ឧត្តមសេនីយ៍ទោ ម៉ែន លី ត្រូវបានប្រកាសតែង​តាំងជាស្នងការនគរបាលខេត្តតាកែវ

លោកឧត្តមសេនីយ៍ទោ ម៉ែន លី អតីតស្នងការនៃស្នងការដ្ឋាននគរបាលខេត្តកំពង់ធំ ត្រូវបានប្រកាសតែងតាំងជាស្នងការនៃស្នងការដ្ឋាននគរបាលខេត្តតាកែវ ជំនួសលោកឧត្តមសេនីយ៍ទោ ឈាង ផាន់ណារ៉ា ដែលត្រូវបានថ្នាក់ដឹកនាំ តែងតាំងជា អគ្គាធិការរងនៃក្រសួងមហាផ្ទៃ។

ពិធីផ្លាស់ប្តូរ និងផ្ទេរភារកិច្ចស្នងការនគរបាលខេត្តតាកែវនេះ ធ្វើឡើងនៅព្រឹកថ្ងៃទី៣១ ខែកក្កដា ឆ្នាំ២០២៤ ក្រោមអធិបតិយភាពនាយឧត្តមសេនីយ៍ ស ថេត អគ្គស្នងការនគរបាលជាតិ តំណាងលោក ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ។

អញ្ជើញចូលរួមនាឱកាសនោះ មានឯកឧត្តម លោកជំទាវ ប្រតិភូអមដំណើរ លោកអភិបាលខេត្ត សមាជិកក្រុមប្រឹក្សាខេត្ត លោក លោកស្រី អភិបាលរងខេត្ត លោកមេបញ្ជាការតំបន់ប្រតិបត្តិការសឹករងខេត្ត លោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្ត លោកប្រធាន អនុប្រធានមន្ទីរអង្គភាពជុំវិញខេត្ត លោក អភិបាលស្រុកក្រុង លោកអធិការនគរបាល លោកមេបញ្ជាការមូលដ្ឋានអាវុធហត្ថ លោកមេបញ្ជាការផ្នែកសឹករង ស្រុកក្រុង និងលោកនាយប៉ុស្ដិ៍រដ្ឋបាលឃុំសង្កាត់ទាំង១០០ចូលរួមផងដែរ។

សូមជម្រាបជូនដែរថា លោកឧត្តមសេនីយ៍ទោ ឈាង ផាន់ណារ៉ា បានមកកាន់ដំណែងជាស្នងការនគរបាលខេត្តតាកែវ បានចំនួន ២៨ខែ និង៧ថ្ងៃ ហើយត្រូវបានថ្នាក់ដឹកនាំ តែងតាំងជា អគ្គាធិការរង នៃក្រសួងមហាផ្ទៃ ហើយលោកឧត្តមសេនីយ៍ទោ ម៉ែន លី ត្រូវបានក្រសួងមហាផ្ទៃ ផ្ទេរភារកិច្ច ពីស្នងការនគរបាលខេត្តកំពង់ធំ មកជា ស្នងការនគរបាលខេត្តតាកែវជំនួសវិញ៕

អត្ថបទ៖ វីរៈ