ក្រសួងសុខាភិបាល រៀបចំសិក្ខាសាលាពិគ្រោះយោបល់ ផែនការជាតិប្រយុទ្ធនឹងជំងឺមហារីក ២០២៥-២០៣០

នាព្រឹកថ្ងៃទី៥ ខែវិច្ឆិកា ឆ្នាំ ២០២៤ លោក ង៉ូវ កាង រដ្ឋលេខាធិការក្រសួងសុខាភិបាល បានអញ្ចើញចូលរួមបើក “សិក្ខាសាលាពិគ្រោះយោបល់លើសេចក្ដីព្រាង ផែនការជាតិប្រយុទ្ធនឹងជំងឺមហារីក ២០២៥-២០៣០” ដែលរៀបចំឡើងដោយក្រសួងសុខាភិបាល នៅសណ្ឋារគារភ្នំពេញ។

សិក្ខាសាលានេះរៀបចំឡើង ក្នុងគោលបំណងសំខាន់ៗ ដូចជា ផ្ដួចផ្ដើមបង្កើតផែនការជាតិប្រយុទ្ធនឹងជំងឺមហារីក ២០២៥-២០៣០ ដើម្បីពង្រីកវិសាលភាពនៃការផ្ដល់សេវាសុខាភិបាល និងកាត់បន្ថយបន្ទុកនៃ ជំងឺមហារីក នៅប្រទេសកម្ពុជា។ ពិគ្រោះយោបល់ និងប្រមូលធាតុចូលសំខាន់ៗ ពីអ្នកបច្ចេកទេស និងអ្នកបង្កើតគោលនយោបាយពាក់ព័ន្ធជំងឺមហារីក ដើម្បីធានាឱ្យបាននូវផែនការជាតិប្រយុទ្ធនឹងជំងឺមហារីក ដែលមានលក្ខណៈគ្រប់ជ្រុងជ្រោយ ប្រកបដោយប្រសិទ្ធភាព និងប្រសិទ្ធផលខ្ពស់។

ព្រមទាំង លើកកម្ពស់សេវាសុខាភិបាល និងចូលរួមចំណែកក្នុងការសម្រេចអោយបាននូវការគ្របដណ្ដប់សុខភាពជាសកល (universal health coverage) និងគោលដៅអភិវឌ្ឍប្រកបដោយចីរភាព (sustainable development goals) ស្របតាមផែនការយុទ្ធសាស្រ្តបញ្ចកោណរបស់រាជរដ្ឋាភិបាល។

សិក្ខាសាលានេះ បានប្រពឹត្តទៅដោយមានការចូលរួមពីសំណាក់ លោក លោកស្រីដែលជាប្រធាន ឬតំណាង នាយកដ្ឋាន ពាក់ព័ន្ធនៃក្រសួងសុខាភិបាល មន្ទីរសុខាភិបាលខេត្ត ដៃគូអភិវឌ្ឍន៍ និងអង្គការពាក់ព័ន្ធផ្សេងៗ ក៏ដូចជាមន្ត្រី បច្ចេកទេស ជាន់ខ្ពស់នៃក្រសួងសុខាភិបាលដែលពាក់ព័ន្ធនឹងផ្នែកមហារីក៕