ពិព័រណ៍យន្តហោះ និងបច្ចេកវិទ្យា បញ្ចប់ដោយជោគជ័យ និងមានអ្នកចូលរួមជាង ១០ម៉ឺននាក់ នៅថ្ងៃចុងក្រោយ

ពិព័រណ៍យន្តហោះ និងបច្ចេកវិទ្យា ២០២៤ ដែលមានរយៈពេល ៣ថ្ងៃ បានបញ្ចប់ដោយជោគជ័យ ដែលនៅថ្ងៃទី១៥ ម្សិលមិញនេះ ជាថ្ងៃចុងក្រោយមានអ្នកចូលរួមទស្សនាជាង ១០ម៉ឺននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈទំព័រហ្វេសប៊ុក ពិព័រណ៍យន្តហោះ និងបច្ចេកវិទ្យា បានឱ្យដឹងថា នៅថ្ងៃទី១៥ ខែធ្នូ ដែលជាថ្ងៃចុងក្រោយ នៃការដាក់តាំងបង្ហាញយន្តហោះ និងបច្ចេកវិទ្យា គឺមានមនុស្សចំនួន ១០៣ ៣៨៧នាក់ បានចូលទស្សនា។ ចំណែកនៅថ្ងៃទី១៤ មានភ្ញៀវចូលរួមទស្សនា ២៧ ៥៩៥នាក់ និងនៅថ្ងៃទី១ ទទួលបានភ្ញៀវជិត ១ម៉ឺននាក់។

លោក អេង ប៊ុនថេង ប្រតិបត្តិករ និងជាប្រធានគ្រប់គ្រងព្រឹត្តិការណ៍ ពិព័រណ៍យន្តហោះ និងបច្ចេកវិទ្យា បានចាត់ទុកថា ពិព័រណ៍យន្តហោះ និងបច្ចេកវិទ្យាឆ្នាំ២០២៤ គឺទទួលបានជោគជ័យធំបំផុត ក្នុងចំណោមព្រឹត្តិការណ៍ពិព័រណ៍យន្តហោះដែលបានរៀបចំ ៣លើកកន្លងមក។

ប្រធានគ្រប់គ្ររូបនេះ បានបញ្ជាក់ថា ពិព័រណ៍យន្តហោះ និងបច្ចេកវិទ្យា ២០២៤ នេះ លោករំពឹងទុកថានឹងមានភ្ញៀវមកចូលរួមត្រឹមតែជាង ៥ម៉ឺននាក់ តែប៉ុណ្ណោះ ព្រោះកាលពីឆ្នាំ២០២១ ទទួលបានភ្ញៀវចូលរួមត្រឹមតែជាង ៤ម៉ឺននាក់ ប៉ុន្តែជាក់ស្តែងគឺលើសពីការរំពឹងទុក។

កន្លងមកពិព័រណ៍យន្តហោះរៀបចំឡើងរយៈពេល ២ឆ្នាំម្ដង ប៉ុន្តែដោយសារឆ្នាំនេះ ទទួលបានអ្នកចូលរួមលើសឆ្នាំកន្លងៗទៅ លោក អេង ប៊ុនថេង បានឱ្យដឹងថា ថ្នាក់ដឹកនាំពិព័រណ៍យន្តហោះ និងបច្ចេកវិទ្យា នឹងពិចារណាថានឹងត្រូវរៀបចំ ១ឆ្នាំម្តង ឬយ៉ាងណា៕