ក្រសួងរ៉ែ និងថាមពលនឹងចាត់វិធានការតាមផ្លូវច្បាប់បង្ក្រាបការជីករ៉ែ អនាធិបតេយ្យ នៅមណ្ឌលគិរី

ក្រសួងរ៉ែ និងថាមពល បានចុះបង្រ្កាបទីតាំងរ៉ែ អនាធិបតេយ្យ នៅតំបន់ចុងផ្លាស់ ខេត្តមណ្ឌលគិរី និងបានព្រមានចាត់វិធានការច្បាប់ ចំពោះអ្នកពាក់ព័ន្ធ។

លោក អ៊ឺង អៀង រដ្ឋលេខាធិការក្រសួងរ៉ែ​ និង​ថាមពលបានថ្លែងនៅក្នុងសន្និសីទសារព័ត៌មាននៅរសៀលថ្ងៃទី ០៦ ខែវិច្ឆិកា ឆ្នាំ ២០២៤ ថា សកម្មភាពនៃការធ្វើអាជីវកម្មរ៉ែ អនាធិបតេយ្យ នៅតំបន់ចុងផ្លាស់ ធ្វើឱ្យបាត់បង់ទ្រព្យសម្បត្តិជាតិ និងប៉ះពាល់ដល់បរិស្ថានធ្ងន់ធ្ងរ ព្រមទាំងបង្ករហានិភ័យដល់សុខភាព និងសុវត្ថិភាពរបស់អ្នកធ្វើអាជីវកម្មខ្លួនឯង ព្រមទាំងប្រជាពលរដ្ឋ។

លោក អ៊ឺង អៀងថ្លែងថា៖ «លើកនេះ ក្រសួងរ៉ែ និងថាមពល បានដាក់ចេញវិធានការតឹងរឹងចំពោះ​ជនល្មើសដែលមិនរាងចាល ហើយនឹងកាត់ផ្ដាច់នូវមធ្យោបាយនានា ដែលបានប្រើប្រាស់កន្លង​មក យើងសូមអំពាវនាវចំពោះប្រជាពលរដ្ឋដែលកំពុងធ្វើអាជីវកម្ម អនាធិបតេយ្យទាំងអស់សូមបញ្ឈប់នូវរាល់សកម្មភាពខុសច្បាប់ទាំងនេះ»។

លោក អ៊ឹង ឌីប៉ូឡា អគ្គនាយក នៃអគ្គនាយកដ្ឋានធនធានរ៉ែ ថ្លែងថាក្រសួងរ៉ែ និងថាមពលនឹងចាត់វិធាន​ការតាម​ផ្លូវ​ច្បាប់​ បញ្ចប់ជីករ៉ែអនាធិបតេយ្យនៅតំបន់ចុងផ្លាស់។

សូមបញ្ជាក់ថា ទីតាំងបង្ក្រាបបាននៅតំបន់ចុងផ្លាស់ ខេត្តមណ្ឌលគិរី មាន១៨ទីតាំង ដោយទីតាំងមានរោង និង​អណ្តូង​រ៉ែ១០ទីតាំង ហើយ​បាន​បញ្ជូន ទៅសាលាដំបូងខេត្ត ដើម្បីអនុវត្តនីតិវិធីតាមច្បាប់, ទីតាំងកិន​រ៉ែតូចតាច​៥ទីតាំង ដោយអប់រំឲ្យបញ្ឈប់ និង៣ទីតាំងទៀត ត្រូវបានស្តារឡើងវិញ ក្រោយទុក​រណ្តៅ​រ៉ែចោល​ជាច្រើន​ឆ្នាំ។

កាលពីថ្ងៃទី ០១ ខែវិច្ឆិកា រដ្ឋបាលខេត្តមណ្ឌលគិរី ការសហការជាមួយក្រសួងរ៉ែ និងថាមពល អង្គភាពប្រឆាំងអំពើពុករលួយ ក្រុមការងារចម្រុះ ចុះអនុវត្ត វិធានការច្បាប់ជាធរមានដោយគ្មានការលើកលែង ចំពោះបងប្អូនប្រជាពលរដ្ឋ ដែលបាន និងកំពុងពាក់ព័ន្ធនឹងការប្រកបរបរធ្វើរ៉ែមាសតាមរូបភាពផ្សេងៗដូចជា កកាយ ចោះ កាត់បំផ្លាញបេតុងគំរបរណ្តៅរ៉ែ ជីក កិន វែង ប្រមូលកាកសំណល់ និងរ៉ែ គ្រប់ប្រភេទ គ្រប់រូបភាព។

រដ្ឋបាលខេត្តមណ្ឌលគិរីបញ្ជាក់ថា៖ «សូមបងប្អូនបញ្ឈប់គ្រប់ សកម្មភាពជាស្ថាពរ ចាប់ពីថ្ងៃជូនដំណឹងនេះតទៅ និងសូមបងប្អូនដែលមានទីតាំងពាក់ព័ន្ធជាមួយករណី ខាងលើនេះ មេត្តារុះរើប្រមូលសម្ភារៈទាំងឡាយណាដែលមិនបម្រើ​ឱ្យបទល្មើរ៉ែមាស ដោយខ្លួនឯងផ្ទាល់ តាមដែលអាចធ្វើទៅបាន ក្នុងករណីមិនព្រមអនុវត្ត ក្រុមការងារនឹងយកឧបករណ៍ កម្លាំងចុះរុះរើ សំអាត ដើម្បីលុបបំបាត់សកម្មភាពអនាធិបតេយ្យរ៉ែមាស ដែលបានប្រើប្រាស់សារធាតុគីមី គ្រឿងសារធាតុផ្ទុះ បង្កគ្រោះថ្នាក់ដល់សុខភាព មនុស្ស សត្វ និងបរិស្ថានយ៉ាងធ្ងន់ធ្ងរ នៅក្នុងទីតាំងទាំងនេះ»។

ក្រុមការងារមិនអនុគ្រោះ មិនលើកលែង ចំពោះបុគ្គលបានប្រព្រឹត្តប៉ះពាល់លើទីតាំងរណ្តៅ ដែលបានចាក់បេតុងបិទគំរប និងទីតាំងហាមឃាត់ផ្សេងៗទៀត ព្រោះវាបានរំលោភបំពានគោលការណ៍​វិធាន និងច្បាប់ ក៏ដូចជាការណែនាំរបស់រដ្ឋ​បាល​ខេត្តកន្លងមក ដើម្បីកែប្រែតំបន់នេះឱ្យ​មាន​បរិស្ថាន ប្រសើរឡើងវិញ។ នេះបើយោងតាមលោក អ៊ឹង ឌីប៉ូឡា ៕