អភិបាលខេត្តកំពង់ចាម បន្តចែកស្រូវពូជជូនពលរដ្ឋ ៨៣គ្រួសារ នៅឃុំទួលព្រះឃ្លាំង ស្រុកស្ទឹងត្រង់

នៅថ្ងៃទី២៧ ខែតុលា ឆ្នាំ២០២៤ អភិបាលខេត្តកំពង់ចាម លោក អ៊ុន ចាន់ដា បានដឹកនាំក្រុមការងារ បន្តចែកពូជស្រូវដែលជាអំណោយរបស់រាជរដ្ឋាភិបាលផ្ដល់ជូនប្រជាពលរដ្ឋ ៨៣គ្រួសារ នៅឃុំទួលព្រះឃ្លាំង ស្រុកស្ទឹងត្រង់ ក្នុងមួយគ្រួសារ ទទួលបានស្រូវពូជទម្ងន់ ១០០គីឡូក្រាម ដែលដំណាំស្រូវរបស់ពួកគាត់រងគ្រោះដោយទឹកជំនន់។

ក្នុងឱកាសសំណេះសំណាលជាមួយប្រជាពលរដ្ឋ លោកអភិបាលខេត្តកំពង់ចាម បានមានប្រសាសន៍ថា រាជរដ្ឋាភិបាលដែលមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី សម្តេចតែងតែគិតគូរដល់សុខទុក្ខប្រជាពលរដ្ឋ ពោលគឺ សម្តេច តែងគិតអំពីគោលការណ៍រក្សាឱ្យបាននូវសន្តិសុខស្បៀង ដើម្បីជួយដល់គ្រួសាររងគ្រោះ ដោយសារគ្រោះមហន្តរាយ ដែលធ្វើឱ្យប៉ះពាល់ធ្ងន់ធ្ងរដល់ជីវភាពប្រចាំថ្ងៃ។ លើសពីនេះ ប្រមុខរាជរដ្ឋាភិបាល ក៏បានគិតគូរអំពីការជួសជុលហេដ្ឋារចនាសម្ព័ន្ធផ្លូវថ្នល់ជាដើម ដើម្បីរក្សាឱ្យពលរដ្ឋធ្វើដំណើរបានដូចមុនៗ។

ជាពិសេស គឺស្រុកស្ទឹងត្រង់នេះ ដែលល្បីខាងបាក់ច្រាំងទន្លេ។ ដូច្នេះនៅពេលទឹកស្រកអស់ រដ្ឋាភិបាល នឹងចាប់ផ្ដើមរៀបចំក្រុមការងារបច្ចេកទេស ដែលមានក្រសួងធនធានទឹក និងឧតុនិយម ចុះមកធ្វើការជួសជុលច្រាំងទន្លេជូនប្រជាពលរដ្ឋដើម្បីឱ្យមានផ្លូវធ្វើដំណើរបានស្រួលឡើងវិញផងដែរ។ នេះបើតាមការគូសបញ្ជាក់បន្ថែមរបស់ លោកអភិបាលខេត្តកំពង់ចាម៕