ព័ត៌មានជាតិ

ឆ្នាំ ២០២៥ ស្រុកព្រែកប្រសព្វជាប់ដងទន្លេ ដាក់ផែនការចុះបញ្ជីដីធ្លីចំនួន ២២ ២៩៧ ក្បាលដីជូនប្រជាពលរដ្ឋ

បានផុស

១ year មុន

នៅ

ថ្ងៃអង្គារ ១៤ មករា ២០២៥

ដោយ

បើតាមប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះបានឲ្យដឹងថា ស្រុកព្រែកប្រសព្វមានផែនការចុះបញ្ជីដីធ្លីចំនួន ២២ ២៩៧ ក្បាលដីជូនដល់ប្រជាពលរដ្ឋ ស្របតាមផែនការរបស់រដ្ឋាភិបាលក្នុងការជំរុញបញ្ចប់ការចុះបញ្ជីដីធ្លីទូទាំងប្រទេសត្រឹមឆ្នាំ ២០២៨។

លោក អ៊ូ សុបុណ្ណកា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះបានថ្លែងថា អនុវត្តតាមយុទ្ធសាស្ត្របញ្ចកោណរបស់រាជរដ្ឋាភិបាល ក្រសួងរៀបចំដែនដី នគរូបនីយកម្មនិងសំណង់ បានដាក់ចេញនូវផែនការបញ្ចប់ការវាស់វែងដីធ្លីទូទាំងប្រទេសលើក្បាលដីនៅសល់ប្រមាណ ៥ លានក្បាលដី ក្នុងនោះខេត្តក្រចេះ ក៏បានដាក់ចេញផែនការបញ្ចប់ការវាស់វែងដីធ្លីឲ្យរួចនៅដំណាច់ឆ្នាំ២០២៥ លើក្បាលដីប៉ាន់ស្មានក្នុងខេត្តមានប្រមាណ ១១៨ ០០០ ក្បាលដី ក្នុងភូមិចំនួន ២៥៥ ភូមិ នៃឃុំចំនួន ៣៨ ឃុំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកពាក់ព័ន្ធការចុះបញ្ជីដីធ្លីជូនប្រជាពលរដ្ឋនៅស្រុកព្រែកប្រសព្វប្របតាមមាត់ទន្លេ ស្ថិតនៅទល់មុខទីរួមខេត្តក្រចេះ នៅឆ្នាំ ២០២៥ មន្ទីររៀបចំដែនដីខេត្តក៏បានដាក់ផែនការចុះបញ្ជីដីធ្លីជូនប្រជាពលរដ្ឋចំនួន ២២ ២៩៧ ក្បាលដី។

បើតាមប្រធានមន្ទីររៀបចំដែនដីខេត្តក្រចេះ ក្នុងភូមិសាស្រ្តស្រុកព្រែកប្រសព្វ ការចុះបញ្ជីដីធ្លីជូនប្រជាពលរដ្ឋរហូតមកដល់ពេលនេះទទួលបានលទ្ធផលដូចតទៅ៖

-ប្រកាសតំបន់វិនិច្ឆ័យបានចំនួន ៣៥ ភូមិ (ចេញបណ្ណចំនួន ១៥ ភូមិ, វាស់វែងចប់ចំនួន ១៧ ភូមិ និងកំពុងដំណើរការវាស់វែងចំនួន ០៦ ភូមិ ក្នុងឃុំចំបក់ និងបន្តចុះបញ្ជីដីតាមផែនការឆ្នាំ២០២៥ ចំនួន ១៤ ភូមិ ក្នុងឃុំតាម៉ៅ ឃុំកោះតាស៊ុយ និងឃុំកំពង់គរ)។
-វាស់វែងសរុប ចំនួន ៣៨ ៧១២ ក្បាលដី
-ចែកបណ្ណសរុបចំនួន ១៧ ៨៥១ ក្បាលដី = ១៣ ៣៦៨ គ្រួសារ ក្នុងនោះ+
-តាមបទបញ្ជា ០១ បប ចំនួន ៤ ៩៣៦ ក្បាលដី = ៤ ១០៤ គ្រួសារ
-តាមកម្មវិធីអនុវិស័យរដ្ឋបាលដីធ្លីចំនួន ១២ ៩១៥ ក្បាលដី = ៧ ១៨៧ គ្រួសារ

ខេត្តក្រចេះបានដាក់ចេញផែនការបញ្ចប់ការវាស់វែងឲ្យរួចនៅដំណាច់ឆ្នាំ ២០២៥ លើក្បាលដីប៉ាន់ស្មានទូទាំងខេត្តមានប្រមាណ ១១៨ ០០០ ក្បាលដី ក្នុងភូមិចំនួន ២៥៥ ភូមិ នៃឃុំចំនួន ៣៨ ឃុំ។ បើតាមមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ ការងារចុះបញ្ជីដីធ្លីមានលក្ខណៈជាប្រព័ន្ធទូទាំងខេត្តគិតរហូតដល់ខែមករា ឆ្នាំ២០២៥ សម្រេចបានលទ្ធផលដូចតទៅ៖
-ប្រកាសតំបន់វិនិច្ឆ័យបានចំនួន ២៧៧ ភូមិ = ៤៥ឃុំ/សង្កាត់ = ៧ក្រុង/ ស្រុក
-បានចេញបណ្ណកម្មសិទ្ធិរួច ចំនួន ៨៤ ៨២២ ក្បាលដី ក្នុងនោះតាមបទបញ្ជាលេខ០១បប ចំនួន ៣៩ ៣០៤ ក្បាលដី និងតាមកម្មវិធីអនុវិស័យរដ្ឋបាលដីធ្លី ចំនួន ៤៥ ៥១៨ ក្បាលដី៕

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា