អភិបាលខេត្តរនគិរី ប្រាប់អាជ្ញាធរត្រូវបន្តអនុវត្តគោលនយោបាយភូមិ ឃុំ មានសុវត្ថិភាព ដើម្បីសេចក្តីសុខប្រជាជន

លោក ញ៉ែម សំអឿន អភិបាលខេត្តរតនគិរី បានប្រាប់ឱ្យអាជ្ញាធរមូលដ្ឋានទាំងអស់នៅក្នុងភូមិសាស្រ្តខេត្តរតនគិរី ត្រូវយកចិត្តទុកដាក់អនុវត្តទៅតាមគោលនយោបាយភូមិ ឃុំមានសុវត្ថិភាព ដើម្បីសន្តិសុខ សណ្តាប់ធ្នាប់ និងសេចក្តីសុខសាន្តរបស់ប្រជាពលរដ្ឋ។ លោកបានលើកឡើងបែបនេះនៅក្នុងកិច្ចប្រជុំភូមិ ឃុំមានសុវត្ថិភាព ដើម្បីលើកទិសដៅការងារឆ្នាំ២០២៥ នៅសាលាខេត្តរតនគិរី កាលពីថ្ងៃទី១៤ ខែមករា។ កិច្ចប្រជុំនេះក្រោមអធិបតីភាពលោក ប៉ាវ ហមផាន រដ្ឋលេខាធិការក្រសួងមហាផ្ទៃ សមាជិកក្រុមប្រឹក្សាខេត្ត និងអាជ្ញាធរពាក់ព័ន្ធក្នុងខេត្តផ្សេងទៀត។

លោក ញ៉ែម សំអឿន អភិបាលខេត្តរតនគិរី បានលើកឡើងពីកិច្ចខិតខំប្រឹងប្រឹងរបស់កងកម្លាំងអាជ្ញាធរពាក់ព័ន្ធទាំងអស់ដែលបានចូលរួមអនុវត្តគោលនយោបាយភូមិ ឃុំ មានសុវត្ថិភាពប្រកបដោយប្រសិទ្ធភាពជូនប្រជាពលរដ្ឋ នៅតាមមូលដ្ឋានដោយភាពកក់ក្តៅ និងសុវត្ថិភាពខ្ពស់។ លោកសង្គតធ្ងន់ទៅលើកម្លាំងប៉ុស្តិ៍រដ្ឋបាល ឃុំ សង្កាត់ទាំងអស់ ត្រូវបន្តខិតខំយកចិត្តទុកដាក់អនុវត្តគោលនយោបាយនេះឱ្យមានប្រសិទ្ធភាពខ្ពស់ ជាពិសេស ក្នុងការចូលរួមការពារសន្តិសុខ សណ្ដាប់ធ្នាប់សាធារណៈ សុវត្ថិភាពជូនប្រជាពលរដ្ឋនៅតាមមូលដ្ឋានគ្រប់ពេលវេលាគ្រប់កាលៈទេសៈដោយមិនប្រកាន់ពូជសាសន៍ពណ៌សម្បុរ ឬនិន្នាការនយោបាយបក្សពួកនិយមណាមួយឡើយ ដោយត្រូវខិតខំអនុវត្ត និងបម្រើជូនគាត់ឱ្យអស់ពីកម្លាំងកាយចិត្ត ដែលទាំងនេះ គឺជាផ្នែកមួយក្នុងការ ការពារសុវត្ថិភាព សន្តិសុខសណ្ដាប់ធ្នាប់ជូនគាត់ប្រកបដោយភាពកក់ក្តៅ និងសន្តិសុខខ្ពស់។

ឆ្លៀតក្នុងឱកាសនោះ លោកក៏បានកោតសរសើ រនិងវាយតម្លៃទៅលើកិច្ចខិតខំប្រឹងប្រែងរបស់ប៉ុស្តិ៍នគរបាល នៅតាមភូមិស្រុក ខេត្ត ដែលយកចិត្តទុកដាក់ ខិតខំរក្សាសន្តិសុខសណ្ដាប់ធ្នាប់ ទទួលបានលទ្ធផលគួរជាទីមោទនៈ ការពារសណ្តាប់ធ្នាប់សាធារណៈ។ លើសពីនេះទៀត លោកក៏ជំរុញ និងលើកទឹកចិត្តដល់កងកម្លាំងមានសមត្ថកិច្ចគ្រប់ថ្នាក់ ត្រូវបន្តពង្រឹងការផ្សព្វផ្សាយគោលនយោបាយភូមិ ឃុំ សង្កាត់មានសុវត្ថិភាព ដល់មន្ត្រីរាជការស៊ីវិល កងកម្លាំងមានសមត្ថកិច្ចគ្រប់ថ្នាក់ រដ្ឋបាលឃុំ សង្កាត់ ប្រជាពលរដ្ឋ អង្គការសង្គមស៊ីវិល និងអ្នកពាក់ព័ន្ធនានា ដើម្បីលើកកម្ពស់ការយល់ដឹង ជាពិសេស ការចូលរួមក្នុងការអនុវត្តគោលនយោបាយភូមិ ឃុំ សង្កាត់មានសុវត្ថិភាព ប្រកបដោយប្រសិទ្ធភាព និងទទួលបានលទ្ធផលកាន់តែល្អប្រសើរ។

អាជ្ញាធរ ត្រូវបន្តពង្រឹងការងារគណៈបញ្ហាការឯកភាពខេត្តឱ្យបានរឹងមាំ ក្តាប់ឱ្យបាននូវរាល់សភាពការនានាដែលកើតមានតាមក្រុង-ស្រុកក្នុងដែនសមត្ថកិច្ចខ្លួន ដើម្បីធ្វើការដោះស្រាយឆ្លើយតបបានទាន់ពេលវេលា។ ត្រូវចុះផ្សព្វផ្សាយផ្ទាល់តាមខ្នងផ្ទះប្រជាពលដ្ឋអំពីគោលនយោបាយភូមិឃុំមានសុវត្ថិភាព ត្រូវរៀបចំវេទិការសាធារណៈ ដើម្បីស្តាប់កង្វល់ និងសំណូមពរនានាពីប្រជាពលដ្ឋ ដើម្សីរួមគ្នាដោះស្រាយ និងដើម្បីឆ្លើយតបទៅកង្វល់ និងសំណូមពរនានាពីប្រជាពលដ្ឋ ដើម្បីរួមគ្នាដោះស្រាយនៅក្នុងមូលដ្ឋាន លើសន្តិសុខ សណ្តាប់ធ្នាប់ និងទប់ស្កាត់ក្មេងទំនើង ឈានទៅរកលុបបំបាត់ អសន្តិសុខក្នុងសង្គម ដែលជាទិសដៅអភិវឌ្ឍន៍ ដោយសុខុមាលភាពសង្គម៕

ដោយ៖ ខៀវ ចាប