ភ្ញៀវទេសចរ នៅតែបន្តទៅទស្សនាផ្លូវខ្សែបន្ទាត់ព្រំដែន នៅភូមិសាស្រ្ដខេត្តមណ្ឌលគិរី

ភ្ញៀវទេសចរ នៅតែបន្តទៅទស្សនាកម្សាន្តនៅតាមផ្លូវខ្សែបន្ទាត់ព្រំដែន ដែលកំពុងសាងសង់​ ដូចជានៅច្រកដាក់ដាំ ស្រុកអូររាំង និងច្រកឡាប៉ាខេ ស្រុកកែវសីមា ខេត្តមណ្ឌលគិរី ជាដើម។

អ្នកទេសចរមួយរូប ដែលមកពីរាជធានីភ្នំពេញ បានប្រាប់កម្ពុជាថ្មី នៅថ្ងៃទី២៧ ខែវិច្ឆិកាឆ្នាំ២០២៤ នេះថា លោកមានភាពសប្បាយរីករាយខ្លាំងណាស់ ដែលបានមកទស្សនាខេត្តមណ្ឌលគីរី ដែលកន្លងមក លោកមិនធ្លាប់មកដល់ខេត្តភាគឦសានមួយនេះទេ។

លោកថា ក្រៅពីមាន​ទេសភាពស្អាត សម្បូរទៅដោយព្រៃភ្នំ ទឹកជ្រោះ ជ្រលងដងអូរ លោកក៏បានឃើញដោយផ្ទាល់នូវការអភិវឌ្ឍ និងការកសាងផ្លូវនៅតាមបន្ទាត់ព្រំដែនផងដែរ គឺនៅច្រកអន្តរជាតិ ទ្វេភាគីដាក់ដាំនេះផ្ទាល់តែម្ដង។

អ្វីដែលលោក​កត់សម្គាល់នោះ គឺកងកម្លាំងនៅខេត្តមណ្ឌលគិរី បានរៀបចំសណ្ដាប់ធ្នាប់បានយ៉ាងល្អប្រសើរ ដែលអាចឲ្យភ្ញៀវទេសចរ​អាច​ទស្សនា​ទេសភាពដ៏ស្រស់ត្រកាលនៅដាក់ដាំ ដោយមិនបានព្រួយបារម្ភពីបញ្ហាសុខសុវត្ថិភាព៕

អត្ថបទ៖ រៀម សុខហេង