អាជ្ញាធរខេត្តកំពង់ធំ​បិទចរាចរយានយន្តដឹកទំនិញឆ្លងកាត់ស្ពានអូរមៀន ដោយសារទ្រុតទ្រោម

អាជ្ញាធរខេត្តកំពង់ធំ ប្រកាសបិទចរាចរយានយន្តដឹកទំនិញគ្រប់ប្រភេទឆ្លងកាត់ស្ពានអូរមៀន ស្ថិតក្នុងស្រុកសណ្តាន់ ដែលជាស្ពានតភ្ជាប់ពីស្រុកនេះ​ទៅស្រុកប្រាសាទសំបូរ។ ការសម្រេចបិទដំណើរឆ្លងកាត់ស្ពាននេះ ត្រូវបានអាជ្ញាធរ បញ្ជាក់ថា​ ដោយសារស្ថានភាពស្ពានទ្រុតទ្រោម​។

ស្ពានអូរមៀន ស្ថិតនៅចំនុចភូមិសមរម្យ ឃុំមានជ័យ ស្រុកសណ្តាន់ គឺជាហេដ្ឋារចនាសម្ព័នដ៏មានសារៈសំខាន់សម្រាប់តភ្ជាប់រវាងស្រុកប្រាសាទសំបូរ ទៅស្រុកសណ្តាន់។ ប៉ុន្តែនៅពេលថ្មីៗកន្លងទៅនេះ ក្រុមការងារបច្ចេកទេស បានចុះទៅពិនិត្យចំនុចស្ពាន ឃើញថា មានស្ថានភាពទ្រុតទ្រោម និងមានផ្នែកខ្លះត្រូវបានបាក់ស្រុត ដោយមិនអាចទ្រាំទ្រនឹងទម្ងន់ យានយន្តដឹកទំនិញគ្រប់ប្រភេទឆ្លងកាត់បានទេ។

ដើម្បីរក្សាសុវត្ថិភាពប្រជាពលរដ្ឋដែលធ្វើដំណើរពីស្រុកប្រាសាទសំបូរ ទៅស្រុកសណ្តាន់ ដោយឆ្លងកាត់ស្ពានអូរមៀននេះ រដ្ឋបាលខេត្តបានសម្រេចបិទចរាចរចំពោះយានយន្តដឹកទំនិញគ្រប់ប្រភេទដោយអនុញ្ញាតឱ្យតែយានយន្តធន់តូចលក្ខណៈគ្រួសារ និងទោចក្រយានយន្តឆ្លងកាត់តែប៉ុណ្ណោះ។ នេះបើតាមសេចក្ដីជូនដំណឹងរបស់រដ្ឋបាលខេត្តកំពង់ធំ។

រដ្ឋបាលខេត្ត បានសុំការអធ្យាស្រ័យដល់ពលរដ្ឋដែលជាម្ចាស់យានយន្តដឹកទំនិញគ្រប់ប្រភេទ និងជួយចូលរួមសហការ ជាមួយអាជ្ញាធរដោយឈរលើស្មារតីទទួលខុសត្រូវខ្ពស់ ដើម្បីរួមចំណែកថែរក្សាផ្លូវស្ពានឱ្យប្រើប្រាស់បានយូរអង្វែង៕

ដោយ៖ ធឿន វ៉ាន់សុង