អភិបាលក្រុងបាវិត នឹងធ្វើការជួសជុលផ្លូវតាពៅឡើងវិញ ក្រោយពេលមេឃរាំងភ្លៀង 

នៅថ្ងៃទី៧ ខែវិច្ឆិកា ឆ្នាំ២០២៤ លោក លឹម សៀងហេង អភិបាលក្រុងបាវិត បានឱ្យដឹងថា ក្រោយពេលមេឃរាំងភ្លៀងនាពេលខាងមុខលោក និងក្រុមស្ដារប្រឡាយតាពៅនឹងធ្វើការជួសជុលផ្លូវលំមួយខ្សែឡើងវិញ ស្ថិតនៅភូមិតាពៅសង្កាត់បាវិត ក្រុងបាវិតខេត្តស្វាយរៀង។

លោកអភិបាលក្រុង បានបញ្ជាក់ថា ដោយសាររដូវនេះជារដូវវស្សា ហេតុដូច្នេះហើយធ្វើឱ្យបណ្ដាផ្លូវលំមួយចំនួនបានរងការខូចខាតដោយសារជំនន់ទឹកភ្លៀងនាចុងរដូវវស្ស។ ម៉្យាងទៀតនៅពេលដែលមានទឹកភ្លៀង មិនអាចដាក់គ្រឿងចក្រជួសជុលបានទេ លុះត្រាតែមេឃរាំងភ្លៀង ហើយការជួសជុលផ្លូវមួយខ្សែនេះ គឺបន្តរហូតដល់សង្កាត់ប្រាសាទ គឺនឹងចាក់ថ្មមិកទៅតាមលទ្ធភាពជាជំហានៗដើម្បីសម្រួលដល់ការធ្វើដំណើររបស់ប្រជាពលរដ្ឋ ក៏ដូចជាអ្នកដែលបានធ្វើដំណើរឆ្លងកាត់ផ្លូវមួយខ្សែខាងលើនេះ។

សូមជម្រាបដែរថា ផ្លូវលំមួយខ្សែស្ថិតនៅក្នុងភូមិតាពៅ សង្កាត់បាវិត ក្រុងបាវិត នាពេលកន្លងមកបានរងផលប៉ះពាល់ដោយសារជំនន់ទឹកភ្លៀងផង និងដោយសារការដឹកដីស្ដារប្រឡាយតាពៅផង ដែលជាហេតុធ្វើឱ្យកំណត់ផ្លូវលំមួយខ្សែនេះ បានស្រុតដោយអន្លើនៗហើយមានសភាពរអិលពិបាកក្នុងការធ្វើដំណើរនៅក្នុងភូមិសាស្ត្រខាងលើនេះ។ ក្រោយមក ប្រជាពលរដ្ឋក៏បានសំណូមពរដល់លោកចៅសង្កាត់បាវិតដើម្បីជួយជួសជុលផ្លូវមួយខ្សែនេះឡើងវិញ៕

ដោយ៖ ភក្ដី