គម្រោង​កែលម្អ​​សួនច្បារមាត់ទន្លេ ចំណាយ​ថវិកា​ជិត ២០០ លានរៀល ​ផ្លាស់ប្តូរ​មុខមាត់​ថ្មី​ស្រុកសំបូរ​ទាក់ទាញទេសចរ​បន្ថែមទៀត

ជាស្រុកមួយ​​ស្ថិតនៅ​ជាប់ដងទន្លេមេគង្គ ជាមួយទេសភាពដ៏ស្រស់ត្រកាល បេះដូងនៃទីរួមស្រុកសំបូរនឹង​កាន់តែមានភាពទាក់ទាញសម្រស់ស្រស់ត្រកាលបន្ថែមទៀត ខណៈ​គម្រោង​កែលម្អកែលម្អសោភណ្ឌ័ភាព​រួមទាំងការ​រៀបចំ​សួនច្បារមាត់​ទន្លេ ដែលចំណាយថវិកាប្រមាណជិត ២០០ លានរៀល នឹង​លេច​រូបរាងនៅពេល​ឆាប់ៗនេះ។

លោក គង់ មេត្តា អភិបាលស្រុកសំបូរ បានឲ្យ <<កម្ពុជាថ្មី>> ដឹងនៅថ្ងៃនេះថា គម្រោងនេះគឺជាគំនិតផ្តួចផ្តើមរបស់លោកផ្ទាល់ តាំងពីឆ្នាំ២០២២ នៅពេលដែល​លោកត្រូវបានរាជរដ្ឋាភិបាលប្រកាសតែងតាំងចូលកាន់មុខតំណែងជាអភិបាលស្រុកសំបូរ។

គម្រោងអភិវឌ្ឍន៍របស់រដ្ឋបាលស្រុកសំបូរ ដែលបានដាក់ក្នុងកម្មវិធីវិនិយោគបីឆ្នាំរំកិល (២០២៥-២០២៧) គឺ​ការ​ជួសជុល​ខឿន និងសួនច្បារមាត់ទន្លេ ដើម្បីលើកកម្ពស់សោភណ្ឌ័ភាពស្រុក។ លោក គង់ មេត្តា បានបញ្ជាក់ថា ផែនការ​នេះនឹងចាប់ផ្ដើមជាជំហានៗមានដូចជា ការចចារជាមួយពលរដ្ឋ​ដែលរស់នៅមុខបរិវវេណវត្តព្រះវិហារសសរ​១០០ ការផ្លាស់​ប្ដូរទីតាំងអ្នកលក់ដូរ ការរៀបចំគ្រឹះឲ្យបានមុនទឹកទន្លេមេគង្គឡើង ដែល​គម្រោងនេះនឹងដំណើរការ សាងសង់​ប្រហែលរយៈពេល ៤ខែ និងចំណាយថវិកាប្រហែលជិត ២០០លានរៀល។

លោក គង់ មេត្តា បានដាក់ក្តីរំពឹងធំបំផុតសម្រាប់​គម្រោង​អភិវឌ្ឍនេះ​គឺ​ ទី១ មុខមាត់របស់ស្រុកសំបូរ ត្រូវបានកែប្រែ និងលើកកម្ពស់កាន់តែល្អប្រសើរជាងមុន ទី២ គឺផលប្រយោជន៍ផ្នែកសេដ្ឋកិច្ច វប្បធម៌ និងទេសចរ ជាដើម។

ខណះដែលស្រុកសំបូរទទួលបានផ្លូវស្អាត តាមរយះការលើកកម្ពស់គុណភាពផ្លូវខេត្តលេខ ៣៧៧ តភ្ជាប់ពីក្រុងក្រចេះទៅស្រុកសំបូរ បាន​ជួយកាត់បន្ថយរយះពេលការធ្វើដំណើរ ក៏ដូចជាការចំណាយផ្សេងៗ ហើយ​ទេសចរ​ឆ្ងាយ​ជិតក៏​​នឹងកាន់តែ​ស្គាល់ស្រុកសំបូរ និង​មកលេងទីរួមស្រុកក៏កាន់តែច្រើន ធ្វើឲ្យចំណេញសេដ្ឋកិច្ចដល់មូលដ្ឋាន។

លោកអភិបាលស្រុកសំបូរបន្តថា ប្រជាពលរដ្ឋរស់នៅស្រុកសំបូរភាគច្រើនប្រកបរបរកសិកម្ម ៧៩%, សេវាកម្ម ១៩% និង​ផ្សេងៗ ២%។ ស្រុកសំបូរ មានសក្តានុពលសំខាន់ៗ រួមមាន ធនធានធម្មជាតិ: ព្រៃឈើ ត្រី រ៉ែ ដីមានជីវជាតិ។ សក្ដានុពលលើវិស័យទេសចរណ៍ អេកូទេសចរណ៍ធម្មជាតិ និងកសិឧស្សាហកម្ម រួមមាន តំបន់ទេសចរណ៍វប្បធម៌ អតីតទីក្រុងសម្ភុបុរ: និងវត្តព្រះវិហារធំសសរមួយរយ ហើយជាតំបន់រាមសាប មានឆ្នេរខ្សាច់ស្រស់ស្អាត មានកោះ ព្រៃលិចទឹក និងតំបន់អភិរក្សចំរុះ ជាច្រើនទៀត។ សូម្បីតែកោះសាមសិប បច្ចុប្បន្នក៏ស្ថិតក្នុងស្រុកសំបូរដែរ គ្រាន់តែផ្លូវចូល តាម​ស្រុកអូរគ្រៀងសែនជ័យតែប៉ុណ្ណោះ។ ប៉ុន្តែទោះជាយ៉ាងណាក្តី លោក គង់ មេត្តា អភិបាលស្រុកសំបូរ មានមហិច្ឆតាថា នៅឆ្នាំក្រោយនេះ នឹងព្យាយាមធ្វើផ្លូវឆ្ពោះទៅ កោះសាមសិប ឲ្យខានតែបានតាមរយៈកោះរងាវ ស្ថិតក្នុងឃុំកំពង់ចាម ស្រុកសំបូរ ខេត្តក្រចេះ៕

អត្ថបទ ប្រុញ វិធិន