តល់សំបុត្រអត្រានុកូលដ្ឋាន និងសៀវភៅស្នាក់នៅ អាចធ្វើឡើងដោយផ្ទាល់ចេញពីប្រព័ន្ធ ជូនទៅប្រជាពលរដ្ឋតែម្តងក្រោយបំពេញបែបបទគ្រប់គ្រាន់។
សូមបញ្ជាក់ថា ឆ្នាំ២០២៣ គឺជាឆ្នាំទី៧ នៃការអនុវត្តផែនការយុទ្ធសាស្រ្តជាតិស្តីពីអត្តសញ្ញាណកម្ម ២០១៧-២០២៦។ កិច្ចប្រជុំ បានពិនិត្យលទ្ធផលការងារសំខាន់ៗដែលសម្រេចបានក្នុងឆ្នាំ២០២៣ ដូចជា ការរៀបចំច្បាប់ និងលិខិតបទដ្ឋានគតិយុត្ត ការចុះបញ្ជីប្រជាជនតាមបច្ចេកវិទ្យាឌីជីថល និងការរៀបចំប្រព័ន្ធរួមអត្តសញ្ញាណប្រជាជន ការងារពង្រឹងយន្ដការសេវាអត្តសញ្ញាណកម្មសម្រាប់ប្រជាពលរដ្ឋ ការវាយតម្លៃរួមលើការអនុវត្តផែនការយុទ្ធសាស្ត្រ បញ្ហាប្រឈម ទិសដៅ និងសំណូមពរ៕
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ