រដ្ឋមន្ត្រីដឹកជញ្ជូនអាស៊ាន អនុម័តឯកសារសំខាន់ៗចំនួន ៧ ពាក់ព័ន្ធ​​វិស័យដឹកជញ្ជូន

នៅ​ក្នុង​ពិធី​បើក​កិច្ច​ប្រជុំរដ្ឋមន្រ្តី​ដឹក​ជញ្ជូន​អាស៊ានលើកទី៣០ និង​កិច្ចប្រជុំពាក់ព័ន្ធ ដែល​បាន​ប្រព្រឹត្តទៅ​នៅទីក្រុង​គូឡាឡាំពួ ប្រទេស​ម៉ាឡេស៊ី នា​ថ្ងៃទី២១ ខែវិច្ឆិកា ឆ្នាំ២០២៤ នេះ រដ្ឋមន្ត្រី​ដឹក​ជញ្ជូន​អាស៊ាន​ បាន​អនុម័ត​ឯកសារ​សំខាន់​ៗចំនួន ៧ នៅក្នុងវិស័យដឹកជញ្ជូន។

នៅ​ក្នុង​ពិធីបើកជាផ្លូវការនៃកិច្ចប្រជុំលើកទី៣០ នេះ រដ្ឋមន្រ្តីដឹកជញ្ជូនអាស៊ានបានពិភាក្សាលើចំណុចខ្លាំង ចំណុចខ្សោយ បញ្ហាប្រឈម និងដំណោះស្រាយនៅគ្រប់វិស័យដឹកជញ្ជូន មាន​ការដឹកជញ្ជូនផ្លូវគោក, ការដឹកជញ្ជូនផ្លូវទឹក និងផ្លូវសមុទ្រ, ការដឹកជញ្ជូនផ្លូវអាកាស និងកិច្ចសម្របសម្រួលការដឹកជញ្ជូន។

ជាលទ្ធផល រដ្ឋមន្ត្រីដឹកជញ្ជូនអាស៊ានបានអនុម័តនូវឯកសារសំខាន់ៗចំនួន ៧ រួមមាន (១) ផែនការអាទិភាពប្រចាំឆ្នាំ២០២៥ (២) ការចុះហត្ថលេខាលើពិធីសារទី៥ ស្តីពីសិទ្ធហោះហើរអូនស្តុបអូវើ (Own Stopover Right) រវាងចំណុចហោះហើរនានានៅក្នុងរង្វង់ដែនដីនៃរដ្ឋសមាជិកអាស៊ានណាមួយផ្សេងទៀត (៣) ការចុះហត្ថលេខាលើកិច្ចព្រមព្រៀងសេវាកម្មដឹកជញ្ជូនតាមផ្លូវអាកាសរវាងអាស៊ាន-នូវែលសេឡង់ នៅក្នុងឆ្នាំ២០២៥ (៤) គោលការណ៍ណែនាំរបស់អាស៊ាន ស្តីពីយានយន្តអគ្គិសនីធុនស្រាល, (៥) គោលការណ៍ណែនាំរបស់អាស៊ាន ស្តីពីការដឹកជញ្ជូនទំនិញក្នុងទីប្រជុំជន (៦) គោលការណ៍ណែនាំអាស៊ាន ស្ដីពីភាពជាដៃគូរដ្ឋ និងឯកជន ក្នុងវិស័យកំពង់ផែ និង (៧) គោលការណ៍ណែនាំអាស៊ាន ស្តីពីការធ្វើឌីជីថលកំពង់ផែ និងស្វ័យប្រវត្តិកម្ម។

ក្នុងឱកាសនៃកិច្ចប្រជុំនេះ លោក ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន បានធ្វើបទអន្តរាគមន៍ជម្រាបជូនអង្គប្រជុំអំពីវឌ្ឍនភាពនៃការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូន និងឡូជីស្ទីកនៅកម្ពុជា ដែលបាននិងកំពុងរួមចំណែកយ៉ាងសំខាន់ក្នុងការតភ្ជាប់ផ្ទៃក្នុងប្រទេស ក៏ដូចជាការតភ្ជាប់កម្ពុជាជាមួយប្រទេសជិតខាង និងក្នុងតំបន់ផងដែរ។

កិច្ចប្រជុំរដ្ឋមន្រ្តីដឹកជញ្ចូន​អាស៊ាន រៀបចំឡើងក្នុងគោលបំណង ពិនិត្យការអនុវត្តផែនការសកម្មភាពនៅក្នុងក្របខណ្ឌអាស៊ានដែលបានអនុវត្តក្នុងឆ្នាំ២០២៤ និងកំណត់ទិសដៅ, គោលនយោបាយ និងផែនការសកម្មភាពសម្រាប់អនុវត្តក្នុងឆ្នាំ២០២៥ និងពិនិត្យផែនការសកម្មភាពដែលបានអនុវត្តក្នុងឆ្នាំ២០២៤ និងអនុម័តផែនការសកម្មភាពសម្រាប់អនុវត្តនៅក្នុងឆ្នាំ២០២៥ ជាមួយដៃគូអភិវឌ្ឍន៍ រួមមាន៖ អាស៊ាន-ចិន, អាស៊ាន-ជប៉ុន, អាស៊ាន-កូរ៉េ, និងអាស៊ាន-អាម៉េរិក៕