ពលរដ្ឋក្នុងស្រុកចំនួនពីរនៃខេត្តព្រះសីហនុ រកចំណូលបានជាង២៣លានរៀលពីការចាប់សត្វកណ្ដុរក្នុងចម្ការដូងប្រេងឧកញ៉ា ម៉ុង ឬទ្ធី

ក្នុងរយៈពេល១០ខែ ក្នុងឆ្នាំ២០២៤ ប្រជាពលរដ្ឋរស់នៅក្នុងស្រុកព្រៃនប់ និងស្រុកកំពង់សីលា ខេត្តព្រសីហនុ អាចរកចំណូលបានប្រមាណ២៣លានរៀល ពីការដាក់​អង្គប់ចាប់សត្វកណ្ដុរនៅក្នុងចម្ការដូងប្រេងរបស់លោកឧកញ៉ា ម៉ុង ឬទ្ធី យកទៅលក់ក្នុងទីផ្សារវៀតណាម។ ការរកចំណូលពីការចាប់សត្វកណ្ដុរនេះ បន្ទាប់ពីលោកឧកញ៉ា ម៉ុង ឬទ្ធី បំផុសឲ្យប្រជាពលរដ្ឋទាំងពីរស្រុកនាំគ្នាដាក់អង្គប់ចាប់សត្វកណ្ដុរ ក្រោយពីលោកឧកញ៉ា​សម្លឹង​ឃើញ​ទីផ្សារ​សត្វកណ្តុរ​នៅប្រទេស​វៀតណាម​មានតម្លៃខ្ពស់ និងដោយសារសត្វកណ្ដុរទាំងនេះបានស៊ីបំផ្លាញផលដំណាំដូងប្រេងរបស់លោក។

តាមរយៈសំណេរនៅលើទំព័រហ្វេសប៊ុកផ្លូវការរបស់លោកឧកញ៉ាបណ្ឌិត ម៉ុង ឬទ្ធី អគ្គនាយកក្រុមហ៊ុន ម៉ុង ឬទ្ធី គ្រុប កាលពីថ្ងៃទី២៩តុលាម្សិលមិញនេះ បានសរសេររៀបរាប់ពីការបើកដំណើរការការដ្ឋានដាំដំណាំដូងប្រេងដំបូងកាលពី​២៧ឆ្នាំមុន នៅលើទឹកដី​ខេត្ត​ព្រះសីហនុ​ ដោយលោកឧកញ៉ាបានលើកឡើងថា ដោយ​សម្លឹងមើល​ឃើញ​ទីផ្សារ​សត្វកណ្តុរ​នៅប្រទេស​វៀតណាមមានតម្លៃខ្ពស់ និងដើម្បីទប់ស្កាត់ពីការស៊ីបំផ្លាញផលដំណាំដូងប្រេងពីសត្វកណ្ដុរផងនោះ លោកក៏បានបំផុសអោយ​ប្រជាពលរដ្ឋរស់នៅក្នុង​ស្រុកព្រៃនប់​ និងស្រុក​កំពង់​សីលា​ ខេត្តព្រះសីហនុ នាំគ្នាមកដាក់​អង្គប់ចាប់សត្វកណ្ដុរដើម្បីបានចំណូលបន្ថែម។

បើតាមលោកឧកញ៉ា ម៉ុង ឬទ្ធី តម្លៃកណ្ដុរដែលប្រទេសវៀតណាមហ៊ានទទួលទិញ គឺចាប់ពី៥០០០រៀល ទៅ៨០០០​រៀល ក្នុង១គីឡូក្រាម ហើយរយៈពេល១០ខែក្នុងឆ្នាំ២០២៤នេះ ប្រជាពលរដ្ឋទាំងពីរស្រុកអាចចាប់សត្វកណ្ដុរបានប្រមាណ ២៨,៧៨៨គីឡូក្រាម​​ គិតជាប្រាក់​លក់បាន​ប្រមាណជា​ង ២៣ លានរៀល​។

សូមបញ្ជាក់ថា បើតាមការលើកឡើងរបស់លោកឧកញ៉ា ម៉ុង ឬទ្ធី មុនឈានដល់ការជំរុញឲ្យពលរដ្ឋចាប់សត្វកណ្ដុរលក់ឲ្យទីផ្សារវៀតណាមនេះ ក្រុមហ៊ុនរបស់លោកបាន​រកគ្រប់​វិធីសាស្ត្រដើម្បីទប់ស្កាត់ពីការស៊ីបំផ្លាញផលសំណាំដូងប្រេងពីសត្វកណ្ដុរដូចជា ចិញ្ចឹម​សត្វ​ទីទុយ​ មៀម​ ហា​មមិនអោយ​កម្មករចាប់សត្វពស់​ធ្វើជា​អាហារ​ ដើម្បី​អោយសត្វ​ទាំងអស់​នោះ​ជួយចាប់​សត្វ​កណ្តុរ​ តែវិធីសាស្ត្រទាំងនោះមិនអាចទប់ស្កាត់បាននោះទេ គឺសត្វកណ្ដុរទាំងនោះស៊ីបំផ្លាញច្រើនឡើងៗពីមួយថ្ងៃទៅមួយថ្ងៃ។

ដោយឡែក ចំពោះកម្មករធ្វើការក្នុងចម្ការដូងប្រេងរបស់ក្រុមហ៊ុន ម៉ុង ឬទ្ធី គ្រុប អាចទទួល​បានប្រាក់ឈ្នួល​ ៩ដុល្លារ បូកទាំងថ្លៃ​ដឹកជញ្ជូន​ ៦ដុល្លារទៀត សរុបបាន១៥ដុល្លារ ក្នុងមួយតោន ហើយក្នុងរយៈពេល១០ខែក្នុងឆ្នាំ២០២៤នេះ ក្រុមរបស់លោក​ប្រមូលផល​ផ្លែ​ដូងប្រេង​ស្រស់​បាន​ចំនួន​ ២៨៨ ០០០ តោន​ ស្មើនឹង ៤ ៣២០ ០០០ ដុល្លារ (គិតតម្លៃប្រាក់ឈ្មួលកម្មករ)៕

អត្ថបទ៖ សុខុម