បិទការនេសាទត្រីកាម៉ុង ក្នុងដែនជម្រកសុវត្ថិភាព​ត្រីកាម៉ុងនៅពាមក្រសោប

លោកស្រីអភិបាលខេត្តកោះកុង បានប្រកាសជូនដំណឹងបិទការនេសាទត្រីកាម៉ុង ក្នុងដែនជម្រកសុវត្ថិភាពត្រីកាម៉ុងនៅពាមក្រសោបលើផ្ទៃទឹកទំហំ ១ ២៨៣ ហិកតា ស្ថិតនៅក្នុងភូមិសាស្ត្រឃុំពាមក្រសោប ស្រុកមណ្ឌលសីមា និងឃុំកោះកាពិ ស្រុកកោះកុង។

តាមរយៈលិខិតជូនដំណឹងចុះថ្ងៃទី២០ ខែធ្នូ ឆ្នាំ២០២៤នេះ លោកស្រី មិថុនា ភូថង អភិបាលខេត្តកោះកុង ដល់ប្រជានេសាទទាំងអស់ថា ការធ្វើនេសាទត្រីកាម៉ុង នៅក្នុងដែនជម្រកសុវត្ថិភាពត្រីកាម៉ុង នៅពាមក្រសោបត្រូវបានហាមឃាត់ការនេសាទ ព្រោះថាជារដូវត្រីបន្តពូជ និងពងកូន ចាប់ពីថ្ងៃទី១៩ ខែធ្នូ ឆ្នាំ២០២៤ ដល់ថ្ងៃទី៣១ ខែមីនា ឆ្នាំ២០២៥។

លោកស្រីអភិបាលខេត្តបន្ថែមថា ការបិទសកម្មភាពនេសាទត្រីកាម៉ុង ធ្វើឡើងលើផ្ទៃទឹកទំហំ ១ ២៨៣ ហិកតា ស្ថិតនៅក្នុងភូមិសាស្ត្រឃុំពាមក្រសោប ស្រុកមណ្ឌលសីមា និងឃុំកោះកាពិ ស្រុកកោះកុង។ ដូច្នេះ សូមប្រជាពលរដ្ឋដែលប្រកបរបរនេសាទត្រីកាម៉ុងនៅក្នុងតំបន់គ្រប់គ្រង ដែនជម្រកសុវត្តិភាពត្រីកាម៉ុងពាមក្រសោបទាំងអស់ មេត្តាបញ្ឈប់សកម្មភាពធ្វើនេសាទត្រីកាម៉ុងជាកំហិត។ ប្រជានេសាទទាំងអស់ នឹងបន្តធ្វើនេសាទជាធម្មតាឡើងវិញនៅពេល ផុតរយៈពេលនៃការ បិទការនេសាទនេះ។

លោកស្រី មិថុនា ភូថង សង្ឃឹមថា បងប្អូនប្រជាពលរដ្ឋ ដែលប្រកបរបរនេសាទទាំងអស់នឹងចូលរួមអនុវត្តតាមសេចក្តីជូនដំណឹងនេះ ដើម្បីរួមចំណែកគ្រប់គ្រងផលស្តុក ត្រីកាម៉ុងឱ្យមាននិរន្តរភាព ស្របតាមគោលនយោបាយវិស័យជលផលជាតិ និងធានាបាននូវប្រព័ន្ធអេកូឡូស៊ីដែនជម្រកសុវត្ថិភាពត្រីកាម៉ុងឱ្យល្អប្រសើរ រួមចំណែកលើកកម្ពស់ជីវភាពរស់នៅរបស់ប្រជាពលរដ្ឋ និងសហគមន៍មូលដ្ឋានការពារអភិរក្ស និងប្រើប្រាស់ត្រីកាម៉ុងប្រកបដោយនិរន្តរភាព ស្របតាមគោលនយោបាយវិស័យជលផលជាតិ។ ករណីប្រជានេសាទ មិនអនុវត្តតាមសេចក្តីជូនដំណឹងនេះ នឹងត្រូវផ្តន្ទាទោសតាមច្បាប់ជាធរមាន។

នៅពាក់កណ្តាលឆ្នាំ២០២៤នេះ ទិន្នផលនេសាទដែលប្រមូលសរុបក្នុងខេត្តកោះកុងមាន ២៤.២៤១តោន ក្នុងនោះមានផលនេសាទទឹកសាប និងទឹកប្រៃ។ បើធៀបនឹងរយៈពេលដូចគ្នាថយចុះបន្តិចបន្តួចប៉ុណ្ណោះ ព្រោះតែតម្រូវការបញ្ជាទិញលក់មិនសូវច្រើន។

លោកនាយខណ្ឌរដ្ឋបាលផលជលខេត្តកោះកុងបន្ថែមថា ទិន្នផលនេសាទដែលប្រមូលបានច្រើនជាងគេ គឺខ្យងចំពុះទាមានចំនួន ៧ ពាន់តោន និងគ្រែងឈាមចំនួន ៨៩៧ តោន ហើយក៏មានការកែច្នៃជាផលិតផលក្រៀមៗផងដែរ មានដូចជា៖ បង្គងក្រៀម កាពិ មឹកក្រៀម និងទឹកត្រីជាដើម ដើម្បីបញ្ចេញយកទៅលក់បន្តនៅរាជធានី និងបណ្តាខេត្តផ្សេងៗទៀត៕

អត្តបទ៖ សិរីវឌ្ឍន