ត្រឹមឆ្នាំ២០២៤ រាជធានី ខេត្តចំនួន ១៤ បានបញ្ឈប់ការបន្ទោបង់ពាសវាលពាសកាល

គិតត្រឹមឆ្នាំ២០២៤ រាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ បានទទួលស្គាល់រាជធានីខេត្តចំនួន១៤ ថា​​បានបញ្ឈប់ការបន្ទោបង់ពាសវាលពាសកាល។ រាជធានីខេត្តទាំង១៤នោះ មានដូចជា៖ ១/ខេត្តស្វាយរៀង, ២/ព្រៃវែង, ៣/កណ្តាល, ៤/កំពង់ស្ពឺ, ៥/កំពង់ឆ្នាំង, ៦/កែប, ៧/ព្រះសីហនុ, ៨/កំពង់ចាម, ៩/រតនគីរី, ១០/សៀមរាប, ១១/ត្បូងឃ្មុំ, ១២/រាជធានីភ្នំពេញ, ១៣/តាកែវ និង១៤/ខេត្តស្ទឹងត្រែង។

ក្នុងនោះខេត្តស្វាយរៀង គឺជាខេត្តទី១​ ដែលត្រូវបានក្រសួងអភិវឌ្ឍន៍ជនបទ ប្រកាសថាទទួលស្គាល់ថាបានបញ្ចប់ការបន្ទោបង់ពាសវាលពាសកាលទាំងស្រុង (ODF) ១០០ ភាគរយ ដំបូងគេបង្អស់នៅកម្ពុជា នៅថ្ងៃទី២៧ ខែមេសា ឆ្នាំ២០២១។ ខេត្តព្រៃវែង ជាខេត្តទី២ ដែលត្រូវបានទទួលស្គាល់ថាបានបញ្ឈប់ការបន្ទោរបង់ពាសវាលពាសកាលនៅថ្ងៃទី២៥ ខែតុលា ឆ្នាំ២០២២។ ខេត្តកណ្ដាល គឺជាខេត្តទី៣ ដែលត្រូវបានរដ្ឋទទួលស្គាល់នៅថ្ងៃទី២២ ខែធ្នូ ឆ្នាំ២០២២។ ចំណែកខេត្តកំពង់ស្ពឺ ត្រូវបានប្រកាសទទួលស្គាល់នៅថ្ងៃទី០៣ ខែមេសា ឆ្នាំ២០២៣។ ខេត្តកំពង់ឆ្នាំង គឺជាខេត្តទី៥ ដែលត្រូវបានប្រកាសទទួលស្គាល់នៅថ្ងៃទី២០ ខែមិថុនា ឆ្នាំ២០២៣។ ខេត្តទី៦ គឺខេត្តកែប ដែលត្រូវបានទទួលស្គាល់នៅថ្ងៃទី ១៥ ខែសីហា ឆ្នាំ២០២៣។

សម្រាប់ខេត្តទី៧ គឺខេត្តព្រះសីហនុ ដែលត្រូវបានប្រកាសទទួលស្គាល់ថ្ងៃទី១៣ ខែមិថុនា ឆ្នាំ២០២៤។ ខេត្តកំពង់ចាម ជាខេត្តទី៨  ត្រូវបានប្រកាសទទួលស្គាល់នៅថ្ងៃទី២៤ ខែកក្កដា ឆ្នាំ២០២៤។ ខេត្តរតនគិរី បានប្រកាសទទួលស្គាល់នៅថ្ងៃទី១២ ខែសីហា​។ ខេត្តសៀមរាប ជាខេត្តទី១០ ត្រូវបានប្រកាសទទួលស្គាល់នៅថ្ងៃទី២៦ ខែកញ្ញា។ ខេត្តទី១១ ខេត្តត្បូងឃ្មុំ ត្រូវបានប្រកាសទទួលស្គាល់នៅថ្ងៃទី ២៥ ខែវិច្ឆិកា។ រាជធានីភ្នំពេញ ត្រូវបានប្រកាសទទួលស្គាល់នៅថ្ងៃទី២៧ ខែវិច្ឆិកា។ ខេត្តតាកែវជាខេត្តទី១៣ ដែលត្រូវបានប្រកាសទទួលស្គាល់នៅថ្ងៃទី០៥ ខែធ្នូ និងខេត្តទី១៤ គឺជាខេត្តស្ទឹងត្រែង ដែលត្រូវបានប្រកាសថាជាខេត្តដែលបញ្ឈប់ការបន្ទោបង់ពាសវាលពាសកាលនៅថ្ងៃទី ១៦ ខែធ្នូ ឆ្នាំ២០២៤។

គួរឱ្យដឹងថា   ក្រសួងអភិវឌ្ឍន៍ជនបទ បាននិងកំពុងបន្តអនុវត្តផែនការសកម្មភាពជាតិស្តីពី ការផ្គត់ផ្គង់ទឹក ការសំអាត និងអនាម័យជនបទ ដែលសម្រេចបានអត្រាគ្របដណ្តប់ទឹកស្អាត និងអនាម័យទូទាំងប្រទេសប្រមាណ ៨៨,៨០% ក្នុងនោះអត្រាគ្របដណ្តប់ទឹក ៨៦,០៩% និងអនាម័យ ៩១,៤៧% ហើយបានកំណត់ថា នៅឆ្នាំ២០៣០ ប្រជាពលរដ្ឋនៅទូទាំងប្រទេសមានទឹកស្អាតប្រើប្រាស់គ្រប់គ្រាន់ និងការប្រតិបត្តិអនាម័យ ១០០% ដោយរស់នៅក្នុងបរិស្ថានប្រកបដោយនិរន្ដរភាព៕

ដោយ៖ ង៉ិល ណារ៉ាត់