ក្រសួងព័ត៌មានរៀបចំសិក្ខាសាលាផ្សព្វផ្សាយវិធានការគ្រប់គ្រងការផ្សាយផលិតផលគ្រឿងស្រវឹង

នៅព្រឹកថ្ងៃទី១០ ខែតុលា ឆ្នាំ២០២៤ ក្រសួងព័ត៌មាន ក្នុងនាមជាប្រធានក្រុមការងារគ្រប់គ្រងការផ្សព្វផ្សាយគ្រឿងស្រវឹង និងក្រុមហ៊ុន អិម អេស អេ ម៉ាឃីតធីង សីលូសិន អេស៊ា (MSA) បានសហការរៀបចំសិក្ខាសាលាផ្សព្វផ្សាយស្តីពី «វិធានការគ្រប់គ្រងការផ្សព្វផ្សាយពាណិជ្ជកម្មគ្រឿងស្រវឹង និងអនុវត្តគោលការណ៍ ឆន្ទៈល្អ»។

សិក្ខាសាលានេះប្រព្រឹត្តទៅក្រោមអធិបតីភាពលោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងារគ្រប់គ្រងការផ្សព្វផ្សាយគ្រឿងស្រវឹង (ក.គ.ផ.ស) នៅសណ្ឋាគារសុខាភ្នំពេញ ព្រមទាំងមានមានការចូលរួមពីភាគីពាក់ព័ន្ធទាំងរដ្ឋ និងវិស័យឯកជនប្រមាណជាង១ពាន់នាក់។

សិក្ខាសាលាផ្សព្វផ្សាយនូវប្រកាសស្តីពីការកំណត់អំពីបែបបទ នីតិវិធី និងវិធានការក្នុងការគ្រប់គ្រងការផ្សព្វផ្សាយពាណិជ្ជកម្មផលិតផលគ្រឿងស្រវឹង និងអនុវត្តគោលការណ៍ឆន្ទៈល្អ ដែលរៀបចំឡើងពេលនេះ គឺដើម្បីធានាបានសណ្តាប់ធ្នាប់សង្គម សុខមាលភាពសាធារណៈ កាត់បន្ថយផលប៉ះពាល់ផ្នែកសេដ្ឋកិច្ច វប្បធម៌ ប្រពៃណីជាតិ និងជំរុញឱ្យមានការប្រកួតប្រជែងប្រកបដោយសុចរិត៕

អត្ថបទ៖ គេន ម៉ាលិះ