តើយុទ្ធសាស្ត្រ «គំរាម» ម្ដងហើយម្ដងទៀត របស់លោក ត្រាំ លើអ៊ីរ៉ង់ ពិតជាមានប្រសិទ្ធភាព ដែរឬទេ?

ក្នុងរយៈពេលប៉ុន្មានខែចុងក្រោយនេះ ពិភពលោកបានតាមដានយ៉ាងយកចិត្តទុកដាក់លើភាពតានតឹងដែលគ្មានទីបញ្ចប់រវាងសហរដ្ឋអាមេរិក និងអ៊ីរ៉ង់។ ប្រធានាធិបតីអាមេរិក លោក ដូណាល់ ត្រាំ បានប្រើប្រាស់យុទ្ធសាស្ត្រដ៏តឹងរ៉ឹងបំផុតមួយ គឺការគំរាមកំហែងដោយផ្ទាល់ថា នឹងកម្ទេចរោងចក្រថាមពល និងហេដ្ឋារចនាសម្ព័ន្ធសំខាន់ៗរបស់អ៊ីរ៉ង់ ប្រសិនបើទីក្រុងតេហេរ៉ង់មិនព្រមចូលតុចរចា ឬទទួលស្គាល់ការបរាជ័យខាងយោធា។ ប៉ុន្តែសំណួរដែលអ្នកវិភាគកំពុងចោទសួរថា តើយុទ្ធសាស្ត្រនៃការគំរាមម្ដងហើយម្ដងទៀតនេះ ពិតជាទទួលបានជោគជ័យដូចការរំពឹងទុកដែរឬទេ?

យោងតាមការចុះផ្សាយពីសារព័ត៌មាន AFP កាលពីថ្ងៃទី១៥ ខែកក្កដា ឆ្នាំ២០២៦ លោក ត្រាំ បានព្រមានជាថ្មីថា ប្រសិនបើគ្មានកិច្ចព្រមព្រៀងណាមួយត្រូវបានសម្រេចទេ សហរដ្ឋអាមេរិកនឹងបង្កើនការវាយប្រហារទៅលើរោងចក្រថាមពល និងស្ពាននានារបស់អ៊ីរ៉ង់នៅសប្តាហ៍ក្រោយ។ ការគំរាមកំហែងនេះ មិនមែនជារឿងថ្មីនោះទេ ដោយលោកបានប្រើប្រាស់វោហាសាស្ត្រនេះ តាំងពីដើមឆ្នាំ២០២៦ ដើម្បីដាក់សម្ពាធលើរដ្ឋាភិបាលអ៊ីរ៉ង់។

យ៉ាងណាមិញ អ្នកវិភាគអន្តរជាតិមួយចំនួន យល់ឃើញថា យុទ្ធសាស្ត្រនេះហាក់ដូចជាកំពុងជាប់គាំងក្នុងស្ថានភាពមួយដែលគេហៅថា «ភាពទាល់ច្រកជាយុទ្ធសាស្ត្រ»។ បើតាមការវិភាគពី Al Jazeera និង Modern Diplomacy ទោះបីជាមានការវាយប្រហារតាមអាកាសយ៉ាងខ្លាំងក្លា ដែលបណ្តាលឱ្យមានការខូចខាតសេដ្ឋកិច្ចធ្ងន់ធ្ងរ និងការបាត់បង់មេដឹកនាំសំខាន់ៗមួយចំនួនរបស់អ៊ីរ៉ង់ក៏ដោយ ក៏ទីក្រុងតេហេរ៉ង់ហាក់មិនទាន់បង្ហាញសញ្ញានៃការចុះចាញ់ឡើយ។ ផ្ទុយទៅវិញ ក្រុមអ្នកជំនាញអះអាងថា សង្រ្គាមនេះ បានធ្វើឱ្យអ៊ីរ៉ង់បាត់ការភ័យខ្លាច ចំពោះសហរដ្ឋអាមេរិក ហើយថែមទាំងបង្ហាញពីសមត្ថភាពរបស់ខ្លួន ក្នុងការតបតតាមបែបសង្រ្គាមមិនស៊ីមេទ្រី ដូចជាការគំរាមកំហែងដល់ការដឹកជញ្ជូនតាមច្រកសមុទ្រហ័រមូស ដែលជាចំណុចយុទ្ធសាស្ត្រដ៏រសើបបំផុត។

បន្ថែមពីលើនេះ ក៏មាន​សេចក្ដី​​រាយការណ៍ដែរថា ទោះបីជាមានការព្រមានដដែលៗពីលោក ត្រាំ ក៏ដោយ ក៏មន្ត្រីជាន់ខ្ពស់អ៊ីរ៉ង់នៅតែអះអាងថា ខ្លួនមិនអាចទទួលយកការបង្ខិតបង្ខំ តាមរយៈការគំរាមកំហែងបានឡើយ។ ការចរចាដែលធ្វើឡើងតាមរយៈអន្តរការីនានា ក៏ហាក់ទទួលបានលទ្ធផលតិចតួចបំផុត ដោយសារតែភាគីទាំងពីរនៅតែមិនមានការជឿទុកចិត្តគ្នាទៅវិញទៅមក។

សរុបសេចក្តីមក យុទ្ធសាស្ត្រ «គំរាមម្ដងហើយម្ដងទៀត» របស់លោក ត្រាំ បានបង្កើតឱ្យមានសម្ពាធយ៉ាងខ្លាំងលើអ៊ីរ៉ង់ ប៉ុន្តែវាក៏បានបង្កើតឱ្យមានបញ្ហាប្រឈមធំៗ សម្រាប់សហរដ្ឋអាមេរិកផងដែរ។ នៅពេលដែលសង្រ្គាមអូសបន្លាយពេលកាន់តែយូរ វាមិនត្រឹមតែបង្កហានិភ័យដល់សេដ្ឋកិច្ចពិភពលោក និងតម្លៃប្រេងឥន្ធនៈប៉ុណ្ណោះទេ ប៉ុន្តែវាក៏កំពុងក្លាយជាបន្ទុកនយោបាយផ្ទៃក្នុងសម្រាប់រដ្ឋបាលលោក ត្រាំ មុនការបោះឆ្នោតពាក់កណ្ដាល​អាណត្តិ​នា​ខែវិច្ឆិកាខាងមុខផង​ដែរ៕

អត្ថបទ៖ ឈាង