ក្លឹបអូដាកម្ពុជា រៀបចំកម្មវិធីជិះកង់ពីភ្នំពេញទៅខេត្តមណ្ឌលគិរី ដោយប្រើរយៈពេល ២៧ម៉ោង

លោក ស៊ាង សឿង ប្រធានមន្ទីរទេសចរណ៍ខេត្តមណ្ឌលគិរី នៅថ្ងៃទី១៤ ខែកុម្ភៈ ឆ្នាំ២០២៥ បានឱ្យដឹងថា «ក្លឹបអូដាកម្ពុជា» នឹងមានរៀបចំកម្មវិធីជិះកង់តាមសមត្ថភាពពីភ្នំពេញទៅកាន់ភូមិភាគឦសានខេត្តមណ្ឌលគិរី ដែលត្រូវចំណាយរយៈពេលត្រឹម ២៧ម៉ោងប៉ុណ្ណោះ។

កម្មវិធីនេះមានការរៀបចំ និងឧបត្ថម្ភដោយ «ក្លឹបអូដាកម្ពុជា» ហើយការរៀបចំកម្មវិធីនោះដែរ ក្នុងគោលបំណងចង់ផ្សារភ្ជាប់នឹងការសិក្សា ភ្នំពេញ-មណ្ឌលគិរី ដើម្បីឧបត្ថម្ភសិស្សជនជាតិដើមភាគតិចចំនួន ១៤១នាក់ ដែលកំពុងខ្វះខាតសម្ភារៈសិក្សានៅក្នុងសាលា។

លោកប្រធានមន្ទីរទេសចរណ៍ខេត្តមណ្ឌលគិរីថា កម្មវិធីជិះកង់តាមសមត្ថភាពពីភ្នំពេញទៅកាន់ភូមិភាគឦសានខេត្តមណ្ឌលគិរី បេក្ខជនត្រូវមានគោលដៅចេញពីរាជធានីភ្នំពេញកាត់ខេត្តជាច្រើនរួមមាន៖ កណ្ដាល-កំពង់ចាម-ត្បូងឃ្មុំ-ក្រចេះ និងបញ្ចប់នៅរង្វង់មូលគោព្រៃ ខេត្តមណ្ឌលគិរី។ កម្មវិធីនេះនឹងចាប់ផ្តើនៅថ្ងៃសៅរ៍ ទី៨ ខែមីនា ឆ្នាំ២០២៥ ដោយបេក្ខជនត្រូវជួបជុំគ្នានៅម៉ោង ៤៖00នាទីព្រឹក នៅចំនុច 0គីឡូ នៅច្រកឡើងវត្តភ្នំខាងកើត ដែលមានចម្ងាយ ៤១៣គីឡូម៉ែត្រ។

លោកបន្តថា លោកបញ្ជាក់ថា «បេក្ខជនដែលបានចូលរួមក្នុងកម្មវិធីជិះកង់ពីភ្នំពេញ ឆ្ពោះទៅខេត្តមណ្ឌលគិរីមានចន្លោះពី ៣០ទៅ៥០កង់ ហើយការជិះកង់នេះ បេក្ខជនត្រូវត្រៀមសម្ភារៈដោយខ្លួនឯង យើងមិនមានជាងកង់ ម៉ូតូ រឺឡាន តាមជួយនោះទេ ពោលគឺ ខ្លួនទីពឹងខ្លួន ជាពិសេសបេក្ខជនត្រូវមានអាវចំណាំងផ្លាតជាដាច់ខាត ក្នុងការចូលរួម»។                                                                             

លោកបន្ថែមថា បេក្ខជនសូមពិចារណាមុននឹងសម្រេចចិត្តចូលរួមកម្មវិធីនេះ ដែលមានរយៈពេលនៃការជិះកង់ ២៧ម៉ោងគត់ គឺខ្លួនទីពឹងខ្លួន មិនមានអ្នកជួយសង្រ្គោះតាមផ្លូវនោះទេ៕

អត្ថបទ៖រៀម សុខហេង