មនុស្សយ៉ាងច្រើនកុះករ បានមកចូលរួមទស្សនា ពិព័រណ៍យន្តហោះ និងបច្ចេកវិទ្យា នៅថ្ងៃចុងក្រោយនេះ

នៅព្រឹកថ្ងៃទី១៥ ខែធ្នូ ដែលជាថ្ងៃចុងក្រោយ នៃពិព័រណ៍យន្តហោះ និងបច្ចេកវិទ្យា ឆ្នាំ២០២៤ សង្គេតឃើញមានប្រជាពលរដ្ឋជាច្រើន បានមកចូលរួមទស្សនាកម្សាន្ត។ ពិព័រណ៍នេះដែរ មានរយៈពេល ៣ថ្ងៃ ចាប់ពីថ្ងៃទី១៣-១៥ ខែធ្នូ ឆ្នាំ២០២៤។ នៅថ្ងៃចុងក្រោយនេះដែរ ពិព័រណ៍យន្តហោះ និងបច្ចេកវិទ្យា ឆ្នាំ២០២៤ នឹងបើកឱ្យភ្ញៀវចូលទស្សនាដោយសេរីចាប់ពីម៉ោង ៧៖៣០នាទីព្រឹក រហូតដល់ម៉ោង ៨៖ 00នាទីយប់។

លោក ហុត វិបុល សហប្រធានផ្នែករៀបចំទីតាំង បានប្រាប់កម្ពុជាថ្មីថា នៅថ្ងៃចុងក្រោយនៃពិព័រណ៍យន្តហោះ និងបច្ចេកវិទ្យានេះ គឺមានការហោះបង្ហាញឧត្ថម្ភភាគចក្រ ការដាក់តាំងបង្ហាញយន្តហោះ និងស្នាដៃសិស្សនិស្សិត ព្រមទាំងការប្រគល់ពានរង្វានដល់បេក្ខជនក្រុមប្រកួតបច្ចេកវិទ្យា វិញ្ញាសា ការប្រណាំដ្រូន ការប្រកួតយន្តហោះបញ្ជា ការប្រកួតមនុស្សយន្ត និងការប្រកួតរ៉ូបូតចម្បាំង។

សហប្រធានផ្នែករៀបចំទីតាំងរូបនេះ ក៏បានអំពាវនាវឱ្យប្រជាពលរដ្ឋចូលរួមឱ្យបានច្រើនបន្ថែមទៀតនៅថ្ងៃចុងក្រោយនេះ ជាពិសេស ឳពុកម្តាយ ដែលមានកូនៗស្រលាញ់ចូលចិត្តផ្នែកបច្ចេកវិទ្យា ដើម្បីឱ្យពួកគាត់ទទួលបាននូវបទពិសោធ និងចំណេះដឹងថ្មីៗ និងឱកាសបានជួបជាមួយអ្នកជំនាញបើកបរយន្តហោះជាដើម។

ចំណែក កញ្ញា ថោង បញ្ញាទេពី សមាជិកផ្នែករៀបចំទីតាំង បានឱ្យដឹងថា រយៈពេល ២ថ្ងៃមកនេះ មានសិស្ស ស្សិត រួមទាំងប្រជាពលរដ្ឋ ជាច្រើនបានមកចូលរួមទស្សនាពិព័រណ៍យន្តហោះ និងបច្ចេកវិទ្យានេះ ហើយរំពឹងថានៅថ្ងៃចុងក្រោយនេះនឹងមានភ្ញៀវមកទស្សនាកាន់តែច្រើនថែមទៀត។

គួរជម្រាបដែរថា ពិព័រណ៍យន្តហោះ និងបច្ចេកវិទ្យា ឆ្នាំ២០២៤ នៅថ្ងៃទី១៤ ម្សិលមិញនេះ មានភ្ញៀវចូលរួមទស្សនារហូតទៅដល់ ២៧ ៥៩៥នាក់៕