ក្រសួងការងារដាក់ចេញគោលការណ៍ដោះស្រាយការផ្សះផ្សាវិវាទការងារសាឡើងវិញ

ក្រសួងការងារ និងបណ្តុះបណ្តាលវិជ្ជាជីវៈ បានដាក់ចេញនូវគោលការណ៍ណែនាំដើម្បីផ្សះផ្សាវិវាទការងារសាឡើងវិញដើម្បីឱ្យភាគីវិវាទទទួលបាននូវភាពយុត្តិធម៌តម្លាភាពនិងអាចទទួលយកបានទាំងអស់គ្នា។

នៅក្នុងសេចក្តីណែនាំ ស្តីពីការផ្សះផ្សាវិវាទការងារសាឡើងវិញដែលទើបចេញផ្សាយនៅថ្ងៃទី០២វិច្ឆិកានេះ លោក ហេងសួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថាការដាក់ចេញគោការណ៍ដោះស្រាយការផ្សះផ្សាវិវាទការងារសាឡើងវិញដោយសារកន្លងមកក្រសួងការងារ និងបណ្តុះបណ្តាលវិជ្ជាជីវៈ បានសង្កេតឃើញថា ការផ្សះផ្សាវិវាទការងារមិនទាន់អាចឆ្លើយតបបានតាមតម្រូវការរបស់ភាគីវិវាទដែលធ្វើឱ្យអត្រាសះជាមិនទាន់សម្រេចបាន ១០០% នៅឡើយ។

លោករដ្ឋមន្ត្រីបានបន្តថា ដើម្បីពង្រឹងប្រសិទ្ធភាពនៃការផ្សះផ្សាវិវាទការងារ និងឆ្លើយតបតាមសំណូមពររបស់ភាគីវិវាទ ដែល ជានិយោជកនិងកម្មករនិយោជិតក្រសួងការងារ និងបណ្តុះបណ្តាលវិជ្ជាជីវៈ សូមដាក់ចេញនូវគោលការណ៍ណែនាំ
ស្តីពីនីតិវិធីនៃការផ្សះផ្សាវិវាទការងារសាឡើងវិញ ដូចខាងក្រោម៖
១. ក្នុងរយៈពេល ២ថ្ងៃ នៃថ្ងៃធ្វើការបន្ទាប់ពីការផ្សះផ្សាវិវាទការងារដោយអធិការការងារ ឬអ្នកផ្សះផ្សាដែលចាត់តាំងដោយរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈមិនទទួលបាន លទ្ធផលសះជាភាគីវិវាទអាចស្នើសុំជាលាយលក្ខណ៍អក្សររួមគ្នាមករដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីធ្វើការផ្សះផ្សាវិវាទការងារសាឡើងវិញ។

២.រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ អាចចាត់តាំង ឬប្តូរអ្នកផ្សះផ្សាដើម្បីធ្វើការ ផ្សះផ្សាវិវាទការងារនេះសាឡើងវិញបានស្របតាមនីតិវិធីដែលមានចែងក្នុងច្បាប់ស្តីពីការងារ។

៣.ប្រសិនបើការផ្សះផ្សាវិវាទការងារសាឡើងវិញនេះមិនទទួលបានលទ្ធផលសះជាភាគីវិវាទមិន អាចស្នើសុំឱ្យធ្វើការផ្សះផ្សាសាឡើងវិញជាថ្មីម្តងទៀតបានទេ។ ភាគីវិវាទត្រូវគោរពតាមនីតិវិធី បន្តសម្រាប់ការដោះស្រាយវិវាទការងារនេះ។

លោករដ្ឋមន្ត្រីបានណែនាំដល់ម្ចាស់ ឬនាយកសហគ្រាស គ្រឹះស្ថានតំណាងនិយោជក អង្គការ វិជ្ជាជីវៈរបស់និយោជក កម្មករនិយោជិតតំណាងកម្មករនិយោជិត និងអង្គការវិជ្ជាជីវៈរបស់កម្មករនិយោជិត ត្រូវអនុវត្តតាមខ្លឹមសារនៃសេចក្តីណែនាំនេះឱ្យបានត្រឹមត្រូវ និងប្រកបដោយប្រសិទ្ធភាពខ្ពស់៕

អត្ថបទ៖ សំអឿន