កសិករជាង ១០០ នាក់ នៅភូមិ​ជនបទខេត្តក្រចេះ រក្សាវប្បធម៌ប្រវាស់ដៃគ្នាប្រមូលផលស្រូវ

រដូវនេះគឺជារដូវដែលប្រជាកសិករកំពុងមមាញញឹក ក្នុងការប្រមូលផលច្រូតកាត់ស្រូវរដូវវស្សា។

សព្វថ្ងៃនេះប្រទេសកម្ពុជា កំពុងមានកំណើនសេដ្ឋកិច្ច និងការអភិវឌ្ឍន៍រីកចម្រើនខ្លាំង ខណៈ​ដែលវិស័យកសិកម្ម ទាំងការភ្ជួររាស់ដីស្រែ ដីចម្ការ ការច្រូតកាត់ គឺសុទ្ធសឹងតែប្រើប្រាស់ឧបករណ៍បច្ចេកវិទ្យាទំនើនៗ ដូចជា គោយន្តកន្ត្រៃ ត្រាក់ទ័រ និងម៉ាស៊ីនច្រូតស្រូវ កាន់តែជឿនលឿន។

ប៉ុន្តែទោះជាយ៉ាងណាក្តី ប្រជាកសិករនៅតាមតំបន់ជនបទ ឬតំបន់ដាច់ស្រយាលមួយចំនួន ក្នុងខេត្តក្រចេះ នៅតែរក្សានូវទំនៀម ទំលាប់ប្រពៃណី ជារបៀបប្រវាស់ដៃគ្នា ឬហៅបានម្យ៉ាងទៀតថា ការជួយយកអសារគ្នា ច្រូតស្រូវគ្នាម្តងម្នាក់។

ក្នុងសកម្មភាព ច្រូតស្រូវប្រវាសគ្នាយ៉ាងសប្បាយរីករាយ អ្នកស្រី ឡេង ណី អាយុ ៤៤ឆ្នាំ ជាប្រជាកសិករ រស់នៅភូមិស្រែស្បូវ ឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ បានលើកឡើងថា ការប្រមូលផលស្រូវឆ្នាំនេះ បានផលច្រើនជាងឆ្នាំមុន។

អ្នកស្រីលើកឡើងបន្តថា បច្ចុប្បន្នពលរដ្ឋក្នុងស្រុកគាត់នៅតែរក្សាប្រពៃណី ការធ្វើដោយប្រវាស់ដៃគ្នា ដូចជាការ សាបព្រោះ ដក ស្ទូង និងការច្រូតកាត់ជាដើម។ នៅតែធ្វើស្រែតាមបែបប្រពៃណី ដូចជា ការប្រើកម្លាំងមនុស្ស សត្វពាហនៈ ពិសេសការធ្វើស្រែ ដោយប្រវាស់ដៃគ្នាជាដើម ហើយវប្បធម៌នេះនៅតែរក្សារហូតទៅ។

លើសពីនេះ អ្នកស្រី បន្ដថា ការធ្វើស្រែបែបប្រពៃណី មិនត្រឹមតែចំណាយតិចទេ តែជាការបង្ហាញពីរបៀបរស់នៅរបស់ពលរដ្ឋខ្មែរ តាំងពីបុរាណ បានបង្ហាញពីការសាមគ្គីគ្នា ចេះជួយគ្នាទៅវិញទៅមក។

ការធ្វើច្រូតស្រូវដោយប្រវាស់ដៃគ្នា អ្នកស្រុកបានរួមសាមគ្គីគ្នារហូតដល់ ១១៧ នាក់ នេះបង្ហាញពីការសាមគ្គីគ្នាគួរជាទីកោតសរសើរ៕

អត្ថបទ៖ អត្ថបទ ប្រុញ វិធីន