ព័ត៌មានជាតិ

កម្លាំងសឹករងខេត្តតាកែវឃាត់ខ្លួនជនជាតិចិន៥នាក់ដែលព្យាយាមឆ្លងដែនមកកម្ពុជាគេចវេសពីការធ្វើចត្តាឡីស័ក

បានផុស

២ years មុន

នៅ

ថ្ងៃសុក្រ ១២ មីនា ២០២១

ដោយ

នៅព្រឹកថ្ងៃទី១២ ខែមីនា ឆ្នាំ២០២១នេះ កម្លាំងតំបន់ប្រតិបត្តិការសឹករងខេត្តតាកែវ បានឃាត់ខ្លួនជនជាតិចិន០៥នាក់ និងអ្នករត់ម៉ូតូឌុបចំនួន០២នាក់ ជាជនជាតិខ្មែរ ដែលកំពុងលួចឆ្លងដែនពីប្រទេសវៀតណាម ចូលមកប្រទេសកម្ពុជា ស្ថិតនៅភូមិជ្រៃគោកពោធិ៍ ឃុំគោកពោធិ៍ ស្រុកបូរីជលសារ ខេត្តតាកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ត្រី នាង សុភារ៉ា មេបញ្ជាការតំបន់ប្រតិបត្តិការសឹករងខេត្តតាកែវ បានឲ្យដឹងថា លោកបានបញ្ជាកម្លាំងផ្នែកសឹករងបូរីជលសារ សហការជាមួយអធិការនគរបាលស្រុកបូរីជលសារ ចេញល្បាតតាមព្រំដែន និងបានឃាត់ខ្លួនជនជាតិចិនចំនួន០៥នាក់ និងអ្នករត់ម៉ូតូឌុបចំនួន០២នាក់ ដែលបានលួចឆ្លងដែនពីប្រទេសវៀតណាម ចូលមកប្រទេសកម្ពុជា តាមច្រកព្រំដែនស្រុកបូរីជលសារ។

បច្ចុប្បន្នក្រោយពីបានធ្វើការឃាត់ខ្លួនជនជាតិចិនទាំង០៥នាក់ សមត្ថកិច្ចពាកព័ន្ធបានបញ្ជូនពួកគាត់ទៅធ្វើចត្តាឡីស័ក នៅមជ្ឈមណ្ឌលគរុកោសល្យភូមិភាគតាកែវ។

សូមបញ្ជាក់ដែរថា ប៉ុន្មានថ្ងៃជាប់ៗគ្នាដើមខែមីនានេះ មានជនបរទេសដែលជាជនជាតិចិន២០នាក់ហើយ ដែលសមត្ថកិច្ចបានឃាត់ខ្លួននិងកំពុងដាក់ឲ្យធ្វើចត្តាឡីស័កនៅក្នុងមណ្ឌលចត្តាឡីស័ក តែយ៉ាងណាក៏ដោយនៅមិនទាន់មានការបញ្ជាក់ពីអាជ្ញាធរពាក់ព័ន្ធទៅលើលទ្ធផលតេស្ដវិជ្ជមានឬអវិជ្ជមានជំងឺកូវីដ១៩នោះនៅឡើយទេ៕

អត្ថបទ ៖ វីរៈ